1 Kangi Bambu akamjovela Musa, 2 "Vajovela Vaisilaeli vawuya mumbele, vagona mumandanda ga Pi Hahiloti, pagati ya muji wa Migidoli na nyanja ya Shamu, palongolo ya Baali Sefoni. 3 Muni nkosi yati iholalela, ‘Vaisilaeli vilyunga ndava lugangatu luvadivalili na vihotola lepi kuwuka.’ 4 Penapo nene yati nikumkita nkosi avyai na ndindani, ndi yati akulanda. Yati nikujipela utopesa kwa kumkomakesa mwene pamonga na manjolinjoli vaki, penapo Vamisili yati vimanya Nene ndi Bambu." Hinu Vaisilaeli vakakita chenicho.

5 Nkosi wa ku Misili peayuwini kuvya Vaisilaeli vatilili, mwene na vatangatila vaki vakang'anamusa maholo gavi, vakajova, "Tihengili kyani kuvaleka Vaisilaeli vahamba na vakoto kutihengela kavili." 6 Hinu nkosi akatendekela mutuka yaki za kuhutwa na hinyama yeyikemiwa falasi ya ngondo na manjolinjoli vaki. 7 Akatola mutuka zenizo zabwina mia sita na mutuka zingi zoha za ngondo za Misili gegalongoswa na vatangatila vaku. 8 Bambu amkitili nkosi wa ku Misili kuvya na ndindani namwene akavalanda Vaisilaeli vevamali kuwuka ku Misili kwa ukekesi. 9 Manjolinjoli va Misili na falasi wavi voha na mutuka za ngondo na vakwela falasi vaki voha vakavalanda Vaisilaeli na kuvakolela pamandanda pamuhana ya nyanja, papipi na Pi Hahiloti, kulolesana na Baali Sefoni.

10 Vaisilaeli pevalolili na kumuwona nkosi ibwela na manjolinjoli vaki, vayogwipi neju vakamvembela Bambu avatangatila. 11 Vakamjovela Musa, "Wu, pavili lepi na matinda ku mulima Misili hati utiletili tifwilila kulugangatu? Ndava kyani utihengili naha kutiwusa pamulima wa Misili? 12 Wu, takujovili lepi kwakona petavili takona ku Misili? Takujovili utileka tiyendelela kuvahengela Vamisili. Nga yivili mbanga kuliku kufwilila kulugangatu uku."

13 Musa akavajovela Vaisilaeli, "Mkoto kuyogopa! Mvya vakekesi! Lelu yati mwilola Bambu chakuvasangula, muni Vamisili ava chemuvakuvalola lelu yati muvalola lepi kangi. 14 Bambu yati akuvakomanela, chemganikiwa kukita ndi kutama nuu."

15 Ndi Bambu akamjovela Musa, "Ndava kyani ukunivembela? Vajovela Visilaeli vahamba kulongolo. 16 Yinula ndonga yaku na kulangisa panani ya nyanja. Manji gakalekengana na Vaisilaeli yati vihotola kukupuka pagati ya nyanja pandu payumu. 17 Yati nikuyikita mitima ya Vamisili kuvya na ndindani, navene yati vayingila munyanja pevakuvalanda. Na nene yati nipata utopesa ndava ya kuvayongomesa nkosi pamonga na manjolinjoli vaki voha na mutuka zaki za ngondo pamonga vagendesa falasi zaki. 18 Chakaka yati nipata utopesa kwa kumyongomesa nkosi pamonga na mutuka zaki za ngondo na vakwela falasi vaki, na Vamisili yati vimanya kuvya Nene ndi Bambu."

19 Hinu mtumu wa kunani kwa Chapanga mweavii mulugendu pamonga na Vaisilaeli atamili mumbele yavi. Na nguzo yila ya lihundi wawukili kulongolo na kutama mumbele yavi, 20 yikatama pagati ya Vasilaeli na Vamisili. Lihundi lila lavasopili chitita Vamisili nambu lavalangasili Vaisilaeli kilu, hinu Vaisilaeli na Vamisili vakonganiki lepi kilu yoha.

21 Musa akayinula chiwoko chaki kunani ya nyanja, na mwene Bambu akakang'a manji ga nyanja mumbele kwa mpungu weuna makakala neju kuhuma kwelihumila lilanga. Mpungu wenuo wabulwime kilu yoha mbaka lukela, na kulekenganisa nyanja pandi zivili na pagati pakavya ndumba. 22 Na Vaisilaeli vapitili pagati ya nyanja pandu payumu, kuni uwa lwa manji lwavili upandi wa kulyelela na kumangiya. 23 Vamisili vavalandili kwa kupita pagati ya nyanja pandu payumu pamonga na falasi wavi na mutuka zavi za ngondo na vakwela falasi vavi voha. 24 Hambakucha Bambu alolili msambi wa manjolinjoli wa Misili kuhuma kunguzo ya motu na wa lihundi lila, avayogopisi neju na kulyunga lyunga Misili venavo. 25 Agakwamisi maguludumu ga mutuka zavi, penapo gakagenda chimtahu neju, penapo Vamisili vakajova "Tivaleke Vaisilaeli muni Bambu akuvakengelela ndava yitu."

26 Kangi Bambu akamjovela Musa, "Yinula chiwoko chaku panani ya nyanja muni manji gawuyai na kuvagubika Vamisili pamonga na mutuka zavi na vakwela falasi vavi." 27 Ndi Musa akayinula chiwoko chaki panani ya nyanja na kwapachili nyanja yawuyili kuvya ngati cheyavili. Vamisili valingili kugatila manji nambu Bambu avakang'alili munyanja. 28 Manji gawuyili na gagubiki mutuka ya kuhutwa na falasi pamonga na vakwela falasi, manjolinjoli voha va nkosi wewavalandayi Vaisilaeli vafwili munyanja. Asigalili lepi hati mmonga. 29 Nambu Vaisilaeli vapitili pandu payumu munyanja kuni manji gavii ngati uwa upandi wa kulyelela na kumangiya.

30 Ligono lenilo Bambu avasangwili Vaisilaeli mumang'aiso ga Vamisili, ndi Vaisilaeli vavaweni Vamisili vafwili mumihana ya nyanja. 31 Vaisilaeli pavaweni lijambu likulu laakitili Bambu kwa Vamisili ndi vakamtopesa neju na kumsadika Bambu na mtangatila waki Musa.