1 "Genaga ndi mambu geukumuhengela Haloni na vana vaki muni kunyambisa ndava ya kunihengela ngati vamteta. Yati utola mpapakasi mmonga wa ng'ombi na mambelele gagosi gavili gangali chilema chochoha, 2 mabumunda gangali hamila na mambama gangali hamila gegatenganizwi kwa mahuta na mabumunda gadebegadebe yangali hamila gangatengenezwa kwa mahuta, nambu vanyalili mahuta ndu. Vyoha vyenivyo vivya vyevatenganizi kwa uhembe wa nganu yabwina. 3 Kangi vika mabumunda ago muchidengu chimonga na kuniwusila luteta lukumbi lumonga na mpapakasi wa ng'ombi yigosi na mambelele gavili gala."

4 "Ndi uvapeleka Haloni na vana vaki pandu pakuyingilila pa Lindanda la Msopi na kuvanyambisa. 5 Kangi utola nyula zila za uteta umuwalika Haloni, likoti litali na ligwanda litali na nyula ya kugubika nganga pamonga na nyula ya panganga na kumkunga mkungi weubotiwi bwina. 6 Umuwalika chinyemba kumutu na uvika njigwa yeyivi na chibati chechiyandikwi chikulu panani ya chinyemba. 7 Ukamala kukita chenicho, tola mahuta gala ga kunyala umyitalila Haloni kumutu waki muni kumvika palongolo ya Bambu."

8 "Kangi uvaleta vana vagosi va Haloni na kuvawalika ligwanda litali. 9 Yati ukuvakunga mikungi muchiwunu na kuvawalika kofia mumitu yavi. Chenicho ndi chaukuvanyambisa Haloni na vana vaki muuteta. Venavo na viveleku vyavi yati vivya vamteta magono goha."

10 "Kangi mleta mpapakasi wa ng'ombi yigosi palongolo ya Lindanda la Msopi, Haloni na vana vaki yati vivika mawoko gavi panani ya mutu wa mpapakasi mwenuyo. 11 Na kuhinja palongolo ya Bambu, pandu pa kuyingilila wa Lindanda la Msopi. 12 Yati utola ngasi yidebe na kunyala muchitamilu cha pandu pa kuwusila teta kwa lungoji lwaku, na ngasi yoha yeyisigalila yati ukuyiyitalila mazabahu. 13 Kangi yati utola mahuta goha gegigubika matumbu, chipandi cha pai cha chibindi na figo zivili na mahuta gaki, utinyisa vyoha panani ya pandu pakuwusila luteta. 14 Nambu nyama ya chinyama chenicho na chikumba chaki na matumbu gaki uviyocha kuvala na pemwitama. Lwenulo ndi luteta lwa kuwusa mabudilu ga vamteta."

15 "Kangi tola limbelele limonga pagati ya gala gagosi na umjovela Haloni na vana vaki vagosi vavika mawoko panani ya mutu waki. 16 Uhinja limbelele lenilo na ngasi yaki uyitilila pandi zoha za pandu pakuwusila luteta. 17 Dumula hipandi hipandi limbelele lenilo, sanja vindu vya mugati na magendelu gaki, vika vyoha pamonga na mutu na hipandi hingi. 18 Kangi yocha limbelele lenilo panani ya pandu pakuwusila luteta muni kuniwusila luteta lwa kutinyisa. Na kunungalila kwa luteta lweluwusiwa kwa kutinyiswa kwa motu ndi yikumganisa nene Bambu."

19 "Tola limbelele lingi lila na Haloni na vana vaki vavika mawoko panani ya mutu waki. 20 Yati uhinja na kutola ngasi na kumnyala Haloni na vana vaki mumihana ya makutu gavi na mulugumba lwa chiwoko cha kulyelela lugumba lwa chigendelu cha kulyelela, na ngasi yeyisigalila yati ukuyiyitila pandu pakuwusila luteta. 21 Kangi yati utola ngasi yidebe pandu pakuwusila luteta pamonga na mahuta ga kunyala umyitalila Haloni na nyula zaki, uvayitalila mewa vana vaki vagosi na nyula zavi. Haloni na vana vaki pamonga na nyula zavi penapo vivya vahaguliwi ndava yangu."

22 "Tola mahuta ga limbelele ligosi, mkila waki, mahuta gegavili mumatumbu na muhibindi na figo zaki zivili na mahuta gaki pamonga na liwondo la upandi wa kulyelela. Limbelele lenilo ndi ndava kuvavika ndava yangu Haloni na vana vaki kwa lihengu la Bambu. 23 Kuhuma mulidengu la mabumunda gangali hamila lelivili palongolo ya Bambu, tola mabumunda na limbama limonga vyevisopiwi mahuta na libumunda lidebe limonga. 24 Vyoha vyenivyo umgotolela Haloni na vana vaki, mjovela Haloni ayinula kunani nyugusa ngati luteta lwa kunyuguswa. 25 Kangi yati utola vyoha kuhuma mumawoko gavi na kuyocha panani ya pandu pakuwusila luteta pamonga na luteta lwa kutinyisa, yivya kunungalila kwekuniganisa nene Bambu. Lwenulo ndi luteta lweluwusiwa kwa motu."

26 "Kangi tola nganga ya limbelele lenilo na kumnyambisa Haloni ndava ya Bambu, mjovela Haloni ayinula kunani anyugusa ngati luteta wa kunyugusa ya nene Bambu. Nganga yeniyo yati yivya pandu paku."

27 "Mteta peihaguliwa kwa lihengu la Bambu, nganga na liwondo la limbelele ligosi la kunyambisila yati viletwa palongolo yangu kwa kukita ulangisu wa kuniwusila, yvenivyo vivya vya Haloni na vana vaki. 28 Hinu Vaisilaeli magono goha yati vitola nganga na liwondo kuhuma muluteta lwavi lwa kuhanganilana nene zevakuniwusila Chapanga na kumpela Haloni na vana vaki. Lilagizu lenilo yati ling'anamuka lepi."

29 "Peifwa Haloni, nyula zaki za msopi yati vigotolewa vachiveleku vaki, ni vene yati viwala ligono lavi la kunyalwa mahuta na kuvikiwa mawoko. 30 Mwana wa Haloni mweivya mteta pahala pa dadi waki yati iwala nyula zenizo magono saba mu Lindanda la kukonganekela na Bambu, ndava ahengelela pandu pa msopi."

31 "Yati utola nyama ya limbelele ligosi mweahinjiwi ndava kuvanyambisa Haloni na vana vaki na kuyivilisila pauwa popoha pepahaguliwi mugati ya uwa wa Lindanda. 32 Kangi uvapela Haloni na vana vaki valya pamlyangu wa Lindanda la kukonganekela pamonga na mabumunda gegasigalili mulidengu. 33 Yati vilya vindu vyenivyo vyevihengiki kunyambisila ndava ya kutepulanisa, nambu mundu yungi iganikiwa lepi kulya muni ndi vyamsopi. 34 Ngati nyama yoyoha amala mabumunda yikasigalila mbaka lukela ndi vitinyiswa pa motu, mkoto kulya muni vyamsopi."

35 "Chenicho ndi cheukuvahengela Haloni na vana vaki kulandana na goha gala genavalagizili, yati ukuyihagula ndava ya Bambu mumagono saba. 36 Kila ligono yati uwusa mpapakasi wa ng'ombi yigosi yivya luteta lwa kuwusa mabudilu muni kukita utepulanisu, na kwa kukita chenicho ukuyinyambisa pandu pakuwusila luteta, ndi kangi yati ukuyiyitalila mahuta ga zeituni muni uyihagula ndava ya Bambu. 37 Mumagono saba kita utepulanisa ndava ya pandu pakuwusila lutetamuni yivya yamsopi. Pagena pandu pakuwusila luteta yati yivya yamsopi neju na chochoha chechikuipamisa pandu pakuwusila luteta chivya chamsopi."

38 "Kila ligono, na lukumbi lwelubwela yati uwusa luteta panani ya pandu pakuwusila luteta mipapakasi wa limbelele hivili va mwaka umonga. 39 Yati uwusa mwanalimbelele mmonga lukumbi lwa lukela na yungi kimihi. 40 Pamonga na mpapakasi limbelele wa kutumbula, yati uwusa vibaba vivili vya uhembe wa nyililili weuhangasini na lijagi limonga. Leta na mahuta gabwina ga zeituni, na lijagi limonga la divayi ndava vivya luteta. 41 Mewawa na mpapakasi wa limbelele yungi wa kimihi yati ukumuwusa luteta pamonga vibaba vivili vya uhembe nyililili na lijagi limonga la mahuta ga zeituni na divayi lijagi limonga ngati chewakitili lukela. Zenizo ndi teta za kutinyisa zeziganikiwa kuniwusila nene Bambu na mnungalilu waki ukuniganisa. 42 Luteta ulu lwa kutinyisa luwusiwa magono goha, chiveleku hati chiveleku palongolo ya nene Bambu. Pamlyangu wa Lindanda la kukonganekela ndi nene yati nikonganeka na nyenye na kulongela na nyenye. 43 Penapo ndi yati nikonganeka na Vaisiaeli na ukulu wangu yati ukupakita pandu penapo pavya pamsopi. 44 Lindanda la Msopi la kukonganekela na Bambu na pandu pakuwusila luteta yati nikuvikita vivya vikulu, mewawa Haloni na vana vaki vagosi yati nikuvanyambisa vavya vamteta. 45 Yati nitama pagati ya Vaisilaeli, na nene yati nivya Chapanga wavi. 46 Na vene yati vimanya kuvya nene ndi Bambu wavi mwanivawusili kuhuma mulima wa Misili, muni nitama pagati yavi."