1 Bambu akamjovela Musa, "Hamba kwa nkosi. Nene nimkitili kuvya na ndindani pamonga na vatangatila vaki muni nikita milulangisu iyi pagati yavi, 2 na nyenye mbwela kuvakokosela vana vinu na vajukulu vinu, chenavakitili cha ukali Vamisili kwa kukita milulangisu pagati yavi. Hinu yati mwimanya kuvya nene ndi Bambu."

3 Hinu Musa na Haloni vakamuhambila nkosi na kumjovela, "Bambu, Chapanga wa Vaebulania ijova, ‘Yati ubela kuvya mngolongondi palongolo yangu mbaka ndali? Valeka vandu vawuka muni vakanigundamila. 4 Ukabela kuvaleka vandu vangu vawukayi, chilau yati nileta mambalanguli vauzangila mulima waku. 5 Ndima yoha ya Misili yati yigubikwa na mambalanguli ago. Yati gilya kila chindu chechasigalili mufula ya maganga, mewa yati gileka lepi chindu mumikongo yoha yeyasigalili. 6 Mambalanguli ago yati gimema munyumba zaku, munyumba za vatangatila vaku na za vamisili voha, yati givya gamahele hati vagogo vinu vagaweni lepi kutumbula pevatumbwili kutama pamulima uwu.’ " Hinu Musa akawuka kwa nkosi.

7 Vatangatila vaki vakamkota nkosi, "Wu mundu mwenuyu yati akuting'aha mbaka ndali? Valeka vandu ava vahamba vakamgundamila Bambu, Chapanga wavi. Wu, umanyili lepi kuvya mulima wa Misili yimali kuyongomela?"

8 Penapo Musa na Haloni vakemiwi kwa nkosi akavajovela, "Muhamba mukamgundamila Bambu Chapanga winu, nambu nikota, vayani yati vihamba pamonga na nyenye?"

9 Musa akamyangula "Kila mundu, vasongolo na vagogolo, yati tiwuka pamonga na vana vitu, vagosi na vadala, mambelele na mene na ng'ombi, muni tiganikiwa kumkitila mselebuko Bambu."

10 Nkosi akavavevesa Bambu avyai pamonga na nyenye, ngati nikavaleka muhamba pamonga na vadala vinu na vana vinu, chakaka muna maholo gahakau mumitima yinu. 11 Lepi! Nambu vagosi ndu ndi vevihamba kumgundamila Bambu, muni ndi chemwigana. Penapo Musa na Haloni vakavingiwa palongolo ya nkosi.

12 Hinu Bambu akamjovela Musa, "Golosa chiwoko chaku kunani ya mulima wa Misili, mambalanguli gahumila muni gayingila na kulya vyevimeli vyoha pamulima na vyoha vyevyasigalili mufula ya maganga yila." 13 Ndi Musa akayinula ndonga yaki kunani ya mulima wa Misili. Bambu akaleta mpungu kuhuma upandi welihumila lilanga, wabulwime panani ya mulima muhi woha kilu mbaka lukela. Kwepachili mpungu wula waletili mambalanguli. 14 Mambalanguli gala gadandasiki mulima woha wa Misili. Mambalanguli ago gavii gamahele neju, gakatula panani ya ndima yoha, yahumalili lepi kwakona na chihumalila lepi kangi 15 Gagubiki mulima woha wa Misili, hati ndima yawonikini kuvya yititu. Galili vyevimelili vyoha pamonga na matunda goha gegasigalili lukumbi lwa fula ya maganga yila. Kawaka hati lihamba limonga lelasigalili mumikongo mewawa vyevimelili popoha mumulima wa Misili.

16 Penapo nkosi avakemili kanyata Musa na Haloni akavajovela, "Nimbudili Bambu Chapanga winu, na nyenye mewa. 17 Hinu nikuvayupa munilekekesa kubuda kwangu, mala yiniyi ndu mkaniyupila kwa Bambu Chapanga winu, aniwusila litovelu lelileta lifwa." 18 Hinu Musa akawuka kwa nkosi, akahamba kumyupa Bambu. 19 Ndi Bambu akabulumisa mpungu kuhuma kwelitipama lilanga, akagawusa mambalanguli gala na kugakang'ila munyanja ya Shamu. Kawaka hati limbalanguli limonga lelasigalili mumulima woha wa Misili. 20 Nambu Bambu amkitili nkosi kuvya na ndindani neju, avalekili lepi Vaisilaeli vahamba.

21 Bambu amjovili Musa, "Golosa chiwoko chaku kunani muni chitita chivaha chihumila pa Misili, chitita ng'ong'olo na hati mundu nakuhotola kugenda changali kupamisa pamisa." 22 Ndi Musa akayinula chiwoko chaki kunani kwa Chapanga, kukavya na chitita ng'ong'olo neju pa mulima wa Misili woha mulukumbi lwa magono gadatu. 23 Vandu vahotwili lepi kulolana na muyaki mewa kuwuka pandu pevavii kuhamba pandu pangi mulukumbi ulo lwa magono gadatu. Nambu ku Gosheni kwevatamayi vandu va Vaisilaeli kwoha kwavii na lumuli.

24 Kangi nkosi akamkemela Musa akamjovela, "Muhamba kumgundamila Bambu. Vadala na vana vinu vihotola kuhamba pamonga na nyenye. Nambu mambelele na mene na ng'ombi zinu zisigalila."

25 Nambu Musa akamjovela, "Yiganikiwa utileka titola hinyama ya hinyama ya kuwusila luteta na lwa kutinyisa muni tikamuwusila Bambu, Chapanga witu. 26 Mifuya yitu tiganikiwa kuhamba nayu tileka lepi hati chinyama chimonga chisingalila mumbele, muni kwa mumifuya yitu tavete, yati tikamgundamila Bambu Chapanga witu. Timanyili lepi chinyama choki chatikumuwusila Bambu luteta mbaka petihika kwenuko."

27 Nambu Bambu amkitili nkosi kuvya na ndindani neju akabela kuvaleka Vaisilaeli vahamba. 28 Nkosi akamjovela Musa, "Wuka palongolo yangu. Ujiyangalila neju ukotoka kubwela kavili, muni ligono leubwela kangi palongolo yangu, yati wifwa!"

29 Musa akamyangula, "Ena! Ngati cheujovili yati ukunilola lepi kavili."