1 Bambu akavajovela Musa na Haloni, pevavii vakona kumulima wa Misili, 2 "Mwehi wenuwu yati wivya wa kutumbula kwinu kila mwaka. 3 Mvajovela vandu voha kuvya ligono la kumi la mwehi uwu, yati mwihagula mpapakasi wa limbelele amala mpapakasi wa mene mu kila nyumba. 4 Ngati vandu va nyumba yimonga ndi vadebe ndi vihotola lepi kumala mpapakasi wa limbelele na mpapakasi wa mene, iganikiwa kuhanganilana na vandu va nyumba ya papipi yaki. Vagavanayi nyama kuwanangana na umahele wa vandu chevavii, na umahele wa nyama yeilyai kila mmonga. 5 Chinyama chenicho chikoto kuvya na chilema chochoha, chivyai chigosi na chechina mwaka umonga, uhotola kuhagula mpapakasi wa limbelele amala mpapakasi wa mene. 6 Yati mkuchiyunga chinyama chenicho mbaka paligono la kumi na mcheche la mwehi. Ligono lenilo vandu va Isilaeli voha yati mwihinja hinyama yeniyo lukumbi lwa kimihi. 7 Kangi yati vitola ngasi ya hinyama yeniyo na kunyala munani na mumihana ya kuyingila mugati ya nyumba zavi kwevitama kulya nyama yeniyo. 8 Kilu yiyoyo valyayi nyama yeyiyochiwi, valyai pamonga na mabumunda gangali amila na likolo la mahamba lelivava. 9 Mkoto kulya yivisi amala kututuswa na manji, ndi yiganikiwa kuyochewa yoha, pamonga na mutu na magendelu na nyama zaki za mugati. 10 Mkoto kuleka nyama yoyoha mbaka lukela. Na yeyisigalila mbaka lukela muyitinisa pamotu. 11 Chenichi chemwilya nyama yeniyo, kuni mujitendelekili kwa lugendu mujikunga mkungi muchiwunu chinu, muwala champali na ndonga zinu mumawoko. Kangi mlya kanyata, Wenuwu ndi mselebuko wa Pasaka cha kumtopesa Bambu." 12 "Kilu yeniyo, yati nipita pamulima wa Misili na kuvakoma vavelekanu vatumbulanu va Misili, vandu na hinyama. Yati nikuhibuna michapanga yoha yavakuyiyupa va Misili. Nene ndi Bambu. 13 Hinu ngasi yeniyo ndi yati yivya ulangisu wa kulangisa nyumba yemwivya, Ni nene penikuyiwona ngasi yeniyo. Yati nikuvapita kunani ya nyumba zenizo na kawaka chindu chechikuvakolela lukumbi penikuvatova Vamisili. 14 Yati mselebuka ligono ili ndava ya kukumbuka lijambu lenilo kwa utopesa wangu nene Bambu chiveleku chimonga mbaka chingi. Lenili ndi lilagizu langu magono goha kwinu."

15 Bambu akajova, "Mulukumbi lwa magono saba, yati mwilya mabumunda gangali hamila. Ligono la kutumbula la magono ago saba yati muwusa hamila munyumba zinu, mundu yoyoha akalya chindu chechina hamila mumagono ago saba yati ivalangiwa lepi kuvya mmonga pagati ya vandu vangu. 16 Ligono la kutumbula na ligono la saba yati mwiva na mkonganeka kunigundamila. Mumagono gavili ago mganikiwa lepi kuhenga lihengu nambu kutendelekela chakulya ndu. 17 Yati mwikita mselebuko wenuwu wa mabumunda gangali hamila kulangisa ligono ili lenavawusili nyenye makabila ga Vaisilaeli kuhuma ku Misili. Mselebuko wenuwo yati mselebuka na viveleku vinu vyoha, ngati lilagizu la magono goha. 18 Yati mwilya mabumunda gangali hamila kutumbula kimihi ligono la kumi na mcheche la mwehi wa kutumbula, mbaka kimihi ligono la ishilini na limonga la mwehi wuwowo wa kutumbula. 19 Mumagono ago saba mkoto kuvya na hamila yoyoha munyumba zinu, mundu yoyoha myehe amala mkolonjinji, akalyai chindu chechina hamila yati iwusiwa pagati ya Vaisilaeli. 20 Popoha pemwitama katu mganikiwa lepi kulya chochoha chechina hamila. Mganikiwa kulya mabumunda gangali hamila."

21 Hinu Musa avakemili vachilongosi voha va Isilaeli akavajovela, "Muhagula mpapakasi wa limbelele wa kuhinja kila mmonga kulandana na nyumba yaki, mselebukila wa Pasaka. 22 Mtola mahamba ga hisopo na muyina mungasi yeyivili munkeve na kunyala kunani na mumihana ya kuyingila munyumba zinu. Mundu yoyoha akotoka kuhuma kuvala kilu yeniyo mbaka lukela. 23 Muni Bambu yati ipita kuvakoma Vamisili, nambu peakuyiwona ngasi yeyibakiwi kunani na mumihana ya kuyingila munyumba zinu, yati ipita kunani ya nyumba zenizo na kumjovela mkomaji akotoka kuyingila munyumba zinu na kuvakoma. 24 Mulanda lilagizu lenili nyenye na viveleku vinu magono goha gangali mwishu. 25 Pemwiyingila mumulima wula, Bambu mweakuvapela ngati cheavalagasili ndi mganikiwa kuyendelela kukita mselebuko wenuwo. 26 Lukumbi lwoha vana vinu pevakuvakota, ‘Mselebuko uwu mana yaki kyani?’ 27 Muvayangula, ‘Lwenulu ndi luteta lwa Pasaka ndava ya kumtopesa Bambu, muni azipitili kunani nyumba za Vaisilaeli pamulima wa Misili lukumbi peavakomili Vamisili, nambu tete atikomili lepi.’ " Vaisilaeli vagundamisi mitu na kumgundamila Chapanga. 28 Kangi Vaisilaeli vakahamba kukita ngati chevajoviwi na Musa na Haloni kulandana na malagizu ga Bambu.

29 Payahikili kilu Bambu avakomili vavelekanu vakutumbula vagosi va Misili, voha vakomiwi kuhumila mveleka wa kutumbula wa nkosi, mhali wa unkosi, mbaka mveleka wa mkungiwa mweavi muchifungu. Hati vavelekanu vya kutumbula vya mifuya vyakomiwi. 30 Hinu nkosi na vatangatila vaki na vandu vaki voha va Misili vayimwiki kilu yila. Kukavya na chivembu chivaha pamulima woha wa Misili muni kawaka nyumba yangakomiwa mundu. 31 Kilu yilayila nkosi akamkemela Musa na Haloni na kuvajovela, "Muyimuka! Muwuka pagati ya vandu vangu. Muhamba nyenye pamonga na Vaisilaeli, mukamgundamila Bambu ngati chemwayupili. 32 Mtola misambi yinu ya mambelele na mene na ng'ombi na muwuka muniyupila na nene mota." 33 Vamisili vavayumbatisi Vaisilaeli vawuka kanyata pamulima wavi kuni vijova, "Chakaka yati tifwa tavoha ngati nyenye mwiwuka lepi!" 34 Ndi vandu vakatola libulungutu la uhembe lakona langasopewa hamila, vakavika munkeve wa kukandila uhembe, vakagatindisila munyula na kugega mumavega gavi. 35 Vaisilaeli vakitili ngati Musa cheavajovili kwakona, vavayupili Vamisili vavapela vindu vya feza na zahabu na nyula ya kuwala. 36 Bambu amali kuvakita Vamisili vavyai na mtima wabwina kwa Vaisaleli, na Vamisili vavapelili vindu vyoha vyevayupili. Chenicho ndi Vaisilaeli chevatolili vindu vya Vamisili.

37 Vaisilaeli vawukili kwa magendelu kuhuma pamuji wa Lamesesi, kuhamba Sukoti. Vavii vagosi laki sita changali kuvalanga vadala na vana. 38 Kwavii na vandu vangi vamahele vangali kuvya Vaisilaeli vevalandini navo pamonga na mifuya yamahele, mambelele na mene na ng'ombi. 39 Vakatengeneza mabumunda gangali hamila kwa uhembe wula wevukandili wevahumili nawu ku Misili. Libulungutu lila uhembe lasopiwi lepi hamila, ndava ya kuyumbatika kuwuka pa Misili, ndava muni vapatii lepi fwasi ya kutendelekela chakulya chavi. 40 Vaisilaeli vatamili pamulima wa Misili kwa miyaka miya mcheche na selasini. 41 Paligono la mwishu la mwaka wa miya mcheche na selasini, ligono lilolo ndi makabila goha ga vandu Bambu gawukili pamulima wa Misili. 42 Kilu yeniyo Bambu avayangalilayi lukumbi akuvawusa Vaisilaeli ku Misili, Vaisilaeli voha na viveleku vyavi vyoha viganikiwa kuselebuka kila mwaka ndava ya utopesa kwa Bambu ngati malagizu ga Pasaka.

43 Bambu avajovili Musa na Haloni, "Aga ndi malagizu ndava ya mselebuko wa Pasaka. Myehe yoyoha akotoka kulya chakulya cha Pasaka. 44 Nambu mvanda yoyoha mweaguliwi kwa mashonga, akadumuliwa jandu, yati ilya. 45 Myehe yoyoha mweitama kwinu kwa lukumbi ndu, amala muhenga lihengu kwa ligono ndu nakupata luhuna lwaki iganikiwa lepi kulya. 46 Chakulya choha chililiwa munyumba yimonga yiyoyo yevatendekilili. Na chikoto kuwusiwa kuvala ya nyumba yeatendelekiwi, kangi mkoto kudenya majege loloha la chinyama cha Pasaka. 47 Vandu voha va Isilaeli viganikiwa kuselebuka mselebuko wa Pasaka. 48 Nambu myehe yoyoha pagati yinu akagana kuselebuka mselebuko wa Pasaka ya Bambu, yiganikiwa hoti vagosi vevavili munyumba yaki vadumuliwa jandu, penapo yati ivya mkolonjinji na ihotola kulya. Mwangadumula jandu katu akatoka kulya. 49 Muhilu wuwowo ukumvala mkolonjinji wa Isilaeli na myehe vevitama pagati yinu." 50 Vaisileli voha vayidakili muhilu wenuwo na vakakita ngati Bambu cheavalagizi Musa na Haloni. 51 Ligono lilolo Bambu avawusili Vaisilaeli pa mulima wa Misili misambi kwa misambi.