1 "Bezaleli na Oholiabu, pamonga na vagosi vala Bambu vevapewili uhotola na luhala lwa kumanya namuna ya kuhenga lihengu loloha mukujenga Lindanda la kukonganekela, yati ukita lihengu kulandana na goha gealagiziwi na Bambu."

2 Musa amkemili Bezaleli na Oholiabu na mundu yoyoha mweavi na umanya ndi Bambu avampelili uhotola, na kila mundu mtima waki ukumlongosa kukita lihengu lenilo kwa kugana mwene, Musa akavajovela vatumbula kuhenga lihengu. 3 Venavo vapokili kuhuma kwa Musa vindu vyoha vyevyawusiwi na Vaisilaeli kwa kugana vene ndava ya Lindanda la Msopi. Vandu vayendalili kuwusa vindu vyavi kila lukela. 4 Kangi vandu voha vevimanya bwina kujenga vajengili pa Lindanda la kukonganekela, ndi vawukili pamahengu gavi na kumuhambila Musa, 5 vakamjovela, "Vandu valetili vindu vyamahele neju kuliku vila vyeviganikiwa mulihengu letatilagizwi na Bambu kukita."

6 Hinu Musa akalagiza yoha pa kambi, "Mundu yoyoha, mgosi amala mdala, akotoka kuleta ndu neju ndava ya Lindanda la Msopi." Vandu valekili kuleta vindu, 7 muni vila vyevaletili vyatoshili kwa lihengu lenilo na vyasigalili.

8 Vagosi voha vevimanya neju vatenganizi Lindanda la kukonganekela na Bambu. Vatenganizi kwa kuhengela mapazia ga wuzi wa msopi neju weubotiwi, na kwa wuzi wa buluu na zambalau na udung'u, kwa kutotela viumbi vyevina magwaba. 9 Utali wa kila lipazia wavi na mita kumi na zivili na upana wa mita zivili. Mapazia goha gavii na chipimu chechiwanangana. 10 Awunganisi mapazia mhanu na kuvya chipandi chimonga na kukita mewawa kwa gala gangi. 11 Vatenganizi mapogolo ga buluu mulugunyilu wa lipazia la mwishu la chipandi cha kutumbula na mapogolo gangi mulipazia la mwishu la chipandi cha pili. 12 Avikili mapogolo hamsini mulipazia la kutumbula la chipandi cha kutumbula, na mapogolo hamsini mulugunyilu wa lipazia la pili, mapogolo goha vyalolini. 13 Kangi vatenganizi luvecha hamsini vya zahabu na kuwunganisila vipandi vivili vya mapazia, hinu Lindanda likavya chindu chimonga.

14 Kangi vatenganizi chigubiku cha Lindanda kwa kuhengela mapazia kumi na limonga vyevyatenganizwi kwa wuzi weubotiwi kwa mangoma ga mene. 15 Kila lipazia lavi na utali wa mita kumi na hidatu, upana wa mita hivili. Mapazia goha kumi na limonga lavii na chipimu chimonga. 16 Hinu vawunganisi mapazia mhanu pamonga na mapazia gangi sita pamonga. 17 Kangi vakakita mapogolo hamsini mulugunyilu mwa lipazia la mwishu la chipandi cha kutumbula, na mapogolo gangi hamsini mulugunyilu lwa chipandi cha pili. 18 Kangi vatenganizi luvecha hamsini vya shaba muni kuwunganisila vipandi vyenivyo vivaha vivili, na kukita lipazia limonga la Lindanda. 19 Kangi vatenganizi vigubiku vingi vivili, cha kutumbula kwa chikumba nyilili cha limbelele ligosi yeyisopiwi langi yidung'u na chingi chatengenizi kwa kuhengela chikumba nyililili.

20 Kangi alitengenizili Lindanda lenilo fulemu za msonobali za kuyima. 21 Fulemu zavii na utali wa mita mcheche na upana wa sendimita sitini na sita. 22 Felemu zoha zavii na vipandi vivili vya kuwunganisila, muni felemu zenizo zihotola kuwunganiswa pamonga. Felemu zoha za Lindanda zaganikiwi zivya na vipandi vya viwunganisu. 23 Vatenganizi felemu ishilini zenizo zivya ndava ya upandi wa kusini wa Lindanda, 24 vitamilu alubaini vya feza pahi ya felemu zenizo ishilini, vitamilu vivili pahi ya felemu zoha muni kukamulila viwunganisu vyaki zivili. 25 Na upandi wa kasikazini mwa Lindanda vatenganizi mewa fulemu ishilini, 26 na vitamilu vyaki alubaini vya feza, vitamilu vivili kila pahi ya fulemu. 27 Upandi wa mumbele, kwelitipama lilanga mwa Lindanda, vatenganizi fulemu sita. 28 Vatenganizi mewa fulemu zivili ndava ya mukona ya Lindanda upandi wa mumbele. 29 Fulemu zenizo zivili za kona zakamulini kuhumila pahi mbaka kunani. Fulemu zivili ndava ya kona zivili zatenganizwi namuna yeniyo. 30 Ndi kwavi na fulemu nane na vitamilu vyaki vya feza kumi na sita, vitamilu vivili pahi ya kila fulemu.

31 Vatenganizi na fulemu za msonobali, felemu mhanu ndava ya fulemu za upandi wa mmonga wa Lindanda, 32 felemu mhanu ndava ya fulemu za upandi wa pili wa Lindanda, na felemu mhanu ndava ya fulemu za upandi wa mumbele wa Lindanda, weuvili kwelitipama lilanga. 33 Vatenganizi felemu pagati na lapitili kuhumila upandi umonga wa Lindanda mbaka upandi wungi wa fulemu. 34 Fulemu zoha vagubiki zahabu azitengenizili na pete za zahabu za kukamulila felemu geanyalili zahabu.

35 Vatenganizi lipazia kwa chitambala chamsopi neju na wa langi ya buluu na zambalau na yidung'u na kulukiwa na kutotewa kwa michapanga vya viumbi vyevina magwaba gavili. 36 Vatenganizi mapanda ga msonobali, akagagubika kwa zahabu na kusopa luvecha za zahabu. Mewa akitili vitamilu mcheche vya feza. 37 Ndava ya pandu pakuyingilila mu Lindanda, vatenganizi kwa chitambala chamsopi na wuzi wa langi ya buluu na wuzi wa langi zambalau na yidung'u, na kulukiwa. 38 Mewawa mapanda gaki mhanu gavili na luvecha vyaki, na vene vagubiki kwa zahabu luvecha na vidindilu vyaki, nambu vitamilu vyaki mhanu vyavi vya shaba.