1 Atenganizi mazabahu ndava ya luteta lwa kutinyisa. Madhabahu yeniyo upana waki wavi mita zivili na lobo na utali waki wavi mita yimonga na lobo kunyoleka kwaki kwavi mita yimonga na lobo. 2 Mukila upandi wa mazabahu yeniyo atenganizi mang'elu na mazabahu yavi chindu chimonga. Akayigubika kwa shaba. 3 Atenganizi mewa vindu vyoha vyeyaganikiwa ndava ya mazabahu: Viviga na sepetu na mankeve na uma na visahani ya kuyokolela motu. Vindu vyoha atenganizi kwa shaba. 4 Atenganizi wavu wa shaba, na akauvika pahi ya ukingu wa mazabahu mbaka pagati ya mazabahu. 5 Mu kila ling'elu atenganizi pete mcheche ndava ya kugegela mazabahu yeniyo. 6 Mewawa atenganizi mikongo ya msonobali ndava ya kugegela na kuyigubika kwa shaba. 7 Ayingisi luvecha zila mupete zezavili mumihana ya mazabahu ndava ya kuyigega. Madhabau yila yeyatenganizwi kwa kuhengela mbawu mugati kuvya wazi.

8 Bazaeli atenganizi nkeve uvaha wa shaba na chitamilu chaki cha shaba, kwa kuhengela shaba yeyawusiwi na vadala vevihengelayi pandu pa kuyingila mu Lindanda la kukonganekela na Bambu.

9 Kangi atenganizi uwa. Lipazia upandi wa kusini wa uwa wavi wa chitambala cha msopi neju weubotiwi yeyina utali wa mita alubaini na mcheche, 10 vyavili na mapanda ishilini ga shaba gegana vitamilu ishilini ya shaba. Nambu luvecha na vidinilu vyavi vya shaba. 11 Upandi wa kasikazini wananangini na upandi wa kusini wa lipazia wavili mita alobaini na mcheche na zivili, na mapanda gaki ishilini ga shaba, nambu vidindilu vya mapanda ago vyavili vya feza. 12 Upandi welitipama lilanga kwavili na lipanzia lelina utali wa mita isilini na zivili na mapanda gaki kumi na vitamilu vyaki kumi. Luvecha vya mapanda na vidindilu vyaki vyavi vya feza. 13 Upandi welihumila lilanga kwavili na pandu pakuyingilila. Wavi na upana wa mita ishilini na zivili. 14 Mapazia ga upandi umonga wa pandu pa kuyingilila kwavii na upana wa mita sita na yapinga, pamonga na mapanda gadatu na vitamilu vyaki vidatu. 15 Mewawa mapazia ga upandi wungi gegavili na utali wa mita sita na yapinga pamonga na mapanda gadatu na vitamilu vyaki vidatu. 16 Mapazia goha gegatindili uwa gatenganizwi kwa chitamabala chamsopi pehe. 17 Vitamilu vyoha vya mapanda vyavi vya shaba, nambu luvecha lwa mapanda genago na vidindilu vyaki vyavi vya feza. Luvecha vyaki vyavili vya feza, mewa mapanda goha gawunganiswi kwa mbagalu za feza. 18 Lipazia la pandu pakuyingilila mu uwa latenganizwi kwa chitamabala cha msopi neju na kutotwa na wuzi wa langi ya buluu na zambalau na yidung'u na kupambwa na kutota bwina, lene lavii na utali wa mita tisa na kunyoleka kwaki kwawanangini uwa yoha. 19 Mewawa mapanda gaki gavi mcheche na vitamilu mcheche vya shaba. Luvecha zaki vyavi vya feza hati mapanda gaki na vidindilu vyaki vyavi vya feza. 20 Vikongwani vyoha vya Lindanda na uwa kutindila Lindanda vyavi ya shaba.

21 Vyenivi ndi vindu vyevyahengiki kujengela Lindanda la Msopi, ndi vibawu vya maganga vyevyavili na malagizu kumi vyavikiwi. Mahengu aga gayimaliwi na Valawi kwa malagizu ga Musa pahi ya ulongosi wa Itamali mwana wa mteta Haloni.

22 Bezaleli mwana wa Uli, na ndi mjukulu wa Huli, wa likabila la Yuda, akitili kila chindu ngati Musa chealagizwi na Bambu. 23 Atangatiwi na Oholiabu mwana wa Ahisamaki, wa likabila la Dani fundi mwana umanya neju wa kuhongola, kuvika micholo chakuhongola na kutota kwa wuzi wa langi ya buluu na zambalau na yidung'u na chitambala chamsopi chechibotiwi.

24 Zahabu yoha yevawusili kwa Bambu ndava kujengela Lindanda la msopi yavili utopa wa kilo elufu yimonga na gilamu miya hidatu kulandana na chipimu chechavikiwi mu Lindanda la kukonganekela na Bambu. 25 Feza zezawusiwi kuhuma kwa vandu vevavalangiwi yavili na utopa wa kilo elufu zidatu na miya mcheche na selasini kulandana na vipimu vya Lindanda la kukonganekela na Bambu. 26 Mundu yoyoha meavili na miyaka ishilini na neju awusili feza ngati gilamu sita na vagosi voha vavalangiwi vavili laki sita na datu elufu na miya mhanu na hamusini. 27 Kilo ngati elufu zidatu na miya mcheche za feza zatumiki kutengenezela vitamilu miya yimonga vya Lindanda la kukonganekela na Bambu na lipazia lila, ndi kilo selasini mukila chitamilu. 28 Bazaleli atumili kilo selasini zezasigalili kutengenezela vidindilu vya mapanda na kugubika mitu ya mapanda na kutengenezela luvecha. 29 Jumula ya shaba yevamuwusili Bambu yavili na utopa wa kilo elufu hivili na miya mcheche ishilini na muhanu. 30 Bezaleli atumili shaba yeniyo kutengenezela vitamilu vya pandu pa kuyingilila mu Lindanda la kukonganekela na Bambu, mazabahu ya kuwusila luteta lwa shaba pamonga na waya waki wa shaba na vindu vyoha ya mazabahu kuwusila luteta. 31 Mewawa atengenizi vitamilu vya uwa kutindila Lindanda la kukonganekela na Bambu na pandu pakuyingilila muuwa na vikongwani na vyoha vya Lindanda na vya uwa.