1 "Yati utengeneza pandu pakuwusila luteta kwa mbawu ya msonobali. Mazabahu kuwusila luteta lweniyo luwanangana utali na upana, utali waki uvya mita zivili na lobo na upana waki mita zivili na lobo na kunyoleka kwaki mita yimonga na lobo. 2 Tengeneza kona panani ya kila mkingisa umonga, muni kona zenizo na mazabahu kuwusila luteta vivya chindu chimonga na kunyala shaba yoha. 3 Yati ukuyitengenezela vindu vyaki, viviga vya lyenge, sepetu na mabilika na mumbele sahani za kugegela motu na nkeve ya kumichila ngasi. Vindu vyaki yoha utengeneza kwa shaba. 4 Kangi yati utengenezela wavu wa waya wa shaba weuna pete mcheche za shaba mupandi zaki mcheche. 5 Waya wenuo yati ukuuvika pamuhana ya mazabahu kuwusila luteta upandi wa pahi muni uhika pagati ya mazabahu kuwusila luteta. 6 Yati utengeneza mikamulilu ya mkongo wa msonobali ya kunyakulila na uhinyala zahabu ndava ya kugegela mazabahu kuwusila luteta na unyala shaba. 7 Mikamulilu yeniyo uyingisa mupete kila upandi wa mazabahu kuwusila luteta, lukumbi lwa kugega. 8 Yati utengeneza mazabahu kuwusila luteta kwa mbawu na yivya na kuhi, ngati chanakulangisi kuchitumbi."

9 "Yati utengeneza uwa wa kutingdila Lindanda la kukonganeka na Chapanga, upandi wa kusini wa uwa yati wivya na waya weutengenizwi kwa nyula za musopi yabwina wewivya na utali wa mita alubaini na mcheche muupandi umonga, 10 Mapanda ga uwa wenuo yati wivya na mapanda ishilini ga shaba gegana vitamilu vya shaba, nambu kila vikovekelu ga mapanda genago yati givya na mapogolo gaki yati givya ga feza. 11 Mewawa upandi wa kasikazini, utali wa lipanzia mita alubaini na mcheche. Yatikwivya na mapanzia pamonga na mapanda gaki ishilini ga shaba, nambu vikovekelu vyaki vivya vya feza. 12 Upandi kwelitipama lilanga wa uwa yati kwivya na lipanzia yeyina utali wa mita ishilini na hivili na mapanda gaki kumi pamonga na vitamilu vyaki kumi. 13 Upandi wa kweliumila lilanga kwekuvili na pandu pa kuyingilila lwa uwa lwenulo yati kuvya na upana wa mita ishilini na hivili. 14 Lipanzia la upandi umonga wa pandu pa kuyingilila yati pivya na upana wa mita sita na yapinga na mapanda gadatu na vitamilu vyaki vidatu. 15 Mewawa upandi wa pili wa pandu pa kuyingilila lipanzia yati chivya na mita sita na yapinga pamonga na mapanda gadatu na matamilu gaki vidatu. 16 Pandu pene pa kuyingilila pa uwa yati livya na lipazia lelina utali wa mita tisa, lelitotiwi kwa wuzi wa langi ya buluu na zambalau na yidung'u na nyula yamsopi yeyitotiwi na mtota mweimanya bwina lihengu laki na kutotela mapambu gabwina. Lipazia lenilo yati likamuliwa na mapanda mcheche na vitamilu vyaki mcheche. 17 Mapanda goha kutidila uwa yati giwunganiswa na felemu za feza, mapogolo gaki yati givya ga feza na vitamilu vyaki yati vivya vya shaba. 18 Uwa wenuwo yati uvya na mita alubaini na mcheche na upana wa mita ishilini na hivili, na kunyoleka kwaki mita zivili na nukuta ishilini na mhanu. Lipanzia laki yati livya la nyula ya msopi yabwina na vitamilu vyaki vya shaba. 19 Vindu vingi vyoha vya Lindanda la kukonganekela vyevihengewa mukila namuna pamonga na vikongwani vyoha na hati vila vya uwa yati vivya vya shaba."

20 "Yati ukuvalagiza Vaisilaeli vakuletela mahuta gabwina ga zeituni ndava ya hahi muni kuvya na hahi zeziyaka lukumbi lyoha. 21 Hinu yati yivya mugati ya Lindanda la kukonganekela kuvala ya pandu pa Pamsopi neju ya lipazia lenilo palongolo ya Lisanduku la uamula na Haloni na vana vaki yati vakuliyunga palongolo yangu kuhumila kimihi mbaka lukela. Lilagizu lenili liganikiwa kulandwa na Vaisilaeli voha, chiveleku hati chiveleku magono goha."