1 Bezaleli atenganizi Lisandu kwa mbawu za msonobali, utali waki wavi sendimita miya yimonga na kumi na upana waki sendimita sitini na sita, na kunyoleka kwaki sendimita sitini na sita. 2 Agubiki zahabu yabwina mugati na kuvala na kukita ukingu pandi zoha. 3 Kangi atenganizi pete mcheche za zahabu za kugegela, akavika pete zivili upandi umonga wewilolesana na pete zivili upandi wungi wewilolesana. 4 Atenganizi na mikamulilu ya msonobali na kugubika kwa zahabu. 5 Vayingisi mikamulilu yila mupete za pandi zivili zezavi mu Lisanduku, ndava ya kugegela. 6 Kangi atenganizi chigubiku cha lipyana kwa zahabu yabwina, utali waki sendimita miya yimonga na kumi, na upana waki sendimita sitini na sita. 7 Kangi atenganizi viumbi vyevina magwaba gavili kwa kukita lufumba lwa zahabu mumihana ya chigubiku chenicho, 8 chiumbi chimonga upandi uwu na chingi upandi wungi. Atenganizi viumbi vyevii na magwaba kuvya chindu chimonga na chigubiku. 9 Viumbi vyalolini, na magwaba gavi gatalambuliwi kugubika chigubiku cha Lisanduku, pamihu pavi palolini na chigubiku wa Lisanduku.

10 Mewawa atenganizi meza ya msonobali yeyavii na utali wa sendimita semanini na nane, na upana sendimita alubaini na mcheche, na kunyoleka kwaki sendimita sitini na sita. 11 Agubiki kwa zahabu yabwina na kutengeneza ukingu wa zahabu na kutindisila pandi zoha. 12 Atindisili mvilingo wa ubau weuna upana wa sendimita sabini na mhanu, na kukita ukingu wa zahabu. 13 Atenganizi pete mcheche za zahabu na kuzivika pamagendelu. 14 Pete zenizo zivikiwa mikamulilu ya kugegela, zivya papipi na ukingu wa meza. 15 Mikamulilu yeniyo ya kugegela yatenganizwi kwa mkongo wa msonobali na kugubikwa kwa zahabu. 16 Vindu vyoha vya meza atenganizi kwa zahabu yabwina, sahani na visahani ndava ya ubani vikombi na nkeve ndava ya luteta lwa mnywelelu.

17 Atenganizi chibokoselu cha hahi kwa zahabu yabwina. Chitamilu chaki na lungoda lwa chituvilu chenicho chavili chindu chimonga na vikombi vyaki, vikonyo vyaki na maluva gaki vyoha vyavi chindu chimonga.

18 Mambanda sita gahumalili pandi zoha za lumbagalu lwaki, mambanda gadatu upandi umonga na mambanda gadatu upandi wungi. 19 Mukila limbanda limonga mumambanda ago sita kwavii na hikombi vidatu luhumu lwa maluva ga mlozi, kila limonga na chikanyo na liluva laki. 20 Pagati ya chindu cha kuvikila hahi kwavi na vikombi mcheche luhumu lwa maluva ga mlozi, pamonga na vikonyo vyaki na maluva gaki. 21 Pandu pala pahumalili jozi zidatu za mambanda, pahi yaki kwavi na chikonyo chimonga. 22 Matumba na mambanda, na chindu cha kuvikila hahi chavi chindu chimonga, na chakitiwi lufumbu lwa zahabu yabwina. 23 Kangi atenganizi hahi saba, chindu cha kuwusila uchafu muhutambi na tusahani twaki kwa zahabu yabwina. 24 Atenganizi chindu cha kuvikila hahi icho na vindu vyaki kwa kilo selasini na mhanu ya zahabu ya bwina.

25 Atenganizi mazabahu ndava ya kuhukisila ubani kwa mbawu za msonobali. Madhabahu yeniyo yawanini sendimita alubaini na mhanu kwa sendimita alubaini na mhanu, na kunyoleka kwaki sendimita tisini. Mumihana ya mazabahu kuwusila luteta lwenulo yavili chindu chimonga na mazabahu yene. 26 Yoha agubiki zahabu yabwina, upandi waki wa kunani, upandi wa luvavu na mang'elu gaki, kangi atenganizi ukingu wa zahabu kutindila mazabahu. 27 Atenganizi pete zivili za zahabu na kuwunganisa pahi ya ukingu mupandi zivili zeziwanana. Pete zenizo zahengiki kukoveka mikamulilu ya kugegela mazabahu yeniyo. 28 Atenganizi mikamulilu mivili ya msonobali na kugubika zahabu.

29 Mewa Bizaeli atenganizi mahuta ga unyambiso na ubani wabwina weunungalila bwina, lihengu la mundu mweitengeneza mahuta geginungalila bwina.