1 Musa akavakemela pamonga Vaisilaeli akavajovela, "Genaga ndi mambu Bambu geavalagazi mgakita: 2 Mumagono sita mhenga lihengu nambu muligono la saba ndi lilgono la kupumulila la kumtopesa Bambu. Mundu yoyoha mweihenga lihengu ligono lenilo iganikiwa akomiwa. 3 Mkotoka kukwetula motu pandu pemwitama Ligono la Kupumulila."

4 Musa avajovili vandu va Isilaeli, "Lenili ndi lijambu levalagizi Bambu mkita lene ndi: 5 Yati muwusa muvindu vinu na kumpela Bambu. Mundu yeyoha mweavi na mtima wabwina yati akumuwusila Bambu, ga zahabu amala ga feza amala ga shaba: 6 Wuzi wa buluu na zambalau na udung'u na chitambala chamsopi weubotiwi na mangoma ga limbelele: 7 Chikumba cha limbelele ligosi chechisopiwi langi yidung'u na chikumba cha mene na mbawu za msonobali, 8 mahuta ga zeituni ndava ya hahi na ndimbilu vyevinungalila ndava ya kutengenezela mahuta gegihengeka kwa lihengu la kuvagula ndava ya Bambu na ubani weunungalila, 9 mashonga gamahele gegikemiwa salidoniki na gangi ndava ya kuvika panani ya nganga na chigubiku chaki."

10 "Mundu yoyoha mwamanyili lihengu bwina pagati yinu yati ibwela kukita vindu vyoha vyealagizi Bambu. 11 Utengeneza Lindanda la Msopi na chigubiku chaki na chechilitindila mumihana na luvecha lwaki na felemu na mapanda gaki na vitamilu vyaki; 12 Lisanduku la Lilaganu na ndonga za kugegela, chigubiku cha pandu pa lipyana, lipazia la pandu pamsopi neju, 13 meza na ndonga za kugegela pamonga na vindu vyaki vyoha, mabumunda gegavikiwi palongolo ya Chapanga 14 vibokoselu na vindu vyaki vyoha, hahi zaki na mahuta gaki, 15 mazabahu ya kuhukisila ubani, na mahuta ndava ya kuvagula vandu na vindu ndava ya Bambu na ubani weunungalila bwina na lipazia la pandu pakuyingilila mu Lindanda la kukonganekela na Chapanga, 16 mazabahu ya luteta lwa kutinyiswa pamonga na wavu wa shaba na mikamulilu yaki na vindu vyaki vyoha na nkeve uvaha wa kusambila shaba na chitamilu chaki, 17 mapazia ga uwa, mapanda gaki na vitamilu vyaki pamonga na lipazia la pandu pakuyingilila muuwa na nyosi zaki, 18 na vikongwani vya lindanda na vya uwa pamonga, 19 na nyula zoha zezilukiwi bwina neju ndava ya lihengu pandu pamsopi, ndi nyula zamsopi za mteta Haloni na vana vaki vagosi ndava ya lihengu lavi la uteta."

20 Hinu vandu voha va Vaisilaeli vakawuka palongolo ya Musa. 21 Mundu yoyoha mweaganisiwi mumtima waki na kukofiwa awusili matoleo kwa Bambu ndava ya Lindanda la kukonganekela na Bambu, lihengu laki na nyula zamsopi. 22 Hinu vandu voha vawusili kwa kugana vene, vagosi kwa vadala vakaleta vipini na pete na mikufu ya kuwala mumagendelu valetili vindu vya zahabu njombi ndava ya Bambu. 23 Mundu yoyoha apeleka chindu cheavi nachu ngati wuzi wa langi ya buluu na chitambala cha msopi na zambalau na gudung'u, na mangoma ga mene na chikumba cha nyilili chechisopiwi langi yidung'u. 24 Mundu yoyoha mwahotwili kuleta ga siliva ga feza na shaba aletili kwa Bambu ngati pandu pa vindu vyaki. Mewa mundu mwavi na mbawu za msonobali aletili. 25 Vadala voha vevahotwili kuluka valetili vindu vyevalukili kwa wuzi wa langi ya buluu na zambalau na udung'u na nyula za msopi weubotiwi. 26 Na vadala voha vevamanyili kubota, vabotili mangoma ga mene. 27 Vachilongosi valetili maganga gabwina ga Sadoniki na maganga gangi ga mashonga gamahele ndava ya kuvika pachizibau na kahaku ka panganga, 28 mewawa valetili mahuta ndava ya hahi na ndimbilu ndava vya kutengenezela mahuta ga zeituni ndava lihengu la ndava ya Bambu na ubani weunungalila bwina. 29 Vaisilaeli voha vagosi na vadala, vevaganili valetili vindu vyenivyo kwa kugana vene palongolo ya Bambu, njombi ya lihengus la Bambu, yeavalagizi kuhenga kupitila Musa.

30 Musa akavajovela Vaisilaeli, "Mlola! Bambu amuhagwili Bezaleli mwana mgosi wa Uli ndi mjukulu wa Huli wa likabila la Yuda. 31 Na mwene ammemisi mpungu waki na ampelili umanya na luhala na uhotola na ufundi wa kutengeneza vindu ndalindali, 32 mweihotola kuhololela miluhumu ya vindu ndalindali na ahengala zahabu na feza na shaba kutengeneza vindu vyenivyo, 33 na kudumula maganga ga mashonga gamahele na kupambila, na kuhongola mbawu ndava ya mahengu gangi goha ga chifundi. 34 Mewawa Bambu avapelili Bezaleli na Oholiabu, mwana wa Ahisamaki wa likabila la Dani uhotola wa kuvawula vangi. 35 Avapelili umanya wa kuhenga lihengu loloha la ufundi wa lihengu la kuhongala lihengu la kutiva na lihengu la kupamba vitambala vya langi yamsopi na langi ya buluu, na langi ya zambalau na langi yidung'u."