1 Ligono limonga Musa peadimayi mambelele ga mkohanu waki Yetulo mteta wa Midiani. Musa apeliki msambi wa mambelele wula upandi wa kwelitipama lilanga kulugangatu lwa Holebu, kuchitumbi Sinai, chitumbi cha Chapanga. 2 Ndi Mtumu wa Bambu amuhumalili ngati motu weuyaka mudahi. Musa akulola dasi yiyaka motu changatinyika. 3 Lenili likangasa Musa akaholalela, "Ndava kyani dasi yiyaka changali kutinyika? Linda nihegelela nilole."

4 Chapanga peamlolili Musa ihegelela kuyilola dasi, akamkemela kuhumila pagati ya dasi, "Musa! Musa!"

Na mwene akayangula, "Mwee."

5 Chapanga akamjovela Musa, "Kotoka kuhegelela papipi! Hula champali vyaku muni pandu apa peuyima ndi pandu pamsopi" 6 Kangi Chapanga akamjovela, "Nene ndi Chapanga wa gogo waku, Chapanga wa Abulahamu, na Isaka na Yakobo" Ndi Musa akagubika pamihu paki muni ayogwipi kumlolokesa Chapanga.

7 Ndi Chapanga akamjovela, "Nigawene mang'aiso ga vandu vangu vevavili kumulima wa Misili, niyuwini kuvembeneka kwavi ndava ya mang'aiso gevikitiwa na vayimamila va vavanda. Nimanyili kung'ahika kwavi, 8 hinu ndi nihelili muni nivasangulayi kuhuma muuvanda wa Vamisili. Yati nikuvawusa mwenumo na kuvapeleka ku mulima uvaha weunaludaka lwabwina kwa kudimila mifuya yamahele na kulima, mulima wa va Kanani na Vahiti na Vaamoli na Vapelizi na Vahivi na Vayebusi. 9 Chakaka niyuwini chivembu cha vandu vangu, nilolili Vamisili chavakuvang'aha. 10 Hinu yati nikutuma kwa nkosi wa ku Misili muni ukavawusa vandu vangu mumulima wenuwo."

11 Nambu Musa akamyangula Chapanga, "Nene nayani hati nimuhambila nkosi wa ku Misili na kuvawusa Vaisilaeli mumulima wa Misili?"

12 Chapanga akamjovela, Nene yati nivya pamonga na veve. Pewimala kuvawusa Vaisilaeli yati ubwela kunifugamila nene Chapanga waku panani ya chitumbi ichi. Wenuwo yati wivya ulangisu kuvya nene Chapanga ndi mwenakutumili veve.

13 Bahapo, Musa akamjovela Chapanga, "Ngati nikavahambila Vaisilaeli na kuvajovela, ‘Chapanga wa vagogo vinu anitumili kwinu,’ Ni vene vakanikotayi ‘Lihina laki yani,’ Yati nikuvayangula kyani?"

14 Bambu akamyangula Musa, "Nene ndi Nene. Vajovela chenichi vandu va Islaeli: Yula mweikemiwa, Nene ndi Nene, anitumili kwinu. 15 Vajovela naha Vaisilaeli: Bambu mkulu, Chapanga wa vagogo vinu, Chapanga wa Abulahamu na Isaka na Yakobo anitumili kwinu. Lenili ndi lihina langu magono goha gangali mwishu, chenichi ndi chenikelewayi na viveleku vyoha. 16 Hamba ukavakusanyai vachilongosi va Isilaeli na uvajovela: Bambu, Chapanga wa vagogo vinu, Chapanga wa Abulahamu na Isaka na Yakobo, anihumalili na kunijovela, nivalolili na kugawona mambu gemuhengewa pa mulima wa Misili. 17 Nijova yati nikuvawusa mukung'ahika kwinu ku Misili uko na kuvapeleka mulima wa Vakanani na Vahiti na Vaamoli na Vapelizi, na Vahivi na Vayebusi, yati nikuvapeleka mulima uvaha na weunaludaka lwabwina kwa kudimila mifuya yamahele na kulima."

18 "Vene yati vakuyuwanila, ni veve pamonga na vagogo va Islaeli yati mukumuhambila nkosi wa ku Misili na kumjovela, ‘Bambu, Chapanga wa Vaebulania, atihumili. Hinu utileke tihambi lugendu lwa magono gadatu kulugangatu, tikamuwusila luteta Bambu, Chapanga witu.’ 19 Nimanyili kuvya nkosi wa Misili yati akuvaleka lepi muwukayi chagali kulazimiswa kukita chenicho. 20 Hinu yati niyinula chiwoko changu na kuvatova Vamisili kwa vindu vya kukangasa genikugakita kwenuko. Mwanakandahi nkosi yati akuvaleka muhambayi.

21 Na nene yati nikuvakita Vamisili vavakitila mambu gabwina Vaisilaeli, muni pemwiwuka pa Misili mkotoka kuwuka changali chindu. 22 Mdala yoyoha Muebulania yati akumyupa Mmisili wa papipi yaki, amala myehe mweavili munyumba yaki, ampela ga feza na zahabu pamonga na nyula. Vyenivyo yati mukuvawalika vana vinu vagosi na vadala. Ndi chemwitola vindu vya Vamisili."