1 "Pa genago yati utengeneza Lindanda la kukonganekela kwa mapanzia kumi ga nyula za msopi zezibotiwi, na kwa mangoma ga buluu, zambalau na yidung'u. Mapanzia ago yati gitotewa kwa micholo ya viumbi vyevina magwaba. 2 Kila lipanzia yati livya na utali wa mita kumi na hivili na upana wa mita hivili. Mapazia ago gavya na chipimu chimonga. 3 Yati uwunganisa mapazia mhanu gavya chipandi chimonga na mapazia gangi mhanu gavya chipandi chingi. 4 Utotela lipogolo la buluu muligunyilu wa lipazia la mwishu la chipandi cha kutumbula, utotela mewawa pamwishu wa lugunyilu lwa kuvala lwa chipandi chingi cha pazia. 5 Yati usopa mapogolo hamsini mulipazia la kutumbula na mapogolo gangi hamsini mumhana wa pazia lapili, mapogolo goha galolana. 6 Kangi utengeneza vikovekelu hamsini ya zahabu muni kuwunganisa vipandi vivili vya mapazia, na kukita Lindanda livya chindu chimonga."

7 "Kangi yati utengeneza chigubiku cha Lindanda loha kwa kuhengela mapazia kumi na limonga gegatenganizwi kwa mangoma ga mene. 8 Kila lipazia yati livya na utali wa mita kumi na hidatu, na upana wa mita hivili. Mapazia ago goha kumi na limonga yati givya na chipimu chimonga. 9 Yati uwunganisa mapazia mhanu pamonga na mapazia gangi sita pamonga. Na lipazia la sita yati ukuligunya mala zivili palongolo ya Lindanda. 10 Kangi yati ukita mapogolo hamsini mumihana ya chipandi cha mwishu la chipandi cha kutumbula, na mapogolo hamsini mumihana ya chipandi cha mwishu cha chipandi cha pili. 11 Yati utengeneza vikovekelu hamsini vya shaba na kuyingisa mumapogolo hamsini ndava ya kuwunganisa vipandi vivili ndava ya kutengeneza chigubiku chimonga cha Lindanda. 12 Chipandi cha chigubiku chechisigalili yati ukuchivika upandi wa kuyetu wa Lindanda. 13 Mita yapinga ya lipazia yeyisigalili yati ukuligunya yilembelela pandi zoha za luvavu mwa Lindanda muni kuligukika."

14 "Yati utengeneza kangi chigubiku chingi wa Lindanda weutengenizwi kwa chikumba cha limbelele ligosi na panani yaki chigubiku cha chikumba nyilili."

15 "Yati utengeneza mbawu zezinyokili za msonobali ndava ya kuyimamisila Lindanda. 16 Kila ubawu yati uvya na utali wa mita mcheche, na upana wa sendimita sitini na sita. 17 Felemu zoha za Lindanda zavii na vipandi vivili vya kuwunganisila, muni felemu zenizo zihotola kuwunganiswa pamonga. Felemu zoha zaganikiwi zivya na vipandi vya viwunganisu 18 Utengeneza felemu ishilini zenizo zivya ndava ya upandi wa kusini wa Lindanda. 19 Vitamilu alubaini vya feza pahi ya felemu zenizo ishilini, vitamilu vivili pahi ya felemu zoha muni kukamulila viwunganisu vyaki zivili. 20 Tengeneza felemu ishilini zivya ndava upandi kunani wa Lindanda, 21 na vitamilu vyaki alobaini vya feza, vitamilu vivili pahi ya kila felemu. 22 Utengeneza felemu sita ndava upandi wa mumbele wa Lindanda lenilo weuvili kwelitipama lilanga. 23 Mewawa yati utengeneza felemu zivili ndava ya mukona ya Lindanda upandi waki wa mumbele. 24 Felemu za mumuhana ziwungana kuhumila kunani mbaka pahi mupete ya kutumbula. Felemu zoha za mumihana zikitwa mewawa muni kuvya na pembe zivili. 25 Ndi yati kwivya na felemu nane pamonga na vitamilu vyaki kumi na sita vya feza, vitamilu vivili pahi ya kila felemu."

26 "Yati utengeneza felemu za msonobali, mhanu ndava ya upandi umonga wa Lindanda, 27 felemu mhanu ndava ya upandi wa pili wa Lindanda na felemu mhanu ndava ya upandi wa mumbele wa Lindanda weuvili kwelitipama lilanga. 28 Felemu ya pagati lweluvili lwapinga lwa Lindanda yati lupita pagati kuhumila mwishu mbaka mwishu wungi wa Lindanda. 29 Felemu zoha yati ukuzigubika kwa zahabu na kutengenezela pete za zahabu zezikamulila felemu zenizo, ndi na zene yati ukuzinyala zahabu. 30 Hinu yati ukuliyimika Lindanda lenilo kulandana na luhumu lwenakulangisi kuchitumbi."

31 "Yati utengeneza lipazia la nyuzi za langi ya bululu, na zambalau na yidung'u na chitambala chamsopi. Lipazia lenilo yati ukulipamba kwa kutotela viumbi vyevina magwaba. 32 Yati ukulikoveka lipazia mumapanda mcheche ga msonobali gegagubikwi zahabu, zezina felemu za zahabu na vitamilu mcheche vya feza. 33 Koveka lipazia ilo muvikovekelu pahi ya chipagamilu cha Lindanda, kangi vika vipandi vivili vya maganga vyeviyandikwi malagizu mu Lisanduku la Lilaganu mumbele ya lipazia. Lipazia yati lilekenganisa pandu Pamsopi na Pamsopi neju. 34 Mugati ya pandu Pamsopi neju yati uvika chigubiku cha Lisanduku la Lilaganu. 35 Vika meza kuvala ya pandu Pamsopi pa Pamsopi neju upandi wa kasikazini wa Lindanda la msopi kangi vika chindu cha kuvikila hahi cha hahi upandi wa kusini mwa Lindanda la Msopi."

36 "Ndava ya pandu pa kuyingilila yati utengeneza lipazia kwa nyula za langi za buluu na zambalau na zidung'u na nyuzi yamsopi neju yabwina yeyibotiwi bwina na kulembwa bwina. 37 Mewawa yati utengeneza mapanda mhanu ga msonobali na kugubika zahabu. Mapanda genago yati givya na luvecha vya zahabu, na kila lipanda limonga yati livya na chitamilu cha shaba."