1 Bambu akamjovela Musa, "Hongola vibawu vivili vya maganga ngati vila vya kutumbula, na nene yati niyandika malovi gala gegavili muvibawu vila vya kutumbula vyawadenyili. 2 Ujitendekeha chilau lukela ubwela kukonganeka na nene kunani ya chitumbi Sinai. 3 Kotoka kubwela na mundu yoyoha, mewawa akotoka kuwonekana popoha pachitumbi yivya mambelele amala ng'ombi amala mene vakotoka kudimila papipi na chitumbi." 4 Hinu Musa akahongola vibawu vingi vivili vya maganga ngati vya kutumbula. Akawuka lukela pehe, akakwele kuchitumbi Sinai, akatola vibawu vivili vila mumawoko gaki ngati Bambu chamlagizi.

5 Bambu akahuluka mulihundi, akayima pamonga na Musa, akaliluwula lihina laki, Bambu. 6 Kangi Bambu akapita palongolo ya Musa akakokosa kavili, "Nene ndi Bambu, Bambu Chapanga mweavii na lipyana na ubwina mewa nivi lepi na ligoga la kanyata nimemi uganu wamahele na usadikika. 7 Nikuvahengela lipyana vandu maelufu kwa maelufu, mewa nikuvalekekesa vahakau na vevahokili na vabudanu, nambu nileka lepi kuvatova vevahokili, nikuvatova vana na vajukulu vavi ndava ya mabudilu ga dadi vavi, hati chiveleku cha datu na mcheche."

8 Bahapo Musa akafugama mbaka pai na akamgundamila Chapanga. 9 Kangi akajova, "Bambu wangu, ngati uniyidakili nene palongolo yaku ndi nikuyupa uhamba na tete. Hati ngati vandu ava vana mitima yeyivinonopa, nambu utilekekesa uhakau witu na mabudilu gitu, utiyidakila ngati tavandu vako wamwene."

10 Bambu akamjovela Musa, "Hinu nikita Lilaganu na vandu vaku. Yati nikita chinamtiti yivaha palongolo yavi yangahengeka kumulima woha, amala mumuji wowoha. Na vandu voha vevitama pagati yavi yati vilola matendu gangu gakulu, Nene Bambu yati nihenga lijambu livaha ndava yaku. 11 Mkamula malagizu genivapelili lelu. Yati nikuvavinga palongolo yinu Vaamoli na Vakanani na Vahiti na Vapelizi na Vahivi na Vayebusi. 12 Mujiyangalila mkotoka kukita Lilaganu na vandu va mulima wemukuuhambila muni ukakita lijambu lenilo yati livya lingongeka kwinu. 13 Ila yati mubomola mazabahu na kudenya mapanda gavi na michapanga vyavi vya Ashela."

14 "Mkotoka kuyupa chapanga yungi yoyoha, muni nene Bambu nimanyikana kwa lihina ‘Mwe nina wihu’ Nene ndi Chapanga mwenina wihu. 15 Mkotoka kuvika Lilaganu na vandu vevitama mulima wenuwo, muni peviyupa michapanga vyavi na kuwusila luteta yati vakuvagongolela, na kuvakofya mlya yakulya chevawusili luteta kwa michapanga yeviyupa, 16 na vasongolo vinu vakagega vasikana vavi veviyupa michapanga, vasikana venavo yati vakuvakofya kuyupa michapanga vyavi."

17 "Mkotoka kutengeneza michapanga ya lyuma na kuzigundamila."

18 "Yati mselebuka mselebuko wa mabumunda gangali hamila. Yati mwilya mabumunda gangali hamila mulukumbi lwa magono saba mumwehi weupangiwi weukemiwa Abibu ngati chanavalagizi, muni mumwehi wuwowo wa Abibu mwawukili kumulima wa Misili."

19 "Kila mveleka mgosi wa kutumbula ndi wangu, mewawa na vaveleka vagosi va mifuya yaku yoha ya ng'ombi amala mambelele. 20 Mveleka wa kutumbula wa punda yati ukumgombola kwa kuniwusila limbelele. Ngati ukumgombola lepi ndi ukoma kwa kudodoyola singu yaki. Vana vinu voha vagosi vevavi vaveleka vakutumbula yati mukuvagombola. Mundu yeyoha akotoka kubwela changali luteta mumawoko palongolo yangu."

21 "Yati mkita mahengu ginu mumagono sita, nambu ligono la saba yati mpumulila, hati ngati yikavya lukumbi lwa kugaba amala kubena."

22 "Yati mwiselebuka mselebuko wa mabenu, lukumbi pemtumbula kubena mabenu ga kutumbula ga nganu, na yati mselebuka mselebuko wa vindanda mwishu wa lusenje lwa kugaba pemwimala pemwikusanya mabenu na matunda ginu."

23 "Vagosi yati vikonganeka palongolo yangu nene Bambu, Chapanga wa Isilaeli mala yidatu kwa mwaka. 24 Yati nikuvavinga vandu va milima yingi palongolo yinu na kupanula mibaka yinu. Kawaka mundu mweilinga kuvatova muni kuvanyaga mulima winu lukumbi pemkonganeka kuselebukila mselebuko wenuwo nene Bambu, Chapanga winu mala datu kila mwaka."

25 "Mkotoka kuniwusila ngasi ya luteta lwangu pamonga na libumunda levasopili hamila, mewa luteta lwa mselebuko wa Pasaka lukotoka kusigalila mbaka lukela."

26 "Mabenu ga kutumbula ga ndima yaku yati ukugaleta panyumba yangu nene Bambu waku."

"Kotoka kuvilisa mpapakasi wa limbelele amala mwana wa mene mweinyonga mumavele ga nyina waki."

27 Bambu akamjovela Musa, "Yandika malovi aga, muni kulandana na malovi aga, yati nikita Lilaganu na veve na vandu va Isilaeli." 28 Musa akatama kuchitumbi uko pamonga na Bambu magono alubaini, muhi na kilu, alili lepi chakulya mewa anywili lepi manji. Ayandiki panani ya vibawu malovi ga Lilaganu ndi gala malagizu kumi.

29 Musa peahuluka kuhuma kuchitumbi Sinai kuni avili na vibawo vivili vyevina vyeviyandikwi malagizu kumi mumawoko gaki, pamihu paki ping'asima ndava muni alongela na Bambu mwene amanyili lepi kuvya. 30 Haloni na vandu va Vaisilaeli voha pavamuweni Musa pamihu paki ping'asima vayogwipi kumhegelela. 31 Nambu Musa amkemili Haloni na vachilongosi voha va vandu va Isilaeli vahamba papipi nayu, kangi akalongela nawu. 32 Mwanakandahi Vaisilaeli voha vakahegelela papipi yaki, na mwene akavapela malagizu goha geapewili na Bambu kuchitumbi Sinai 33 Musa peamalili kulongela na vandu akagubika pamihu paki kwa chitambala. 34 Nambu yavi lukumbi lwoha Musa peahambili ku Lindanda la kukonganekela kulongela na Bambu ndi awusili chitambala chila mbaka peahumili kuvala. Na peahumili kuvala ya Lindanda avajovili Vaisilaeli mambu goha gealagizwi. 35 Vaisilaeli vamuwene pamihu paki ping'asima, ndi Musa agubiki kangi pamihu paki kwa chitambala mbaka peahambili kavili kulongela na Bambu.