1 "Na veve Musa umleta kwangu mlongo waku Haloni, pamonga na vana vaki vagosi ndi Nadabu na Abihu na Eleazali na Itamali uvahagula pagati ya Vaisilaeli, muni vanihengela ngati vamteta. 2 Umtotela mlongo waku Haloni nyula zikulu za chimteta muni alolekana mweavi na ukulu na utopesa. 3 Valagiza mafundi voha venivapelili umanya uvajovela vamtengenezela Haloni nyula muni anyambiswa ndava ya lihengu la uteta. 4 Vajovela vamtengenezela vindu ivi, kahaku ka panganga na chizibau na ligwanda litali na likoti lelinyambili, chinyemba na mkungi. Mlongo waku Haloni na vana vaki vagosi vawala na vanihengela ngati vamteta. 5 Mafundi venavo yati vitumila wuzi wa langi ya buluu, na zambalau na gadung'u na nyula za msopi na wuzi wa zahabu weubotiwi bwina."

6 "Vatengeneza kahaku ka pakanganga kwa wuzi wa zahabu na wuzi wa buluu na zambalau na yidung'u na nyula za msopi yeyibotiwi, na kutotwa bwina na mtota mweimanya bwina lihengu laki. 7 Yati livya na nyosi zivili za kukungila mumavega zezitotiwi mupandi zaki zivili. 8 Mkungi utengenezwa kwa vindu ivi, wuzi wa zahabu na mangoma ga buluu na zambalau na yidung'u, na nyula yamsopi yeyibotiwi na kuwunganishwa na ligwandwa ilo. 9 Kangi tola maganga gavili ga sadoniki na kuhongola panani yaki mahina ga vana vagosi kumi na vavili va Isilaeli. 10 Mahina sita muliganga la kutumbula na mahina sita gegasigalili muliganga la pili, mahina galandana ngati chevavelikwi. 11 Uyandika kwa kuhongola mahina ago panani ya maganga ngati sonala chaiviki muhuli, kangi uganyambisa maganga ago na kusopa muchikamulilu cha zahabu 12 Maganga genago gavili yati givikwa panani ya vipandi na kukunga mumavega muni kukumbuka makabila kumi na gavili ga Isilaeli. Hinu Haloni awala mahina ago mumavega gaki palongolo yangu nene Bambu ndava ya ukumbuso. 13 Utengeneza luvecha zivili kwa zahabu yabwina, 14 na ukufu mivili ya zahabu yeyibotiwi ngatia nyosi, yati ukuyikunga mikufu yeniyo muluvecha lwenulo."

15 "Yati utengeneza ligwanda la panganga ka ndava ya kukita uhamula, katengenezwa na mtota mweimanya bwina lihengu laki, kwa zahabu na wuzi wa langi ya buluu na langi ya zambalau na langi ya yidung'u na nyosi za msopi zeyibotiwi. 16 Kahaku kenako kawanangana pandi zoha, chechina utali wa sendimita ishilini na hivili na upana sendimita ishilini na zivili na kugunywa pandi zivili. 17 Matika kwa misitali mcheche ya maganga ga mashonga gamahele, msitali pakutumbula pavya na akiki na manjanu na alimasi yidung'u, 18 mstali wa pili uvya na zumalidi na johali ya samawati na alumasi ya msopi, 19 msitali wa datu pavya na yashito na akiki yidung'u na ametisito, 20 na msitali wa mcheche pavya na zabalajadi na sadoniki na yasipi, yoha yisopewa muluvecha lwa zahabu. 21 Hinu, mumaganga ago kumi na gavili ga mahina ga vana va Isilaeli. Kila liganga limonga liyandikwa kwa kuhongola lihina limonga ngati ulangisu wa kulangisa makabila goha kumi na gavili. 22 Ndava ya kahaku ako ka panganga, yati utengeneza mikufu ya zahabu yabwina yeyibotiwi ngati nyosi. 23 Mewawa yati utengeneza pete zivili za zahabu ndava ya kahaku ka panganga na kusopa mumihana ya kahaku kenako, 24 na mikufu yivili ya zahabu ukunga mupete zenizo zezivili panani ya nganga. 25 Ncha zivili za ukufu wa zahabu yati ukuzikamulisa muluvecha lweluvii mumavega ziwunganiswa na nyula ya kugubika nganga pandu pa kulongolo. 26 Kangi tengeneza pete zivili za zahabu na kusopa muncha zivili za pahi upandi wa mugati wa kahaku ka panganga papipi na chizibao. 27 Kangi yati utengeneza pete zingi zivili za zahabu na kusopa palongolo ya ncha ya pahi ya hipandi ya ligwanda, pahala pepiwungana na mkungi weubotiwi bwina. 28 Kahaku ka panganga yati kiwunganisa pete na ligwanda kwa nyosi ya buluu, muni kahaku ka panganga kakotokulogola muni kakamulila mkungi weutiviwi bwina."

29 "Haloni peiyingila pahala pamsopi, yati iwala ligwanda la panganga lelina mahina ga makabila ga vana va Isilaeli, muni nene Bambu yati nikuvakumbuka. 30 Mukahaku kenako yati ivika maganga gavili ga Ulimu na Tumimu gayinjila panganga ya Haloni muni ahotola kumanya gala Bambu geigana. Ndi lukumbi lwenulo iganikiwa kuwala kahaku kenako muni amanya chenigana kwa Vaisilaeli."

31 "Yati utota ligwanda litali la kuwala mugati ya chizibao kwa chitambala cha langi buluu. 32 Yivya na fwasi ya kupitisila mutu pagati, na fwasi yeniyo yati yitindisiwa lugunyilu weutotiwi muni yikoto kupapuka. 33 Mulugunyilu waki wa pahi, kutindila upandi woha, yati uning'inisa makomamanga ga buluu, na zambalau na yidung'u, kuvya mewa na njuga ya zahabu pagati ya ago makokomanga. 34 Kutindila nyula yoha kuvya na makoamamanga na njuga za langi zahabu. 35 Haloni yati iwala nyula yeniyo lukumbi peihenga lihengu laki la uteta. Na lwami lwa njuga lwaki yati luyuwanika lukumbi peiyingila pandu Pamsopi palongolo ya Nene Bambu na lukumbi peihuma, muni akotoka kukomewa."

36 "Kangi yati utengeneza chibati cha zahabu yabwina na uchola panani yaki ngati mundu cheichola muhuli, ‘Awusiwi ndava ya lehengu kwa Bambu.’ 37 Chibati chenicho yati ukuchikunga palongolo ya chinyemba kwa mkungi wa buluu. 38 Haloni yati iwala chibati chenicho pachiwungi chaki, na yati itola mabudilu ga Vaisilaeli gevahokili lukumbi peviwusa luteta, hinu mabudilu goha yati givya ga Haloni."

39 "Yati mumtotela Haloni ligwanda litali yelinyambiswi kwa chitambala chamsopi neju na kumtotela chinyemba cha wuzi wamsopi neju na mkungi weunyambiswi bwina."

40 "Yati ukuvatengenezela vana va Haloni magwanda gatali na mikungi na kofia muni valolekana kuvya na ukulu na vana utopesa. 41 Yati ukumuwalika mlongo waku Haloni na vana vaki vagosi nyula zenizo. Kangi uvanyala mahuta ga zeituni na kuvawusa ndava ya lihengu la Bambu, muni vahotola kunihengele ngati vamteta. 42 Mewawa yati ukuvatotela vibudula ya chitambala chamsopi zezigubika kuhumila muchiwunu mbaka mumawondo, muni kugubika wotelu wavi. 43 Haloni na vana vaki yati viwala kila peviyingila mu Lindanda la msopi, amala pevivya papipi na pandu kuwusila luteta, kuhenga lihengu la uteta pandu pamsopi. Muni vakotoka kukomewa kwa kulangisa wotelu wavi. Genaga ndi malagizu ga magono goha kwa Haloni na vachiveleku vaki."