1 Bambu akamjovela Musa, "Mbwela kwa nene veve na Haloni, na Nadabu na Abihu, pamonga na vagogo sabini va Isilaeli, munigundamila kuni muvi kutali. 2 Veve Musa nga wamwene ndi yati ukunihegelela papipi, nambu vangi vakotoka kubwela papipi na Vaisilaeli vakotoka kukwela kuchitumbi pamonga na veve."

3 Hinu Musa akahamba kuvajovela vandu voha malovi na malagizu geajoviwi na Bambu, vandu voha vayangwili kwa lwami lumonga, "Yati tikugalanda mambu goha geajovili Bambu." 4 Musa ayandiki malagizu goha geapewili na Bambu. Ndi ayimwiki lukela pehe, ndi akajemga mazabahu pahi ya chitumbi na kuyimamisa lipanda kwa maganga kumi na gavili kulandana na makabila kumi na gavili ga Isilaeli. 5 Kangi akavatuma vasongolo va Vasilaeli vamuwusila luteta lwa kutinyisa, na luteta lwa kuhanganila kwa Bambu. 6 Musa akanega ngasi yapinga ya hinyama yila na kuvika mumankeve, na yapinga yingi amichili mazabahu. 7 Kangi akatola chitabu cha Lilaganu la Bambu akasoma lwami luvaha palongolo ya vandu. Vakajova, "Ago goha geajovili Bambu, yati tikugahenga lihengu, na tete yati tivya tavandu veviyidakila."

8 Musa akatola ngasi yila na kuvamichila vandu, akajova, "Yeniyi ndi ngasi ya Lilaganu leakitili Bambu pamonga na nyenye kulandana na malovi aga goha."

9 Ndi kangi Musa na Haloni na Nadabu na Abihu na vagogo sabini va Isilaeli vakakwela kuchitumbi, 10 vamuweni Chapanga wa Isilaeli. Pahi ya magendelu gaki palolikini ngati sakafu ya maganga ga samawati, kwavii ngati kunani kwekwilangala. 11 Nambu Chapanga avakitili lepi chindu chihakau vachilongosi va Vaisilaeli. Vamuweni Chapanga, valili na kunywa.

12 Bambu akamjovela Musa, "Bwela kwa nene kunani ya chitumbi, ulinda kwenuko. Nene yati nikupela vibahu vivili vya maganga vyevina mihilu na malagizu zezayandikwi ndava ya kuvawula Vaisilaeli." 13 Hinu, Musa akawuka pamonga na Yoshua, mtangatila waki, akahamba kuchitumbi cha Chapanga. 14 Musa akavajovela vagogo vala, "Mutilindila penapa mbaka petikuvawuyila. Haloni na Huli vavili pamonga na nyenye, yoyoha mwana lijambu avahambila venavo."

15 Hinu Musa akahamba kuchitumbi na lihundi livaha lagubiki chitumbi. 16 Ukulu wa Bambu wahulwiki panani ya chitumbi Sinai na lihundi lagubiki chitumbi mumagono sita. Ligono la saba Bambu amkemili Musa kuhumila mulihundi lila. 17 Na ung'asima wenuwo wa Bambu waloliki palongolo ya mihu ga vandu va Isilaeli ngati motu weuyaka panani ya Chitumbi. 18 Kangi Musa akayingila mulihundi lila, akakwela kuchitumbi. Akatama kwenuko magono alubaini, muhi na kilu.