1 Nambu Bambu amyangwili Musa, "Hinu yati ulola chenikumkita nkosi wa ku Misili, muni nene yati nikumng'ang'anisa avaleka vandu vangu vawuka kwa makakala. Ena, kwa makakala yati akuvavinga vawuka pamulima waki."

2 Chapanga akamjovela Musa, "Nene ndi Bambu. 3 Namuhumalili Abulahamu, na Isaka na Yakobo namanyikini ngati Chapanga mweana Makakala, pamonga nijimanyisi lepi kwavi kwa liina langu la Bambu. 4 Kangi nakitili Lilaganu navo kuvya yati nikuvapela mulima wa Kaanani ndi kwevatamili ngati vayehi. 5 Pamahele pa ago, niyuwini luvembu lwa Vaisilaeli ndi vevang'ang'aniswi na Vamisili kuhenga mahengu ga uvanda, na nene nalikumbwiki Lilaganu langu. 6 Hinu vajovela Vaisilaeli nijova, ‘Nene Bambu! Nene yati nikuvawusa muhuma muuvanda. Yati nikuvasangula muuvanda winu. Yati nitalambula chiwoko changu chechina makakala na kuvabuna neju Vamisili na kuvagombola nyenye. 7 Yati nikuvakita nyenye kuvya vandu vangu, na nene yati nivya Chapanga winu. Na nyenye yati mwimanya kuvya nene ndi Bambu, Chapanga winu, mwenivawusili muuvanda ku Misili. 8 Na nene yati nikuvapeka ku mulima wula uvya winu wenalapili kuvapela Abulahamu na Isaka na Yakobo. Yati nikuvapela mulima wenuwo uvya winu. Nene ndi Bambu.’ " 9 Musa akavajovela Vaisilaeli malovi ago, nambu vene vamuyuwanili lepi, ndava muni vatotokili ndava ya mahengu geginonopa.

10 Kangi Bambu akamjovela Musa, 11 "Hamba kwa nkosi wa ku Misili, mjovela avaleka Vaisilaeli vawukayi pamulima waki."

12 Nambu Musa akamjovela Bambu, "Lola, Vaisilaeli vakuniyuwanila lepi nene, yati yivya wuli kuvala nkosi wa ku Misili! Kangi nene namundu mweninachimama nimanyili lepi kulongela bwina!"

13 Ndi Bambu akalongela na Musa na Haloni, akavalagiza vahamba kwa nkosi wa ku Misili, na kuvawusa Vaisilaeli pamulima wa Misili.

14 Ava ndi vakulu va vachilongosi va lukolo lwa Isilaeli mweakemiwi Yakobo, aga ndi mahina ga vana vagosi va Lubeni, mweavili mwana wa kutumbula wa Isilaeli ndi Henoki na Palu na Hesiloni na Kalimi. Venavo vavii vakulu va viveleku vya Lubeni. 15 Vana va vagosi va Simoni vavii Yemueli na Yamini na Ohadi na Yakini na Sohali na Shauli avii mwana wa mdala kuhuma mulima wa Kanaani. Venavo vavili vagogo va valukolo lwa Simoni. 16 Aga ndi mahina ga vana vagosi va Lawi na viveleku vyavi vavii Gelishoni na Kohati na Melali, Lawi atamili miyaka miya yimonga selasini na saba. 17 Vana vagosi va Gelishoni vavii Libini na Shimei, mahina ago ndi gavi mahina ga lukolo lwavi. 18 Vana vagosi va Kohati vavii Amlamu na Ishali na Hebuloni na Uzieli. Kohati atamili miyaka miya yimonga na selasini na datu. 19 Vana vagosi va Melali vavii Mahili na Mushi. Venava ndi lukolo lwa Valawi na viveleku vyavi.

20 Amlamu amgegili Yokebedi, hongi waki, ndi amveliki Haloni na Musa. Amulamu atamili miyaka miya yimonga na selasini na saba. 21 Na vana vagosi va Ishali vavii Kola na Nefegi na Zikili. 22 Vana vagosi va Uzieli vavii Mishaeli na Elisafani na Sitili.

23 Haloni amgegili Elisheba, msikana wa Aminadabu, mlumbu waki Nashoni, na Elisheba amveliki Nadabu na Abihu na Eleazali na Isamali. 24 Na vana vagosi va Kola vavii Asili na Elikana na Abiasafu. Venavo ndi vavii va lukolo lwa Kola. 25 Eleazali, mwana mgosi wa Haloni, amgegili mmonga wa vasikana va Putieli, na mwene amveliki Finehasi. Venava vavii vakulu va lukolo lwa Lawi.

26 Haloni na Musa ndi vevajoviwi na Bambu, "Muvawusayi vandu va Isilaeli kuhuma mumulima wa Misili, misambi kwa misambi." 27 Vavovo ndi vevalongili na nkosi wa ku Misili, ndava ya kuvawusa Vaisilaeli pamulima wa Misili.

28 Lukumbi lila Bambu pealongili na Musa ku mulima wa Misili, 29 amjovili "Nene ndi Bambu. Mjovela, nkosi wa Misili, malovi goha genikujovela."

30 Nambu Musa akamjovela Bambu, "Nene nina chimama, nkosi wa ku Misili yati akuniyuwanila wuli?"