1 Bambu akamjovela Musa, 2 "Vanyambisa vavelekwa vakutumbula vagosi voha, munipela vavelekwa vagosi vakutumbula va Isilaeli na kila mveleka wa kutumbula wa chinyama ndi vangu."

3 Musa akavajovela vandu, "Mulikumbuka ligono ili lemuhumili ku Misili kwemwavili vavanda. Lenili ndi ligono Bambu peavawusili kwenuko kwa chiwoko chaki chechina makakala. Muligono ili mkoto kulya mabumunda gegana hamila. 4 Ligono ili mwehi wa kutumbula weukemiwa Abibu, muwuka pamulima wa Misili. 5 Lukumbi Bambu peakuvahikisa pamulima wa Vakanaani na Vahiti na Vaamoli na Vahivi na Vayebusi, mulima wealapili kwa vagogo vinu kuvya akuvapela nyenye, mulima wabwina weunaludaka lwabwina na yeyifai kwa kudimila mifuya, mganikiwa kuselebuka ligono ili kila mwaka mumwehi uwu wa kutumbula. 6 Mulukumbi lwa magono saba yati mwilya mabumunda gangali hamila, na ligono la saba yati mselebuka kwa kumtopesa Bambu. 7 Mulukumbi ulo lwa magono saba yati mwilya mabumunda gangali hamila. Pakotokuvya na hamila amala mabumunda gegasopiwi hamila pamulima winu. 8 Ligono lenilo la saba yati mukuvajovela vana vinu kuvya, ‘Tikita chenichi ndava ya lijambu leavakitili Bambu peatiwusili pamulima wa Misili.’ 9 Mselebuko wenuwo wivya ngati chindu cha kujikunga mumawoko ginu amala pachiwungi chinu muni yikuvatangatila kujiwula na kulongelela mihilu ya Bambu, muni Bambu avawusili ku Misili kwa chiwoko chaki chechina makakala. 10 Ndava yeniyo yati mwiselebuka mselebuko uwu mulukumbi lwelulagizwi kila mwaka."

11 Musa akayendelela kuvajovela, "Bambu paakuvahikisa ku mulima wa Vakaanani na kuvapela uvya mulima winu ngati chealapili kwinu na vagogo vinu, 12 mganikiwa kumuwusila Bambu kila mveleka wa kutumbula mgosi. Mewa na vaveleka voha vakutumbula va mifuya yinu mapongo yati ginya ga Bambu. 13 Kila mvelekewa wa kutumbula mgosi wa punda yati ukumgombola kwa kulipa mpapakasi wa limbelele, nambu ngati amsangwili lepi yati ukumgombola kwa kumdenya hingu. Kila mveleka mgosi pagati ya vana vinu yati ukumsangula. 14 Mwanakandahi vana vinu vakavakotayi lijambu ili mana yaki kyani, mvajovela, ‘Bambu atiwusili kwa chiwoko cha chechina makakala kumulima wa Misili kwetavili tavavanda. 15 Nkosi wa ku Misili kila peabelili kwa ndindani kutileka tiwuka, ndi Bambu avakomili kila mveleka wa kutumbula pamulima wa Misili, mveleka wa kutumbula wa mundu na hinyama. Hinu nene nikumuwusila Bambu kila mveleka wa kutumbula mweavi lipongo wa mifuya yangu kuvya luteta, na nikuvagombola vana vangu. 16 Chindu chenicho yati chivya ulangisu wa kujikunga muchiwoko chaku amala pachiwungi chaku, kuvya Bambu atiwusili pamulima wa Misili kwa chiwoko chechina makakala.’ "

17 Lukumbi nkosi peavalekili Vaisilaeli vahamba, Chapanga avapitisi lepi njila yeyipitila ku mulima wa Vafilisti, pamonga njila yavaili papipi. Chapanga akajova, "Nigani lepi vandu ava vang'anamusa maholo na kuwuya ku Misili vakamanyai yati yikuvagana kukomana ngondo." 18 Pahala paki Chapanga avapitisi Vaisilaeli njila ya kutindila kupitila kulugangatu na kuhamba ku nyanja ya Shamu. Vaisilaeli vawukili ku Misili kuni vajitendekili kwa ngondo.

19 Musa atolili majege ga Yosefu ngati Yosefu cheavalagazili kwakona kufwa kwaki. Avalapisi Vaisilaeli kuni ijova, "Chapanga peakuvabwelela kuvawusa pamulima apa, muganikiwa kutola majege gangu kuhuma apa pamonga na nyenye."

20 Hinu Vaisilaeli vawukili ku Sukoti, vakagona mumandanda ku Ehamu, pamuhana ya lugangatu. 21 Muhi Bambu avalongolili kunguzo ya lihundi kuvalangisa njila, na kilu avalongolili kunguzo ya motu kuvalangasa, muni vahotola kugenda muhi na kilu. 22 Nguzo ya lihundi katu yalekili lepi kuvalongolela Vaisilaei lukumbi lwa muhi, mewawa nguzo ya motu lukumbi lwa kilu.