1 Genaga ndi mahina ga vana vagosi va Yakobo, vevahambili ku Misili pamonga nayu, kila mmonga na vana vaki 2 Lubeni na Simoni na Lawi na Yuda, 3 na Isakali na Zebuloni na Benjamini, 4 na Dani na Nafutali na Gadi na Asheli. 5 Chiveleku choha cha Yakobo chavili vandu sabini. Lukumbi lwenulo Yosefu avili amali kulongolela kutama ku Misili kula. 6 Kangi Yosefu na valongo vaki na chiveleku chila choha vafwili. 7 Nambu chiveleku cha Yakobo chayonjokisi neju, vakavya vamahele na vevana makakala neju, vakadandasika pahali poha ku Misili.

8 Pamwishu, nkosi mmonga mweanga mmanya Yosefu, akatumbula kulongosa kula ku Misili. 9 Ni mwene akavajovela vandu vaki, "Mlolayi Vaisilaeli chevavili vamahele na vakutiyogopesa. 10 Tiganikiwa kulonda njila ya kuvakita vakotoka kuyonjoseka, ngati lepi yati vivya vamahele na peyihumila ngondo yati viwungana na makoko vitu na kutovana na tete, na kuwuka pamulima uwu." 11 Hinu vakavavika vayimalila muni vavayimalila Vaisilaeli na kuvang'aha kwa mahengu geginonopa, ni vene Vaisilaeli pamiji ya Pitomu na Lamasesi vakajenga litala la kuvikila vindu vya nkosi. 12 Nambu chevavang'aisi neju ndi na vene chevayonjokisi na kudandasiki pamulima woha. Penapo ndi Vamisili vavayogwipi neju va Isilaeli. 13 Hinu, Vamisili vavahengisi mahengu geginonopa neju Vaisilaeli. 14 Mukutama kwavii vavili mukung'ahika neju ndava ya kuvahengesa mahengu ga kugima chokaa na kufyatula matofali, na mahengu goha ga mumigunda. Mumahengu goha ago vahengiswi changali lipyana.

15 Kangi nkosi wa Misili akavajovela, "Shifula na Pua vevivelekesa vana, vevakuvatangatila vadala va Chieblania kuveleka, 16 pemukuvavelekesa vadala va Chieblania mlola bwina, yikavya mwana mgosi, mumkomayi, nambu ngati mdala mumlekai mumi." 17 Nambu vevivelekesa vana vala vevamtopisi Chapanga, ndi vakitili lepi ngati chevalagaziwi na nkosi wa Misili, ndi vavalekili vana vagosi mumi. 18 Hinu nkosi akavakemela vevivelekesa vala akavakota, "Ndava kyani mkitili chenichi? Ndava kyani muvalekili vana vagosi mumi?"

19 Vene vakamyangula, "Vadala va Chieblania vavii lepi ngati vadala va Misili. Vene visindimala, kwakona mundu mweivelekesa kuhika vene vivya vamali kuleka." 20 Hinu Chapanga akavamotisa neju vevivelekesa vala, na Vaisilaeli vayonjokisi neju na kuvya na makakala. 21 Chapanga avahotwisi vevivelekesa vala kupata vana vavi, ndava vamtopisi Chapanga. 22 Pamwisu nkosi akavalagazila vandu vaki voha, "Mwana yoyoha msongolo mweivelekewa kwa Vaebulania vamtagayi mumfuleni Naili. Nambu akavyai mwana mdala mumlekayi."