1 Vandu pavalolili kuvya Musa acheliwi kuwuya kuhuma kuchitumbi, valundimini palongolo ya Haloni vakamjovela, "Mbwela! Titengenezela michapanga yeyikutilongosa muni timanyili lepi chechimkolili Musa mweatiwusili ku Misili." 2 Haloni akavayangula, "Mtola ndolola za zahabu zezivili mumakutu ga vadala vinu na vasongolo vinu na vasikana vinu muniletela." 3 Ndi vandu voha vakahula ndolola zavi za zahabu mumakutu gavi na kumpela Haloni. 4 Akatola vindu ivyo vya zahabu na kunyungulusa kangi akatengeneza michapanga ya mpapakasi wa ng'ombi. Vandu vakakwesa lwami vakajova, "Mwenuyu ndi chapanga witu Isilaeli mwatiwusili pamulima wa Misili."

5 Kangi Haloni akamjengela mazabahu mpapakasi mwenuyo ndi akakokosa "Chilau yati kuvya na mselebuko ndava ya Bambu." 6 Chilau yaki vandu vayimwiki na kuwusa luteta lwa kutinyisa, na luteta lwa kuhanganilana. Vandu vatamili pahi kulya na kunywa na kugala, vakakina na pamwisu vakapunilana.

7 Bambu akamjovela Musa, "Huluka pahi muni vandu vaku veuvawusili kuhuma kumulima wa Misili vajihokisi vene, 8 vayilekili kanyata njila yenavagizi vayilanda, vakatengeneza mpapakasi wa ng'ombi kwa kuhengela zahabu yeyinyungulwisi na kuyifugamila na kuyiwusila luteta kuni vijova ‘Mwenuyu ndi Isilaeli chapanga witu mwatiwusili kumulima wa Misili!’ 9 Bambu akamjovela Musa, nivamanyili vandu ava, vene vana mitima yeyinonopa. 10 Hinu nileka kotoka kunidivalila ligoga langu livya panani yavi, na nene nihotola kuvakomakesa kangi yati nikukita veve na viveleku vyaku muvya mulima uvaha."

11 Nambu Musa akamyupa Bambu Chapanga waki akajova, "Ee Bambu ndava kyani ukuvayomela vandu vaku veuvasangwili kuhuma kumulima wa Misili kwa chiwoko chaku chikulu chechina makakala? 12 Ukakita chenicho chakaka Vamisili yati vijova, ‘Wavawusili ku Misili muni kuvakomakesa muvitumbi na kuvayongomesa njwee.’ Bambu leka ligoga laku na kangi leka lijambu lihakau leugana kukita kwa vandu vaku. 13 Vakumbuka vatumisi vaku, Abulahamu na Isaka na Yakobo, vewavalapalili kwa lihina laku, pewajovili, Yati nikuviyongesa viveleku vinu na kuvya ngati ndondo za kunani na kuvapela mulima woha uvya wavi magono goha gangali mwishu." 14 Kangi Bambu akaleka kuvakitilia vandu vaki lijambu lila lihakahu leajovili.

15 Ndi Musa akahuluka kuhuma kuchitumbi na vibawu vivili vya maganga mumawoko mwaki viyandikwi malgizu ga Chapanga pandi zoha. 16 Vibawu vyenivyo avitengenizi Chapanga mwene na mayandiku ago ayandiki Chapanga mwene.

17 Yoshua paayuwini lwami lwa ngondo lwa vandu, akamjovela Musa, "Niyuni lwami lwa vandu vikomana kumandanda ga kugona."

18 Nambu Musa akamyangula, "Lepi lwami lwa uhotola amala uhotola lepi, nambu lwami lweniyuwana ndi lwami lwa vandu veviyimba."

19 Musa peavi papipi na kambi na kumuwona chimong'omong'o cha ng'ombi kuni vandu vikina, ndi akavya na ligoga neju, akataga pahi vibawu vila kuhuma mumawoko gaki na kudenyeka pahi pala pa chitumbi. 20 Ndi akatola chimong'omong'o cha mpapakasi wa ng'ombi yevayitengenizi na kunyungulusa pa motu, akayaga mbaka yikavya ngati uhembe, akakologa uhembe wenuo mumanji na kuvalagiza Vaisilaeli vanywayi. 21 Musa akamjovela Haloni, "Vandu ava vakuhengili kyani mbaka uvayingisi mumabudilu gavaha naa?"

22 Haloni akayangula, "Nikuyupa Bambu wangu ukotoka kuniyomela nene. Uvamanyili vandu ava cheviyuyuka mukukita gahakau. 23 Vakabwela na kunijovela, ‘Utihengela michapanga vyevikutilongosa muni tangamanya gegamkolili mundu mwenuyo Musa mweatiwusili kumulima wa Misili.’ 24 Nene nikavajovela, kila mmonga mweavili na vindu vya zahabu aleta. Ndi vakaleta na nene nikavivika pamotu vinyunguluka ndi akahumila mpapakasi uyu."

25 Hinu Musa palolili kuvya vambelili Chapanga na kukita chavaganili vene, muni Haloni avalekili vakita uhakau na kukita chevigana vene, na kujiletela soni palongolo ya makoko gaki, 26 ndava yeniyo Musa akayima palongolo ya mlyangu wa Lindanda la kugona na kukota "Yoyoha mwaavili upandi wa Bambu Ndi abwela upandi kwa nene." Valawi voha vahambili palongolo yaki. 27 Akavajovela, "Bambu Chapanga wa Isilaeli ijova naha, ‘Kila mundu ajikunga upanga pachiwunu, atindila kila pandu apa kuhumila upandi umonga mbaka upandi wungi, na kila mmonga amkoma mlongo waki amala mkozi waki amala mundu wa papipi yaki.’" 28 Valawi vakakita ngati Musa chavajovili. Ligono lenilo vandu elufu hidatu vakomiwi. 29 Musa akajova, "Lelu mjinyambisi mwavene kwa kumhengela Bambu, muni myogwipi lepi hati kuvakoma vana vinu amala valongo vinu, Bambu avamotisa lelu."

30 Chilau yaki Musa akavajovela vandu, "Mbudili Chapanga neju! Hinu nikumuhambila Bambu kunani kuchitumbi, yati nikumyupa pangi akuvalekekesa mabudilu ginu." 31 Ndi Musa akawuya kwa Chapanga, akamjovela, "Vandu ava vakubudili neju vajikitili chimong'omong'o cha zahabu vene na kuchigundamila. 32 Nambu hinu nikuyupa uvalekekesa kubuda kwavi, nambu ngati uganili lepi nikuyupa ulihungula lihina langu muchitabu chaku cheuyandiki mahina ga vandu vaku."

33 Nambu Bambu akamjovela Musa, "Yati nikumuhungula kuhuma muchitabu changu mundu yoyoha mweabudili. 34 Nambu hinu hamba ukavalongosa vandu mbaka pandu penikujovili. Lola mtumu wangu yati akulongolela, nambu ligono lenibwela yati nikuvapela mbunu ndava ya mabudilu genago."

35 Hinu Bambu akavatova vandu kwa utamu ndava ya mabudilu ga kugundamila chimong'omong'o chechatenganizwi na Haloni.