1 "Kotoka kujova ga udesi, kotoka kumtangatila mundu muhakau ndava ya kujova ga udesi. 2 Kotoka kulanda msambi wa vandu vevikita uhakau, amala kotoka kuwungana na vandu vevijova usaidi wa udesi palibanji la mihalu. 3 Kotoka kuvya upandi wa mundu mngangu mumuhalu waki."

4 "Ukakolela ng'ombi amala punda wa likoko waku ayagili, ndi muwuyasila mwene. 5 Ukamuwona punda wa mundu mweakuvengili agwili na mzigu waki, mtangatilakwa kuyinula punda waki kotoka kumleka na kuhamba."

6 "Kotoka kuyagisa uchakaka pamuhalu wa mngangu. 7 Jivika patali na matakilu gaudesi na kotoka kuvakoma vandu vangabuda na vandu vasadikika, muni nene yati nikumlekekesa mundu muhakau. 8 Kotoka kupokela swinda, muni swinda yikuvakita vakulu vakoto kuhamula cheyiganikiwa mewa swinda yiyagisa uchakaka."

9 "Mkotoka kumyivila muyehe muni nynye mmanyili kuvya mwavili mwavayehe ku Misili."

10 "Mulukumbi lwa miyaka sita yati wipanda migunda yaku na kubena mabenu gaki. 11 Nambu mumwaka wa saba, yati ukuyileka migunda yaku changali kupanda mbeyu, muni vangangu pagati ya vandu vaku vapata chakulya chechisigalili mwenumo, na hinyama ya mudasi yilya. Ukita mewawa mumigunda yaku ya mizabibu na mizeituni."

12 "Mumagono sita yati uhenga lihengu laku nambu ligono la saba yati upumulila, na ng'ombi zaku na punda zaku zipumulila mewa, na vavanda vaku na vatangatila vaku vayehe vaselebuka."

13 "Mugakamula goha genivajovili. Katu mkotoka kuluwula mahina ga michapanga hingi genago gakoto kuyuwanika mumilomo yinu."

14 "Mala zidatu mukila mwaka yati mukita mselebuko ndava ya kunitopesa nene. 15 Yati mwikita mselebuko wa mabumunda gangali hamila ngati chenavalagizi, yati mwilya mabumunda gangali hamila mumagono saba lukumbi lwelupangiwi mumwehi weukemiwa Abibu, muni mwehi wenuwo ndi mwawukili ku Misili. Mundu yoyoha akotoka kubwela palongolo changali teta."

16 "Yati mwikita mselebuko wa mabenu ga kutumbula ga lihengu linu na mabenu ga migunda yinu.

Yati mwikita mselebuko wa kugegelela mabenu mwishu wa mwaka pemwigegelela mabenu ga lihengu linu. 17 Vagosi voha vakonganeka palongolo yangu Nene Bambu Chapanga mala zidatu mumwaka."

18 "Kotoka kuniwusila ngasi ya luteta lwangu pamonga na libumunda levasopili hamila. Kangi kotoka kuleka mahuta ga hinyama yeyiwusiwi luteta lwa mselebuko wangu gasigalila mbaka lukela."

19 "Mabenu ga kutumbula ga ndima yaku yati ukugaleta panyumba yangu nene Bambu waku."

"Kotoka kuvilisa mpapakasi wa limbelele amala mpapakasi wa mene mumavele ga nyina waki."

20 "Nene nikumtuma mtumu wa kuanani avalongolela mulugendu muni avayunga na kuvahikisa mumulima wenivatendelekili. 21 Mumyuwanila na kuyidakila cheijova, mkoto kumng'anamukila, muni yati akuvalekekesa lepi muni nimtumili kwa lihina langu. 22 Nambu mukamuyuwanila bwina na kukita goha geijova, nene yati nivya likoko wa likoko vinu na yati nikuvang'anamukila vala vevakuvang'anamukila. 23 Mutumu wangu wa kunani peakuvalongosa na kuvahikisa pamulima wa Vaamoli na Vahiti na Vapelizi na Vakanaani na Vahivi na Vayebusi na nene yati nikuvakomakesa voha avo. 24 Mkotoka kugundamila muvichapanga vyavi amala kuvihengela amala kunjigisa mumambu gavi. Ndi muviyongomesa vichapanga na kudenyadenya nguzo yavi ya maganga. 25 Mukanigundamila Nene Bambu Chapanga winu, na nene yati nikuvamotisa muchakulya na manji na kuwusa utamu pagati yinu. 26 Pivya lepi na mdala mweihalabikiwa ndumbu yaki amala kuvya ngaveleka pamulima winu, na nene yati nikuvapela wumi wa miyaka yamahele."

27 "Yati nikuvayogopesa palongolo yinu na kuvapechanganisa vandu voha vemutovana nawu, na kuvakita makoko vinu vang'anamuka na kutila. 28 Yati nikuvayogopesa neju kwa makoko vinu ngati chegibwela mavangauluku. Yati nikuvavinga Vahivi na Vakanani na Vahiti vawuka palongolo yinu. 29 Yati nikuvawusa lepi vandu avo mumwaka umonga, muni mulima ukotoka kuvya changali vandu na hinyama ya mdasi yikoto kuyonjokesa na kuvang'aha. 30 Nambu yati nikuvawusa chidogo chidogo mbaka pemwiyonjokesa na kutalalila mulima. 31 Mibaka ya mulima winu yati nikuhiyonjokesa kuhumila nyanja ya Shamu mbaka nyanja ya Meditelania, na kuhumila kulugangatu mbaka mfuleni Efulate. Muni yati nikuvapela uhotola wa kuvahotola vakolonjinji, na nyenye yati mukuvavinga vawukayi. 32 Kotoka kukita Lilaganu na venavo, amala michapanga yavi. 33 Mkotoka kuvaleka vatama pamulima winu, na ngati muvalekili yati vakuvakita nyenye munibudila nene, ndava muni ngati mukuyigundamila michapanga yavi, ndi yati yivya lingongeka la kuvayonja."