1 Bambu akamjovela Musa, 2 "Vajovela Vaisilaeli vaniwusila luteta, na veve yati upokela pahala pangu. Upokela luteta lwolwoha lweiwusa mundu yoyoha kwa mtima wabwina. 3 Yati upokela vindu ivi: Zahabu na feza na shaba, 4 wuzi wa buluu na zambalau na zidung'u, pamonga na wuzi wa zamsopi yeyibotiwi na chikumba nyililili, 5 chikumba cha limbelele ligosi chechibakiwi langi yidung'u na chikumba nyililili na mbawu za musonobali, 6 mahuta ga zeituni ndava ya hahi, vindu vya kutengenezela mahuta ga kunyambisila na ndava ya ubani weunungalila bwina, 7 vindu vya maganga ga mashonga ga mahele gegikemiwa sadoniki na vindu vingi ndava ya mapambu ga nyula ya panganga ya mteta na kahaku ka panganga. 8 Mewawa Vaisilaeli vanitengenezela Lindanda la Msopi, muni nitama pagati yavi. 9 Utengeneza Lindanda lenilo na vindu vyaki kulandana luhumu wenikulangisa."

10 "Vaisilaeli vatengeneza Lisanduku la mbawu za msonobali, lelina utali wa sendimita miya yimonga na kumi, na upana sendimita sitini na sita na kunyoleka sendimita sitini na sita. 11 Unyala Lisanduku lenilo zahabu yabwina mugati na kuvala, na kuvika ukingu wa zahabu mumihana yaki pandi zoha. 12 Kangi ulitengenezela pete na kuwalika mumagendelu gaki mcheche, kila chigendelu pete yimonga. 13 Yati utengeneza ngoda zivili za msonobali na kunyala zahabu. 14 Ngoda zenizo yati uyingisa mupete zezivili pandi zivili za Lisanduku, ndava ya kugegela. 15 Mikongo yeniyo yikoto kuwusiwa mupete, yisigalila magono goha. 16 Kangi mugati yaki vika vibawu vivili vya maganga vyeviyandikwi kulangisa mihilu."

17 "Kangi yati utengeneza kwa zahabu yabwina chigubiku cha Lisanduku mewa chikemiwa chigoda cha ulekekesa, utali waki sendimita miya yimona na kumi na upana waki sendimita sitini na sita. 18 Yati utengeneza mewa luhumu lwa viumbi mumi vivili vyevina magwaba kwa kuhuva zahabu, univikila mumhana ya chigubiku chenicho, 19 kiumbi chimonga kumwishu na chingi kumwishu wungi. Univikila viumbi vyenivyo mumihana ya chigubiku chenicho na vivya chindu chimonga na chigubiku. 20 Viumbi vyenivyo vilolana, magwaba gavi gakunjwiki kugubika chigoda chenicho cha utepulanisu, pamihu pavi pilola kulanda chigubiku chenicho. 21 Mugati ya Lisanduku lenilo yati uvika vibawu vivili vya maganga vyeviyandikwi na kuvika chigubiku cha utepulanisu panani yaki. 22 Nene yati nikonganeka na veve penapo, na kuhumila panani ya chigubiku chenicho cha utepulanisu pagati ya viumbi vivili vyevili na magwaba gegavii panani ya Lisanduku la Lilaganu, yati nilongela na veve na kuwupela malagizu goha ndava ya Vaisilaeli."

23 "Yati utengeneza meza ya mbawu ya msonobali yeyina utali wa sendimita semanini na nane, upana waki sendimita alubaini na mcheche na kunyoleka kwaki sendimita sitini na sita. 24 Meza yeniyo yati ukuyigubika kwa zahabu yabwina na kutindisila ukingu wa zahabu. 25 Kangi yati utindisila ukingu wa weuna upana wa sendimita sitini na sita. 26 Yati ukuyitengenezela pete mcheche za zahabu na uziwalika kila pandi pa magendelu gaki. 27 Pete zenizo yati zivya papipi na ukingu weutindili meza na yati zikamulila mikamulilu ndonga zila za kugegela meza yeniyo. 28 Yati utengeneza ngoda zivili kwa mikongo ya msonobali na kugubika zahabu ndava ya kugegela meza yeniyo. 29 Yati utengeneza sahani na lumbani na hikombi vya kuvikila ubani pameza, mewa vihulu na nkeve za kusopela luteta lwa mnyweso. Vyoha vyenivyo uvitengeneza kwa zahabu yabwina. 30 Uvika mabumunda panani ya meza."

31 "Yati utengeneza chibokoselu cha hahi kwa zahabu yabwina. Chitamilu chaki na lungoda lwa chituvilu chenicho yati vivya chindu chimonga, mewawa na vikombi vyaki, vikonyo vyaki na maluva gaki vyoha vifukutwa kwa chipandi chimonga ndu cha zahabu. 32 Mambanda sita yati gihumalila pandi zoha za lumbagalu lwaki, mambanda gadatu upandi umonga na mambanda gadatu upandi wungi. 33 Mukila limbanda limonga mumambanda ago sita yati kwivya na hikombi vidatu luhumu lwa maluva ga mlozi, kila limonga na chikanyo na liluva laki. 34 Pagati ya chindu cha kuvikila hahi pene yati pivya na vikombi mcheche luhumu lwa maluva ga mlozi, pamonga na vikonyo vyaki na maluva gaki. 35 Pandu pepihumila kila limbanda pamambanda sita gala, pahi yaki yati kwivya na chikonyo chimonga chimonga. 36 Vitumba vyenivyo na mambanda gaki yati givya chindu chimonga na chitamilu chenicho, na choha vifukwiti kwa zahabu yabwina. 37 Kangi tengeneza hahi saba ndava ya chindu cha kuvikila hahi na kuvika panani yaki muni zilangasa cha kulongolo. 38 Mewa chibanilu chaki na nkeve kwa zahabu yabwina. 39 Hengela kilo selasini na mhanu za zahabu yabwina kutengeneza chitamilu chenicho na vindu vyaki. 40 Yangalila utengenezayi kuwanangana ngati chewalangiswi kuchitumbi kula."