1 Vaisilaeli voha vawukili, vahikili lugangatu lwa Sini pagati ya Elimu na Sinai. Lenili lavii ligono la kumi na mhanu ya mwehi wa pili tangia pevahumili pamulima wa Misili. 2 Hinu, Vaisilaeli voha valungamikili Musa na Haloni kulugangatu kula, 3 vakajova, "Mbanga Bambu ngatikomili petavili kumulima wa Misili kwetatamili talili nyama na vyakulya vingi vyetaganili tayukwiti, nambu nyenye mutiletili kulugangatu uku kutikoma tavoha kwa njala!"

4 Ndi Bambu akamjovela Musa, "Nene yati nihulusa chakulya kuhuma kunani ngati fula, kila ligono vandu yati viyola chakulya cha ligono lenilo. Kwa njila yeniyo yati nikuvalinga nilola ngati vilanda malagizu gangu. 5 Nambu ligono la sita, pevitendelekela chakulya yati chiyonjokesa mala zivili pa chakulya cha ligono limonga."

6 Ndi, Musa na Haloni vakavajovela Vaisilaeli voha, "Kimihi yati mmanya kuvya Bambu ndi avawusili pamulima wa Misili! 7 Chilau lukela, yati mukuuwona ukulu wa Bambu muni ayuwini malungamiko ginu gemwalungamikayi. Tete ndi vayani hati mtilungamikila?" 8 Kangi Musa akajova, "Kimihi Bambu yati akuvapela nyama mlyai, na lukela yati akuvapela mabumunda mlyai myukuta, muni mwene ayuwini malungamiko gemwalungamika. Tete ndi vayani nambu mutilungamikila? Mkoto kutilungamikila tete ndi mumlungamikila Bambu."

9 Kangi Musa akamjovela Haloni, "Vajovela Isilaeli voha vakonganeka palongolo ya Bambu muni ayuwini malungamko ginu." 10 Lukumbi Haloni pealongela na Vaisilaeli, vandu voha valolili kulugangatu, chigafula ndu ukulu wa Bambu wawonikine kumahundi. 11 Bambu akamjovela Musa, 12 "Nigayuwini malungamiko ga Vaisilaeli. Hinu vajovela kuvya kimihi yati vilya nyama na lukela yati vilya mabumunda. Penapo yati vimanya kuvya Nene ndi Bambu, Chapanga wavi."

13 Hinu, lukumbi lwa kimihi gakabwela makwali gamahele, na kudandasika pandu poha, na lukela ukahumila mbetu ukavya mumihana ya pandu pevavikili mandanda kutama. 14 Mbetu wenuo pawawukili, vyawonikini vipandii videbe videbe ngati vya fula ya maganga kulugangatu. 15 Vaisilaeli pavalolili vamanyili lepi chindu chenicho vakakangasa, vakakotana, "Kyani chenichi?" Hinu Musa akavajovela, "Lenili ndi chakulya chempewili na Bambu mlyai.

16 Bambu alagizi mkita naha, kila mundu ayola kwa chipimu chaihotola kulya, anonga vibaba vivili kwa kila mundu mu Lindanda laki."

17 Hinu Vaisilaeli vakitili chenicho, vangi vanongi gamahele na vangi padebe. 18 Nambu pavapimili, vamanyili kuvya mwanongili neju avili lepi na chiyonjokesu na mwanongili padebe apungukiwi lepi. Kila mundu anongili chaahotwili kulya. 19 Musa akavajovela vandu, "Mundu yoyoha akotoka kuleka chakulya chenicho mbaka lukela." 20 Nambu vandu vamuyuwanili lepi Musa, vangi vachilekili chakulya mbaka lukela. Nambu lukela chakulya chenicho chawolili na kuvya na masomi na kununga, Musa avayomili. 21 Hinu kila lukela kila mundu anongili chakulya chahotwili kulya, lilanga pelachona chakulya chila chayuywiki.

22 Muligono sita, Vaisilaeli vanongili chakulya neju, vibaba vivili kila mundu. Ndi vagogo va Isilaeli vamuhambili Musa vakamjovela lijambu lenilo. 23 Musa akavajovela "Genaga ndi malagizu ga Bambu chilau ndi Ligono la Kupumulila lelivikiwi ndava ya Bambu. Muhamba mukayocha amala mukateleka chakulya chemwigana lelu na chechisigalila muvika mbaka chilau." 24 Ndi vakakita ngati Musa chevajovili vakaleka chakulya chingi mbaka chilau yaki, lukela yaki chakulya chahalabiki lepi na kuvya na masomi. 25 Musa akavajovela, "Mulya chakulya chila chamwavikili golo, muni lelu Ligono la Kupumulila lelivikiwi ndava ya Bambu, yati mwipata lepi chakulya kuvala kwenuko. 26 Muligono la sita yati mnonga chakulya chenichi, nambu ligono la saba la Kupumulila yati chivya lepi."

27 Ligono la saba vandu nunuyu vahambili kulonda chakulya, nambu vapatili lepi. 28 Penapo Bambu akamjovela Musa, "Mbaka ndali yati mubela kuyidakila malagizu na mihilu yangu? 29 Mumanyai kuvya nene Bambu nivapelili Ligono la Kupumulila, ndi mana nivapelili chakulya cha magono gavili muligono la sita. Hinu mpumulila kila mundu panyumba yaki, mundu ya yoyoha akotoka kuwuka muligono la saba." 30 Hinu vandu vapumulili ligono la saba.

31 Vaisilaeli vachikemili chakulya chenicho "Mana." Chavili ngati mbeyu zidebe za mapemba ga msopi na kunoga kwaki kwavili ngati mabumunda gevasopili wuchi. 32 Musa akavajovela, "Lenili ndi lilagizu la Bambu, mutola chibaba chimonga na kuvika ndava ya viveleku vinu, muni valola chukulya chenavalisili kulugangatu lukumbi penavawusili ku Misili." 33 Musa akamjovela Haloni, "Tola lidenge lelina chigubiku sopa chibaba chimonga cha chakulya chechikemiwa mana na kuyivika palongolo ya Bambu, yivya ndava ya viveleku chinu vyevibwela." 34 Hinu, Haloni akavika mana pandu pamsopi palongolo ya Lisanduku la Lilaganu muni yivikiwa ngati Bambu chamlagizi Musa. 35 Vaisilaeli valili chakulya mulukumbi lwa miyaka alubaini, mbaka pavahiki pamulima wevatumbwili kutama, mulima wewavili mumbaka wa kanaani ndi kwevatamili. 36 Chipimu cha Omeli chiwanangana na vibaba vivili na Omeli yimonga yiyingila mala kumi muchipimu cha efa.