1 "Mundu akayiva ng'ombi amala limbelele na kuhinja amala kugulisa, yati ilipia ng'ombi mhanu mukila ng'ombi, na mambelele mcheche mukila limbelele. 2 Muhiji akakamuliwa kilu idenya nyumba, akatovewa mbaka kufwa, mweakomili ivya lepi na matakilu ga kukoma. 3 Nambu muhiji mwenuyo akakamuliwa lukumbi lilanga lihuma na kukomewa, mweamkomili yati ivya na matakilu muni muhiji mwenuyo aganikiwi alipa. Ngati avi lepi na chindu cha kulipa, hinu mwene yati iguliswa kulipa peayivili."

4 "Ngati chinyama chikapatikana mumi kwa muhiji mwenuyo, ndi muhiji yiganikiwa kulipa mala zivili, yivya ng'ombi amala punda amala limbelele."

5 "Ngati mundu akadima chinyama chaki chikalya mumgunda wa mizabibu amala kudima chinyama chaki kulya mumgunda wa mundu yungi, yati ilipa asala ya mabenu gabwina kuhuma kumgunda waki amala kumgunda waki wa mizabibu."

6 "Mundu akayocha motu kusangila na motu wenuwo ukadandasika na kutinyisa mikongo na minga amala mabenu ga mundu yungi gegavii gakona kubenwa, amala mgunda woha ukatinyika, mwayochili motu wenuwo yiganikiwa kulipa vyoha vyevitinyiki."

7 "Mundu akamlekela muyaki mashonga amala vindu vingi vya mashnga gamahele amyangalilayi, na vikayiviwa munyumba yaki, muhiji akakamuliwa yiganikiwa alipa mala zivili. 8 Nambu muhiji ngati angapatikana, mkolo nyumba abwela kwa vahamula mihalu ndava ya kulapa kuvya mwene ndi lepi muhiji wa vindu vya muyaki."

9 "Pakavya na chindu chechivi na ndindani kuvala ng'ombi amala punda amala mambelele amala nyula amala chindu chochoha chechiyagili na kila mmonga ijova chaki, voha viganikiwa vapelekwa palongolo ya vahamula mihalu. Na yula mwelolekana kuvya amhokili muyaki yati iganikiwa amlipa mala zivili."

10 "Mundu akampela muyaki punda amala ng'ombi amala mambelele amala chinyama chingi chochoha amfuyila, na chinyama chenicho chikafwa amala kulemala amala kutoliwa changali yoyoha kulola, 11 chilapu palongolo ya vahamula yati chiamula pagati yavi, kulangisa kuvya mweagotoliwi ayivili lepi vindu vya muyaki. Mkolo chinyama chenicho yati iyidakila chilapu chenicho, na muyaki yati ilipa lepi chindu chochoha. 12 Nambu ngati yimanyikini kuvya ayivili mweagotoliwi, ndi yiganikiwa amlipa mkolo chinyama. 13 Ngati chinyama chenicho chikomiwi na chinyama cha kudasi mweagotoliwi iganikiwa aleta masigalilu ngati usaidi. Iganikiwa lepi kulipa chochoha ndava ya chinyama chechikomiwi na chinyama cha kudasi."

14 "Mundu akayayika chinyama kwa muyaki, ndi chinyama chenicho chakafwa amala kulemala lukumbi mkolo chinyama vili lepi, mwayaiki chinyama chenicho iganikiwa alipa. 15 Nambu ngati mkolo chinyama avili, ndi mweayaiki yati ilipa lepi chindu chochoha. Ngati chinyama chikodiwi mwene yati iyidakila ndu mashonga ga kukodila."

16 "Mundu akamkofya kamwali angachumbiwa, akagona nayu iganikiwa kuwusa mahali na kumgega msikana mwenuyo. 17 Dadi wa kamwali mwenuyo akabela katu kumgegesa kwa mundu mwenuyo, mundu mwenuyo alipa mahali gegiganikiwa kwa kamwali mwenuyo."

18 "Kotoka kumleka mdala muhavi avya mumi."

19 "Mwaigonekana na chinyama iganikiwa akomiwa."

20 "Mwakumuwusila luteta chichapangachingi kwa kuchigundamila pahala pa Bambu, ndi iganikiwa akomiwa."

21 "Mkoto kumuhengela mambu gahakau myehe amala kumung'aisa, muni nyenye mewa mwavili mwavayehi kumulima wa Misili. 22 Mkotoka kumuhengela mambu gahakau lipwela amala mkiva. 23 Ngati mukavahengela gahakau avo na vakanivembela, chakaka yati nikuvayuwanila chivembu chavi, 24 yati nikuvayomela na kuvakoma, na nene yati nikuvakoma kwa upanga, na vadala vinu yati vivya valipwela na vana vinu vivya vakiva."

25 "Ukakopesa mashonga mundu yoyoha pagati ya vandu vangu vevavili vangangu, kotoka kukita ngati chevikita vevikopesa na kumlipisa chiyonjokesu. 26 Ukatola mgololi wa kujigubika wa muyaku kuvya poni, yiganikiwa umuwuyasila kwakona lilanga kutipama, 27 muni yeniyo ndi nyula nga yiyoyo, yeakujiwika. Amala uholalela yati akujiwika kyani? Akanivembela yati nikumuyuwanila, muni nene nina lipyana."

28 "Kotoka kumliga Chapanga, amala kumpela likoto mkulu wa vandu vaku."

29 "Ukotoka kuleka kuniwusila luteta lwa mabenu gaku na divayi yako."

"Yati mukunipela vaveleka vinu vakutumbula vagosi." 30 Yati mwikita mewawa kuvala vavelekwa vinu va kutumbula va ng'ombi na mambelele. Yati mukumleka kila mvelekwa wa kutumbula kwa nyina waki mumagono saba, na ligono la nane muniwusila.

31 Nyeye yati mwivya vandu mwemunyambiswi kwangu. Hinu yati mwilya lepi nyama ya chinyama chechikomiwi na chinyama cha mdasi, nyama yeniyo mugatagila mabwa.