1 Mumagono ago kwavili na mgosi kuhuma mulikabila la Lawi mweamgegili mdala Mlawi. 2 Hinu mau yula avili na ndumbu, akaveleka mwana mgosi. Paalolili kuvya mwana yula wabwina akamuhiha kwa miehi yidatu. 3 Nambu paalolili kuvya ihotola lepi kumuhiha neju, akatola chidengu chechilukiwi kwa madete akanyala lami chikoto kuyingisa manji, akamvika mwana mgati ya chidengu chila. Ndi akavika chidengu chila mumihana mugati ya mfuleni Naili. 4 Mlumbu waki mwana yula ajifiyili papipi na pahala pala muni alola gegakumkolela mlongo waki.

5 Msikana wa nkosi akahamba kumfuleni wula kusamba, lukumbi lwenulo vatumisi vaki vagendagendayi mummuhana ya mfuleni. Ndi msikana wa nkosi akachiwona chidengu pamanyahi, akamlagiza mtangatila waki achitola. 6 Paadindwili amuene mwana kang'enya, ivemba mwene akamuhengela lipyana. Akajova "Mwenuyu ndi mmonga wa vana va Chiebulania."

7 Bahapo akahumila mlumbu wa mwana yula, na kumkota msikana wa nkosi wa Misili, "Wu nihambayi nikakulondela mdala wa Chiebulania akunyongesela na kukulelela mwanuyu?"

8 Msikana wa nkosi wa Misili akayamyangula, "Ena, hambayi." Hinu ndi, msikana yula akahamba, akamleta nyina wa mwana yula. 9 Msikana wa nkosi wa Misili akamjovela nyina yula, "Mtola mwanuyu umnyongesa na nene yati nikulipa." Hinu nyina yula akamtola mwana na kumlela. 10 Mwana peakulili, nyina waki ampeliki kwa Msikana wa nkosi wa Misili, ndi akamkita kuvya mwana waki, akamkemela lihina laki Musa, muni ajovili, "Nimnongili mumfuleni."

11 Ligono limonga Musa peavili mvaha, akawuka kuhamba kwevavili valongo vaki, kuvalola chevihenga mahengu geginonopa. Akamuwona Mmisili akumtova Muebulania mmonga wa valongo vaki. 12 Musa akalolakesa kuni na kula peawene kawaka mundu papipi, akamkoma mmisili yula na kumuhilalila mumsavati. 13 Chilau yaki akawuka kavili, akavawona Vaebulania vavili vikomana. Ndi akamkota yula mweahoki, "Ndava kyani ukumtova Muebulania myaku?"

14 Mwene akamyangula, "Yani mwakuvikili veve kuvya chilongosi na muamula witu? Wu, ugana kunikoma ngati chewamkomili Mmisili yula?" Pena Musa akayogopa na kuhololela, "Mwee kumbi lijambu ili limanyikini." 15 Nkosi wa Misili peayuwini lijambo lenilo, akalinga kumkoma Musa. Nambu Musa atilili, akahamba kutama kumulima wa Midiani. Ligono limonga, Musa atamili papipi na chiliva cha manji. 16 Hinu vasikana saba va mteta wa Midiani vabwelili kunega manji na kunywiha mambelele na mene za dadi wavi.

17 Vadimaji vangi vakabwela na kuvavinga vasikana vala. Nambu Musa akavatangatila vasikana vala na kunywiha hinyama yavi. 18 Pavawuyili kunyumba, Leuli dadi wavi akavakota, "Mboni lelu muwuyili kanyata naha?"

19 Vakamyangula, "Mmisili mmonga atikengalili muni vadimaji vala vakoto kutibesa kunega manji, ngamwene akanega manji na kunywiha hinyama yitu."

20 Dadi wavi akavakota, "Avili kwoki? Ndava kyani mumlekili kwenuko? Mukamkemela abwela kulya chakulya."

21 Musa akayidakila kutama kwa mundu yula ndi akampela msikana waki mweikemiwa Zipola avya mdala waki. 22 Zipola amvelekili Musa mwana mgosi. Musa akajova, "Nitilalili mulima wa chiyehe." Ndava yeniyo nikumkemela lihina laki Gelishomu.

23 Yapitili miyaka yamahele nkosi wa Misili afwili. Vaisilaeli vavi vakona vakavembeneka ndava ya kugana utangatila muni vavi muuvanda, chivembu chavi chamuhikili Chapanga, 24 Chapanga ayuwini chivembu chavi, mwene akumbwiki Lilaganu leavikili na Abulahamu na Isaka na Yakobo. 25 Hinu, Chapanga avalolili Vaisilaeli chaving'ahika, na kuvahengela lipyana.