1 Bambu aka mjovela Musa, "Wuka penapa veve na vandu avo veuvawusili kumulima wa Misili muhamba kumulima wenamlapili Abulahamu, na Isaka na Yakobo kwa chilapu kuvya yati nikuvapela viveleku vinu. 2 Yati nikumtuma mtumu wa kunani kwa Chapanga avalongolela ndi yati nikuvavinga Vakanani na Vaamoli na Vahiti na Vapelezi na Vayebusi. 3 Muhamba pamulima uvaha weuna ludaka lwa bwina na weuganikiwa kwa kulima na kufuya. Nambu muni nyenye muna mitima yeyivi na ndindani yati nihamba lepi pamonga na nyenye, muni nikotoka kuvayongomesa munjila."

4 Vandu pavayuwini lijambu lenilo la ungolongondi vakatumbula kuvembeneka, kawaka mweawalili vindu vya mapambu gaki. 5 Vakitili chenicho muni Bambu amjovili Musa, "Vajovela Vaisilaeli, ‘Nyenye ndi vandu vana mitima yeyitopa, nikahamba pamonga na nyenye lugendu luhupi ndu, yati nikuvayongomesa neju. Hinu muhula vindu vya mapambu ginu nimanya chakuvakita.’ " 6 Hinu Vaisilaeli vahulili vindu vya mapambu gavi tangu pevawukili ku chitumbi Sinai.

7 Kila lukumbi Musa avii na mvelu wa kutola Lindanda lila na kulivika pavala. Lindanda lenilo alipelili lihina, Lindanda la Msopi. Mundu yoyoha mweigana utepulanisu na Bambu yamganili ahamba ku Lindanda la kukonganekela pavala na kambi. 8 Lukumbi lwoha Musa awukili kuhamba ku Lindanda lenilo, kila mundu ayimili pamlyangu wa Lindanda laki kumlolakesa Musa mbaka payingili mugati ya Lindanda lila. 9 Lukumbi Musa payingila mugati ya Lindanda, nguzo ya lihundi yatulili pamlyangu wa Lindanda na Bambu akalongela na Musa mulihundi lila. 10 Vandu voha pavayiweni nguzo ya lihundi liyimili pamlyangu wa Lindanda la Msopi, kila mmonga wavi ayimili na kumgundamila pamlyangu wa Lindanda laki. 11 Chenicho ndi Bambu chaalongela na Musa mihu kwa mihu, ngati cheilongela mundu na mkozi waki. Kangi Musa awuyili kukambi kula. Nambu msongolo Yoshua mwana wa Nuni mweavi mtangatila waki awukili lepi mu Lindanda.

12 Musa akamjovela Bambu, "Lola! Veve ukunijovela, ‘Valongosa vandu ava,’ Nambu nimanyili lepi mweukumtuma anitangatila. Unijovili, ‘Nikumanyili nene na mewa kuvya niyidakiliwi palongolo yaku.’ 13 Hinu nikuyupa, ngati chakaka niyidakiliwi palongolo yaku, nilangisa njila zaku muni nipata kukumanya na kuyidakiliwa palongolo yaku. Nikuyupa ukumbuka kuvya vandu va mulima uwu ndi vandu vaku."

14 Bambu akajova, "Namwene yati nihamba pamonga na veve, na nikupela sangaluka."

15 Kangi Musa akajova, "Ngati veve wamwene yati uhamba lepi pamonga na tete ndi kotoka kutiwusa pandu apa. 16 Mundu yati nimanya wuli kuvya niyidakiliwi palongolo yaku nene na vandu vaku ngati uhamba lepi na tete? Ukahamba pamonga na tete yati ukutikita nene na vandu vaku kuvya vandu ngavene pagati ya vandu voha pamulima."

17 Bambu akamjovela Musa, "Lijambu leujovili yati nikita muni niganisiwi na veve, na nene nikumanyili bwina."

18 Musa akajova, "Chondi nikuyupa unilangisa ukulu waku."

19 Bambu akamyangula, "Yati nipita palongolo yaku na kukulangisa ubwina wangu woha na kulikokosa lihina langu, kuvya ‘Bambu.’ Nene yati nikumlekekesa mundu mwenimgana na nikumuhengela lipyana yula mwenimganili kumuhengela lipyana. 20 Nambu yati uhotola lepi kunilola muni kawaka mundu yoyoha mweakunilola na kuvya mumi." 21 Kangi Bambu akamjovela Musa, "Kuvi pandu papipi nene, veve yati uyima panani ya litalahu, 22 na ukulu wangu peupita, yati nikuvika pambugu na kukugubika kwa chiwoko changu, mbaka penipita. 23 Kangi yati nikuchiwusa chiwoko changu na veve yati ukuniwona mugongo wangu, nambu pamihu pangu yati ukupawona lepi."