1 Kangi Bambu akamjovela Musa, "Hamba kwa nkosi ukamjovela kuvya nene Bambu, Chapanga wa Vaebulania, nijova, ‘Valeka vandu vangu vahamba muni vakanigundamila. 2 Ngati ukabela kuvalekelela vahamba, 3 yati niyinula chiwoko changu na kuleta utamu uhakau neju panani ya mifuya yinu yoha. Ndi ng'ombi na falasi na punda na ngamiya na mene na mambelele. 4 Ndi yati nikuyilekenganisa mifuya ya Vaisilaeli na Vamisili, na kawaka hati chinyama chimonga cha Vaisilaeli chechifwa.’ " 5 Bambu akavika lukumbi na akajova, "Chilau nene Bambu yati nikita lijambu lenili pamulima wa Misili."

6 Chilau yaki Bambu akakita ngati cheajovili. Mifuya yoha ya Vamisili yafwili, nambu kawaka hati chinyama chimonga cha Vaisilaeli chechafwili. 7 Nkosi akakotakesa kuvala hinyama ya Vaisilaeli, vakamjovela kawaka hati chinyama chimonga chechifwili. Pamonga na ago nkosi asigalili kuvya na ndindani avalekili lepi Vaisilaeli vawuka.

8 Bambu akamjovela Musa na Haloni, "Mtola chiganja chimonga cha malyenge kuhuma pachihinja, na Musa akajugumila kunani palongolo ya nkosi. 9 Malyenge genago yati gidandasika ngati lububu pamulima woha wa Misili. Ndi yati gileta maputi gegitumbuka na kuvya hilonda kwa vandu na hinyama." 10 Ndi vakayola malyenge pachihinja, vakayima palongolo ya nkosi. Musa akajugumila malyenge ago kunani, na gene gakaleta maputi na kukita hilonda kwa vandu na hanyama. 11 Vahavi vahotwili lepi kujilangisa palongolo ya Musa, muni vene pamonga na Vamisili voha vazangiwi na maputi ago. 12 Nambu Bambu amkitili nkosi avyai na ndindani neju, na mwene avayuwanili lepi, ngati chila Bambu chamjovili Musa.

13 Kangi Bambu akamjovela Musa, "Chilau yimuka hambakucha na umuhambila nkosi, umjovela nene Bambu, Chapanga wa Vaebulania, nijova ‘Valeka vandu vangu vahamba vakanigundamila. 14 Nambu hinu, ngati ukita lepi yati nikubuna veve na vatangatila vaku. Na veve yati umanya kuvya kawaka pamulima mweavii ngati nene. 15 Ndava muni lukumbi ulu nganimali kukuyongomesa veve na vandu vaku kwa utamu uhakau neju. 16 Nambu nikulekili utama mumi muni nihotola kulangisa makakala gangu muni vandu voha va pa mulima vaumanya ukulu wangu. 17 Wakona ulangisa ndindani yaku palongolo ya vandu vangu, uganili lepi kuveleka vawuka. 18 Hinu chilau, lukumbi ngati ulu yati nitonyesa fula yivaha ya maganga yangahumila pa Misili, tangia kutumbukana kwa mulima wenuwu mbaka lelu. 19 Ndava yeniyo lagiza mifuya yaku na chochoha chechivii kumigunda uko chivikiwa muchivaya chabwina, muni kila chindu chechivili kuvala yati chifwa yikavyai vandu amala mifuya.’" 20 Pagati ya vatangatila va nkosi vagayuwanili malovi ago ga Bambu, vakapeleka vavanda na mifuya yavi kunyumba kuchivaya. 21 Nambu vala vevalivevisi linenu la Bambu vavalekili vavanda vavi na mifuya yavi kumigunda.

22 Kangi Bambu akamjovela Musa, "Yinula chiwoko chaku kunani kwa Chapanga, muni fula ya maganga yitonya kila pandi pamulima wa Misili. Yimtonyela mundu, chinyama na kila chechimelili kumgunda." 23 Ndi Musa akalangisa ndonga yaki kunani kwa Chapanga. Ndi Bambu aletili fula ya maganga na mbulumo, mbamba lwatovili mulima. Bambu ayitonyisi fula ya maganga pamulima woha wa Misili, 24 ndi yikatonya fula yivaha ya maganga yeyalandini na mbamba na mbamba kuni na kula, yanga humila kwakona mulima wenuwu wangatumbula. 25 Fula ya maganga yeniyo yahalabisi kila chindu mumigunda ya kila pandu pamulima wa Misili. Mewawa yakomili hinyama na vandu, mewa fula ya maganga yadenyili vindu vyevimelili vyoha na mikongo yoha. 26 Lijambu lenilo lakitiki pamulima woha wa Misili nambu lepi pandu pepikemelewa Gosheni pevatamayi Vaisilaeli, kwenuko kwavili lepi na fula ya maganga.

27 Ndi nkosi alagizi vakemiwa Musa na Haloni, akavajovela, "Lukumbi ulu nimbudili Bambu mweangabuda, nene na vandu vangu tibudili. 28 Mumyupa Bambu muni mbulumo na fula ya maganga yiketukayi. Nene yati nikuvaleka muwuka mkoto kutama neju penapa."

29 Musa amjovili nkosi, "Penihuma ndu kuvala ya muji yati nigolasa mawoko kunani kumuyupa Bambu. Mbulumo yati uleka na yati kwivya lepi na fula ya maganga muni umanyayi kuvya mulima woha wenuwu ndi waki Bambu. 30 Nambu nimnyili kuvya veve na vatangatila vaku mukumyogopa lepi Bambu Chapanga."

31 Mimea yakutengenezela nyula na shayili vyoha vyahalabiki, muni shayili yamali kukangala, na mimea ya kutengenezela nyula yavili na maluva. 32 Nambu nganu na zingi zeziwanangana zahalabiki lepi muni zavi zakona zangakula na zikavilwa kubenwa.

33 Hinu, Musa akawuka panyumba ya nkosi, akahamba kuvala ya muji. Ndi akayinula mawoko gaki kumyupa Bambu. Mbulumo na fula ya maganga yikaketuka kutonya pamulima. 34 Nambu nkosi pealolili fula ya maganga na mbulumo viketwiki, awuyalili kubuda kwaki akavya na ndindani mwene pamonga na vatangatila vaki. 35 Hinu ngati Bambu cheamjovili Musa, nkosi akavya na ndindani akabela kuvaleka Vaisilaeli vahamba.