1 Bambu akamjovela Musa, 2 "Nene nimuhagwili Bezaleli, mwana wa Uli, na mjukulu wa Huli wa likabila la Yuda, 3 na kummemesa Mpungu wangu Msopi. Nimpelili umanya na luhala na uhotola na kila namuna ya ufundi, 4 muni ahotola kuhololela bwina namuna ya kukita chindu na kutengeneza kwa kukita lufumbu lwa zahabu na feza na shaba. 5 Nimpelili umanya wa kudumula maganga ga kupambila, kuhongola mbawu na umanya wa kila namuna ya ufundi. 6 Mewawa nimuhagwili Oholiabu mwana wa Ahisamaki, wa likabila la Dani, akita lihengu nayu. Mewawa nivapelili vandu vangi uhotola uvaha ndava ya mahengu ndalindali, muni vahotola kukita kila chindu chenilagizi chikitiwa vindu vyene: 7 Lindanda la kukonganekela na Bambu, Lisanduku la Lilaganu na chigubiku chaki, pamonga na vindu vyaki vyoha, 8 meza na vindu vyaki na chindu cha kuvikila hahi cha hahi na vindu vyaki, na mazabahu ya kuhukisila ubani, 9 Mazabahu ya kutinyisa na vindu vyaki vyoha, nkeve wa manji pamonga na chitamilu chaki, 10 nyula zamsopi za mteta Haloni na vana vaki vagosi geviwala lukumbi lwa pevikita lihengu la uteta, 11 mahuta ga kuvayitila na ubani weunungalila bwina ndava ya Pandu Pamsopi. Vindu ivyo vyoha vitengenezwa kulandana njwe na chenikulagizi."

12 Bambu akamjovela Musa, 13 Vajovela naha Vaisilaeli, "Nyenye yati mlanda Ligono la Kupumulila langu, muni wenuwo ndi ulangisu pagati yinu na nene muviveleku vyoha kuvya Nene ndi Bambu ndi mwenivahagwili kuvya vandu vangu. 14 Yati mukulilanda Ligono la Kupumulila ndi yati livya la msopi. Yoyoha mweakulihakasa ligono lenilo iganikiwa kukomewa, na mundu mwaihenga lihengu ligono lenilo yati ivalangiwa lepi mmonga wa vandu vangu. 15 Yati muhenga lihengu magono sita, nambu ligono la saba ndi Ligono la Kupumuliala, ligono langu la Msopi. Mundu yoyoha mweihenga lihengu ligono lenilo ikomewa. 16 Hinu Vaisilaeli yati vilanda Ligono la Kupumulila muviveleku vyavi vyoha ngati ulangisu wa Lilaganu la magono goha gangali mwishu. 17 Lijambu lenili yati livya ulangisu magono goha pagati yangu na Vaisilaeli, muni Nene ndi Bambu, nawumbili kunani na mulima mumagono sita, nambu muligono la saba nalekili kuhenga lihengu nikapumulila."

18 Bambu peamalili kulongela na Musa kuchitumbi Sinai, akampela Musa vibawu vivili vya maganga vyevyayandikwi malagizu kwa lungonji lwaki mwene.