1 "Genaga ndi malagizu geukuvapela Vaisilaeli. 2 Ngati ukamgula mvanda wa Chiebulania, yati akuhengela kwa miyaka sita ndu, nambu mwaka wa saba yati ukumleka awuka changali kulipa chochoha. 3 Ngati aguliwi kwakona angagega mdala, yati iwuka mwene, nambu ngati abwelili na mdala yati iwuka na mdala waki. 4 Ngati mkulu waki amgegisi mdala na kumvelekela vana vagosi amala vadala, ndi mdala mwenuyo na vana vaki yati vivya va mkulu waki na mvanda yati iwuka mwene. 5 Nambu ngati mvanda mwenuyo akajova amganili mkulu waki na mdala waki na vana vaki na agani lepi kuwuka muuvanda, 6 ndi mkulu waki yati akumleta pandu pakumyupila Chapanga. Kangi yati akumyimika pamlyangu amala pamkingisa wa mlyangu na kumbowola likutu laki kwa lusungulu, ndi yati akumhengela mkulu waki magono goha."

7 "Ngati mundu akamgulisa msikana waki kuvya mvanda, mwenuyo yati ilekewa lepi muuvanda ngati vavanda va chigosi. 8 Yikavya mkulu mwenuyo amgulili avya mmonga wa vadala vaki kangi aganiswi lepi nayu, mkulu mwenuyo yati akumuwuyisa kwa dadi waki mvanda mwenuyo amgombolayi. Mkulu mwenuyo iganikiwa lepi kumgulisa kwa vayehe, ndi ivya akumhengela uhakau. 9 Ngati akamgula mvanda mdala na kumpela msongolo waki ndi akita ngati cheakumkitila msikana waki. 10 Ngati mundu mwenuyo akagega mdala yungi avya madala waki, iganikiwa kumuhengela gegiganikiwa kwa mdala waki wa kutumbula, ndi chakulya na nyula na ampela mambu ga muhiga. 11 Ngati mkulu mwenuyo itimilisa lepi mambu ago gadatu, ndi mdala wa kutumbula ihotola kuwuka changali kulipa chochoha."

12 "Yeyoha mweakumtova mundu mbaka kumkoma iganikiwa akomiwa. 13 Nambu ngati yihumalili changagana nambu maganu ga Chapanga, mkomaji mwenuyo yati itilalila pamiji yenikuyihagula kwenuko yati ikomiwa lepi. 14 Nambu mundu akamzangila muyaki chakugana na kumkoma, hati ngati akatilila pandu pangu pakuwusila luteta, ndi mumuwusa na kumkoma."

15 "Yeyoha mweakumtova dadi waki amala nyina waki yiganikiwa akomewa."

16 "Yeyoha mweakumtola mundu kwa makakala na kumgulisa amala kumkita mvanda waki yiganikiwa akomewa."

17 "Yeyoha mwakumpela likoto dadi waki amala nyina waki yiganikiwa akomiwa."

18 "Vandu vavili vakatovana, na mmonga akamtova muyaki liganga amala ngumi changali kufwa nambu akamlemasa na kumkita alwala na kugona pachitanda, 19 ngati mundu uyo mwatoviwi akalama na kuhotola kuchipila kwa mkongojo yula mwamlemisi yati ilekekeswa. Nambu yati akumlipa yula mwealemili, ndava ya lukumbi lweayagisi peavii mukulwalila na iganikiwa kumlwasa mbaka alama."

20 "Ngati mundu akamtova mvanda waki mgosi amala mdala kwa ndonga na kumkoma bahapo, yiganikiwa abuniwa. 21 Nambu mvanda mwenuyo akasigalila mumi ligono limonga amala gavili mkulu waki yati ibuniwa lepi, muni mvanda yula ndi waki."

22 "Ngati vagosi vakatovana na kumlemasa mau mweavi na ndumbu, na ndumbu yaki yakahalabika changalemaswa pandu pangi, yula mwamlemisi yati ilipiswa ngati cheigana mgosi waki mewa ngati muhamula mihalu cheijova. 23 Nambu ngati alemiswi neju mwealemisi yiganikiwa alemaswa ngati chealemisi, 24 Ngati alemisi lihu namwene alemeswa lihu ngati alemiswi linu namwene alemeswa linu na ngati alemisi chiwoko namwene alemeswa chiwoko na ngati alemisi chigendelu namwene alemeswa chigendelu, 25 kuyochwa motu kwa kuyochwa motu amala livamba kwa livamba amala mbunu kwa mbunu."

26 "Mundu akamtova palihu mvanda waki mgosi amala mdala na kulemasa lihu laki, yiganikiwa amlekelela ahamba changalipa lwenulo ndi ngati luhuna lwa lihu laki. 27 Mewawa akamtova na kumdenya linu mvanda waki mgosi amala mdala, yiganikiwa amaleka ahamba lwenulo ndi ngati luhuna lwa linu laki."

28 "Ng'ombi yigosi yikamtova mundu na ling'elu na kumkoma, ng'ombi yeniyo yati yikomewa kwa kotovewa maganga na nyama yaki yati yiliwa lepi. Mkolo ng'ombi mwenuyo yati ilungamikiwa lepi. 29 Nambu ngati ng'ombi yeniyo yiyovalili kutova vandu na mang'elu, na mkolo ng'ombi ajoviwi akunga nambu ikungalila lepi, hinu ngati yeniyo yikakoma mundu yiganikiwa yikomiwa kwa maganga, na mkolo ng'ombi yiganikiwa akomiwa mewa. 30 Hati naha ngati mundu mwenuyo vakamlipisa ndava ya kusangula wumi waki, ndi yiganikiwa alipa chindu choha cheajoviwi alipa. 31 Ng'ombi yikamtova ling'elu mwana wa mundu yungi, matakilu genaga yati gihamuliwa munjila yilayila. 32 Ngati ng'ombi yeniyo yikamtova ling'elu mvanda mgosi amala mdala, mkolo ng'ombi yati akumlipa mkulu wa mvanda mwenuyo hipandi selasini ya feza, na ng'ombi yeniyo yiganikiwa yikomewa kwa kutovewa maganga."

33 "Ngati mundu akawusa chigubiku palilindi changadiva, amala akagima lilindi changadiva na ng'ombi amala punda yikadumbulila mwenumo, 34 mkolo lilindi mwenuyo iganikiwa alipiswa, amlipa mkolo hinyama mashonga na chinyama chechifwili chivya cha mkolo lilindi. 35 Ngati ng'ombi yigosi ya mundu yikayilemasa ng'ombi yigosi ya mundu yungi na kuyikoma, ndi vagulisa ng'ombi yeyivi mumi na kugavana mashonga gaki, mewawa vagavana na nyama ya ng'ombi yeyifwili yila. 36 Nambu ngati ng'ombi yeniyo yiyovalili kutova vangi mang'elu na mwene akuyikunga lepi, mwenuyo yati ilipa ng'ombi kwa ng'ombi na yila yeyikomiwi yati yivya yaki."