1 Bambu akamjovela Musa, "Yuwanila nene nikukukita ngati Chapanga kwa nkosi wa ku Misili, na mlongo waku Haloni yati ilongela pahala paku. 2 Mjovela mlongo waku Haloni mambu goha genikukumanyisa, na mwene yati akumjovela nkosi wa ku Misili avaleka Vaisilaeli vawuka pamulima waki. 3 Nambu yati nikuukita mtima wa nkosi wa ku Misili unonopa. Hati ngati nikayonjokesa chinamtiti na makangaso gangu pa mulima wa Misili, 4 nkosi wa ku Misili yati akuvayuwanila lepi. Ndi penapo yati niyinula chiwoko changu chechina makakala kuubuna mulima wa Misili, na kuvawusa vandu vangu, makabila ga Isilaeli kuwuka ku Misili. 5 Lukumbi peniyinula chiwoko changu kuuvala mulima wa Misili na kuvawusa Vaisilaeli pagati yavi. Ndi Vamisili pevimanya kuvya, Nene ndi Bambu." 6 Hinu, Musa na Haloni vakitili ngati Bambu chevalagazili. 7 Musa avili na miyaka semanini na Haloni avili na miyaka Semanini na yidatu lukumbi lwenulo pevalongelayi na nkosi wa ku Misili.

8 Bambu amjovili Musa na Haloni, 9 "Ngati nkosi wa ku Misili akavajovela mkita chinamtiti, ndi ukumjovela Haloni atola ndonga yaki ayitaga palongolo ya nkosi wa ku Misili na yene yati yivya liyoka." 10 Hinu Musa na Haloni vakamuhambila nkosi wa ku Misili na kukita ngati chevalagaziwi na Bambu. Haloni atagili ndonga yaki pahi palongolo ya nkosi wa ku Misili na vatangatila vaki, ndi yikavya liyoka. 11 Nambu nkosi wa ku Misili akavakemela vandu vevana luhala na vahavi va Misili na vene vakakita chilachila cheahengili Musa kwa uhavi wavi. 12 Kila mmonga ayitagili ndonga yaki pahi, yikavya liyoka. Nambu ndonga ya Haloni yikazimila ndonga zavi. 13 Nambu mtima wa nkosi wayendalili kuvya na ndindani, avayuwanili lepi, yikavya ngati cheajovili Bambu.

14 Kangi Bambu akamjovela Musa, "Mtima wa nkosi wa ku Misili wiyendelela kuvya na ndindani neju. Ibela kuvaleka Vaisilaeli vahamba. 15 Hinu mhamba ukakonganeka nako chilau lukela, lukumbi peihamba kumfuleni wa Naili muchiwoko chaku ugegi ndonga yila yeyang'anamwiki kuvya liyoka. Mlindilayi pamuhana ya mfuleni. 16 Kangi mjovela naha, ‘Bambu, Chapanga wa Vaebulania, anitumili kwaku, mwene ijova naha, valeka vandu vangu vahamba muni vakanigundamila kulugangatu, nambu mbaka hinu ubelili kuyidakila. 17 Hinu Bambu ijova yati ukunimanya kuvya Nene ndi Bambu. Yati nikugatova manji ga mfuleni Naili na ndonga iyi, na manji goha yati ging'anamuka kuvya ngasi. 18 Somba zezivili mumfuleni Naili yati zifwa, mfuleni woha yati ununga neju na Vamisili yati vihotola lepi kunywa manji gaki.’ "

19 Bambu akamjovela Musa, "Mjovela Haloni atola ndonga yaki na kuyiyinula panani ya manji ga mifuleni yoha na mifeleji yoha na kapela zoha na matanda goha pamulima wa Misili. Na manji yati ging'anamuka kuvya ngasi kila pandu pamulima woha, na hati muvindu yavi ya kuvikila manji vivya vya mbawu na maganga."

20 Musa na Haloni vakakita ngati Bambu cheavalagizi. Haloni akayinula ndonga kunani palongolo ya nkosi wa ku Misili na vatangatila vaki, akagatova manji ga mfuleni na gakang'anamuka kuvya ngasi. 21 Somba zezavii mumfuleni zafwili, mfuleni wanungili neju hati Vamisili vahotwili lepi kunywa manji gaki. Manji goha gakamema ngasi. 22 Nambu vahavi va Misili kwa uhavi wavi vakitili chilachila. Hinu mtima wa nkosi wasigalili kuvya na ndindani, avayuwanili lepi Musa na Haloni, yikavya ngati Bambu cheajovili. 23 Hinu ndi nkosi wa ku Misili awuyili kunyumba yaki, na gegahumalili gavii chindu lepi kwaki. 24 Vamisili voha vakagima gima pamuhana ya mfuleni Naili muni vapatayi manji ga kunywa, ndava vahotwili lepi kunywa manji ga mfuleni wenuo.

25 Litovelu lenilo latamili kwa lukumbi lwa magono saba kuhumila Bambu peautovili mfuleni.