1 Yavili mwehi wa datu kuhumila Vaisilaeli pavawukili pamulima wa Misili, ligono lilolo vahikili kulugangatu lwa Sinai. 2 Na vene pevawukili Lefidimu na kuhika kulugangatu lwa Sinai, kwenuko vavikili mandanda papipi na chitumbi Sinai. 3 Ndi Musa akwelili kunani ya Chitumbi kukonganeka na Chapanga.

Penapo Bambu amkemili Musa kuhuma kunani ya chitumbi, akamjovela, chenichi ndi cheukuvajovela vavelekwa va Yakobo na cheukuvajovela Vaisilaeli: 4 "Nyenye mwavene mlolili chanivahengili Vamisili na chanavatolili nyenye ngati limbanga chalitola vana vaki mumagwaba, nikavaleta kwangu, 5 hinu mukayidikila lwami lwangu na kulanda Lilaganu langu, yati mwivya vandu vangu mwenivahagwili pagati ya milima yoha, muni mulima woha ndi wangu. 6 Nenye yati mwivya vandu vangu na kunihengela ngati vamteta pamulima wa Msopi, malovi aga yati ukuvajovelai Vaisilaeli." 7 Kangi, Musa akawuya, akavatola vachilongosi va Isilaeli pamonga na kuvajovela malovi ago geajoviwi na Bambu. 8 Vandu voha vakayidikila kwa pamonga vakajova, "Mambu goha geajovili Bambu yati tikugalanda." Na mwene Musa akamuwuyasila mayangulo ago Bambu.

9 Bambu akamjovela Musa, "Yati nibwela mulihundi lelitopa muni Vaisilaeli vayuwana penilongela na veve na kukusadika magono goha."

Kangi Musa amjovili Bambu chila vandu chevajovili. 10 Bambu akamjovela Musa, "Hamba kwa vandu ukavajovela vajinyambisa lelu na chilau ndava ya kunigundamila na vachapa nyula zavi, 11 na vajitendelekela ndava ya pamalau, muni ligono la datu nene Bambu yati nihuluka panani ya chitumbi Sinai palongolo ya vandu voha. 12 Kangi veve uvavikila vandu m'baka kutindila chitumbi, valapisa vajiyangalila vakoto kukwela kuchitumbi mewa vakotoka kupamisa m'baka waki. Yoyoha mwaipamisa chitumbi, yati ikomewa. 13 Mundu akotoka kumpamisa mundu mwenuyo mweayombwiki mbaka; Yati ikomiwa kwa kutovewa maganga amala nduta avya mundu amala chinyama. Lukumbi ndu lipenenga pelipyulwa vandu voha pevivya papipi kuchitumbi."

14 Hinu Musa akahuluka kuchitumbi na kuvahambila vandu, akavanyambisa ndava ya kumgundamila na vene vakachapa nyula zavi. 15 Kangi akavajovela vandu voha, "Pamalau mujitendekela, mgosi akotoka kugona na mdala."

16 Hinu lukela lwa ligono la datu, wahumalili mbulumo na mbamba na lihundi lelitopa kunani ya chitumbi. Mewa lwami luvaha lwa lipenenga lwayuwaniki na kuvandendemesa vandu voha. 17 Kangi Musa akavalongosa vandu kuhuma pevaikili mandanda, vakahamba kukonganeka na Chapanga, voha vevahambili vayimili pahi ya chitumbi. 18 Chitumbi cha Sinai chagubikwi na lyohi muni Bambu ahulwiki panani yaki mumotu. Lyohi la motu wenuo wakwelili kunani ngati lyohi la litanuli livaha na chitumbi choha chandendimi kwa makakala. 19 Lwami lwa lipenenga lwayonjokisi neju, na Musa alongili na Chapanga, na Chapanga amyangwili kwa lwami lweluvi ngati mbamba 20 Bambu ahulwiki akavya panani ya chitumbi Sinai, akamkemela Musa ahamba kunani, na Musa akakwela kuchitumbi. 21 Kangi Bambu akamjovela Musa, "Huluka ukavabesa vandu voha vakoto kubwela kunilola, ngati lepi vamahele yati vifwa. 22 Hati vateta veviganikiwa kunihegelela vajinyambisa ndava ya kunigundmila ngati lepi yati nikuvakoma."

23 Musa akamjovela Bambu, "Vandu ava vihotola lepi kukwela chitumbi Sinai muni veve watijovili tivika m'baka kutindila chitumbi."

24 Bambu akajova, "Huluka pahi kangi ubwela na Haloni. Nambu vateta na vandu vangi vakoto kukupuka mbaka na kubwela kwa nene, ngati lepi yati nikuvabula." 25 Ndi Musa akahuluka na kuvajovela Vaisilaeli mambu goha gealagizwi na Bambu.