1 "Yati utengeneza mazabahu kwa mbawu za msonobali yakuwusila luteta lwa ubani. 2 Mazabahu ya luteta lwenulo wivya na pandi zeziwanangana utali waki na upana zivya sendimita alubaini na mhanu, na kunyoleka kwaki sendimita tisini. Na kona zaki zikamulana na mazabahu ya luteta yene. 3 Gubika zahabu yabwina mazabahu yoha ya luteta, upandi wa kunani na kona zaki mewa gubika cha kutindisila ukingu wa zahabu. 4 Tengeneza pete mcheche za zahabu zivili kuni na zivili kungi na kuvika pahi ya ukingu wa pandi zivili zezilolesana, pete zenizo yati zivya za kuvikila mikamulilu lukumbi lwa kugega. 5 Mikamulilu yeniyo yivya ya mkongo wa msonobali na igubikwa zahabu. 6 Vika mazabahu yeniyo kulongolo ya lipazia lelivii kulongolo ya Lisanduku la Lilaganu, panani ya ndi pandu pa ulekekesa na nene yati nikonganeka na veve Pandu penapo ndi penikonganeka na veve. 7 Kila ligono lukela Haloni peiyingila kutendekela hahi zezivili penapo, yati ihukisa ubani weunungalila bwina panani ya mazabahu yeniyo. 8 Kangi yati ihukisa ubani lukumbi lwa kimihi peipambika hahi. Luteta ulu lwa ubani uwusiwa magono goha changali kuleka muviveleku vinu vyoha palongolo ya Bambu. 9 Kotoka kuhukisa ubani wowoha weubesiwi pa mazabahu amala luteta lwa chinyama cha kutinyisa amala luteta lwa mabenu amala kuyitilila luteta lwa mnyweso. 10 Haloni iganikiwa kukita utepulanisa panani ya kona mazabahu penapo mala yimonga mumwaka. Yati ikita utepulanisu kwa ngasi ya luteta lwa kulekekeswa kubuda mala yimonga kila mwaka muviveleku vinu vyoha muni mazabahu yeniyo ndi yamsopi neju na ihaguliwi kwa Nene Bambu."

11 Bambu akamjovela Musa, 12 "Kila peukuvavalanga Vaisilaeli, kila mmonga yati akunilipa Nene Bambu kugombola wumi lukumbi lwa kuvalangiwa kwaki muni pakotokuvya na matamu gahakau. 13 Kila mmonga mweivya mukuvalangiwa ndi iganikiwa alipa ngati gilamu sita za zahabu kulandana chipimu chehavikiwi lukumbi lwenulo mu Lindanda la kukonganekela na Bambu. Lwenulu ni luteta lwaki lweakuniwusila. 14 Kila mmonga mweivalangiwa kutumbula miyaka ishilini amala neju, yati iganikiwa kunilipa Nene Bambu. 15 Mkolo vindu vyamahele akotoka kuwusa neju ya chipimu chechivikiwi, mewawa mgangu akotoka kulipa padebe ya chipimu chechivikiwi, lukumbi peilipa ugombola wa wumi. 16 Veve yati upokela mashonga ago ga upataniso kuhuma kwa Vaisilaeli, na veve yati ukuyitumila kwa lihengu la Lindanda la kukonanekela na Bambu, yivya ukumbuso kwa palongolo ya Bambu kuvya vaugombwili wumi wavi."

17 Bambu akamjovela Musa, 18 "Tengeneza linkeve livaha la shaba weuna chitamilu cha shaba ndava ya kujinyambisila, ulivika pagati ya Lindanda la kukongaanekela pamazabahu, na usopa manji mugati yaki. 19 Haloni na vana vaki vagosi yati vitumila manji ago kusanja magendelu na mawoko. 20 Vakita chenicho kwakona kuyingila mu Lindanda la kukongaanekela palongolo ya Bambu amala kuvya papipi na mazabahu muni kuniwusila luteta lwa kutinyisa Nene Bambu, muni vakotoka kufwa. 21 Viganikiwa kusanja mawoko na magendelu gavi muni vakotoka kufwa. Ndi viganikiwa kukita checho magono goha, kuhumila Haloni mbaka chiveleku chaki, chiveleku mbaka chiveleku."

22 Bambu akamjovela Musa, 23 "Tola viungu vyabwina ngati, manemane ya manji kilo sita na mdalasini weunungalila bwina kilo zidatu na miguva yeyinungalila bwina kilo zidatu, 24 na mdalasini wa aina yingi kilo sita na vipimu vyenivyo vyoha vivya kulandana na chipimu cha Lindanda la kukonganekela na Bambu, tola na mahuta ga zeituni lita mcheche. 25 Kwa kutumila viungu vyenivyo tengeneza mahuta ga msopi gahangisanwa na fundi wabwina wa mahuta geginungalila. Genago yati gitumika kuvitendekeha vindu ndava ya lihengu la Bambu. 26 Tumila mahuta ago kunyala mu Lindanda loha la kukonganekela na Bambu, na Lisanduku la Lilaganu, 27 meza na vindu yoha na chindu cha kuvikila hahi cha hahi na vindu vyaki, na mazabahu ya kuhukasila ubani, 28 mewawa unyala mazabahu ya luteta lwa kutinyisa na vindu vyaki yoha na nkeve na chitamilu chaki. 29 Yati ukuvinyambisa vindu ivyo ndava yangu vivya vyamsopi neju, chochoha chechipamisa vindu ivyo yati chivya chamsopi. 30 Kangi mnyala mahuta Haloni na vana vaki vagosi na kuvawusa kwangu muni vanihengela ngati vamteta. 31 Vajovela Vaisilaeli kuvya aga yati givya, ‘Mahuta gangu gamsopi gahengeka kunyala viveleku vinu vyoha. 32 Katu, mahuta aga akotoka kumyitalila mundu yungi yoyoha angavya mteta, mewa mkoto kutengeneza mahuta gangi ngati aga, aga ndi mahuta gamsopi na yiganikiwa gavya gamsopi magono goha kwinu. 33 Yoyoha mweitengeneza mahuta ngati aga amala kumyitalila mundu mwangavya mteta, yati ivikwa patali na vandu vaki.’ "

34 Bambu akamjovela Musa, "Tola vipimu vyeviwanangana na viungu vyevinungalila bwina, ngati malila ga natafi na malila ga shekeleti ga malila ga kelibena na ubani bwina. 35 Gahengewayi na fundi mweimanya bwina kutengeneza ubani weunungalila, sopa mwinyu muni uvya bwina na msopi. 36 Kangi yaga na kukita uhembe nyililili, na uhengeka mu Lindanda la kukonganekela na Bambu unyala mu Lisanduku la Lilaganu, pandu penikonganeka na veve, wenuwo yati uvya ubani wamsopi neju kwinu. 37 Katu mkotoka kutengeneza ubani wungi wowoha ngati uwu ndava yinu mwavene. Muni ubani wenuwo yati chivya chindu chamsopi palongolo yangu Nene Bambu. 38 Yoyoha mweitengeneza ubani ngati wenuo na kutumila mwene, yati ivikwa patali na vandu vaki."