1 Chapanga alongili malovi aga goha, akajova, 2 "Nene ndi Bambu Chapanga waku, mwanakuwusili kumulima wa Misili kwewavili muuvanda."

3 "Kotoka kugundamiala michapanga yingi nambu nene."

4 "Kotoka kujitengelezela chimong'omong'omo cha michapanga ya udesi amala chochoha chechivili kunani amala pamulima amala mumanji amala pahi pamulima. 5 Kotoka kugundamila amala kuhengela michapanga, muni Nene ndi Bambu waku, Chapanga mwaana wihu. Mwenikuvalipisa vana ndava ya kubuda kwa vadadi vavi, hati chiveleku cha datu na cha mcheche cha avo vevakunibela. 6 Nambu nikuvagana viveleku vyamahele, voha vevakunigana na kukamula malagizu gangu."

7 "Kotoka kuliluwula lihina langu mewamewa Nene Bambu Chapanga waku, muni nene yati nileka lepi kuvabuna vevihengela lihina langu changali chindu."

8 "Likumbuka Ligono la Kupumulila, na ulivagula ndava ya Bambu. 9 Magono sita henga mahengu gaku na mambu gaku goha, 10 nambu ligono la saba ndi ligono la Kupumulila ndava ya Bambu Chapanga waku. Ligono lenilo kotoka kukita lihengu loloha, veve amala mwana waku mgosi na msikana amala mvanda waku mvanda waku amala chinyama chaku cha kufuya amala myehi mwaavili munyumba yaku. 11 Muni mumagono sita nene Bambu nawumbili kunani na mulima, nyanja na vyoha vyevivili mugati yaki, nambu pa ligono la saba napumulili. Hinu nene Bambu waku, nalimotisi Ligono la Kupumulila, ndava yangu."

12 "Vatopesa dadi waku na nyina waku, muni utama miyaka yamahele pamulima wenikupela nene Bambu waku."

13 "Kotoka kukoma."

14 "Kotoka kukita ukemi."

15 "Kotoka kuyiva."

16 "Kotoka kujova udesi kumvala myaku."

17 "Kotoka kunogela nyumba ya myaku, amala mdala waki amala mvanda waki amala ng'ombi zaki amala punda waki na chochoha chechivili chaki."

18 Vandu pavayuwini mbulumo na kulola lumweta luyaka na kuyuwana lwami lwa lipenenga panani ya chitumbi chechahuka lyohi, voha vayogwipi na kundendema na kuyima patali, 19 vakamjovela Musa, "Longela na tete wamwene, na tete yati tikuyuwanila, nambu Chapanga akotoka kulongela na tete ngati lepi tifwa."

20 Musa akavajovela, "Mkotoka kuyogopa, muni Chapanga abwelili kuvalinga muni mumyidakila mwene ndu magono goha na mkotoka kubuda." 21 Vandu voha vayimili kutali lukumbi Musa peahegalili lihundi lila lelitopa leavili Chapanga.

22 Bambu akamjovela Musa, vajovela Vaisilaeli, "Mlolili mwavene nilongili na nyenye kuhuma kunani. 23 Yati mukunitopesa nene ndu na mkotoka kujitengenezela michapanga ya feza amala zahabu. 24 Nyenye yati mukunijengela mazabahu kwa ludaka na panani yaki yati muwusila luteta lwa mambelele ginu na ng'ombi zinu ngati luteta lwa kutinyisa na luteta lwa kuhanganilana. Pandu popoha penipahagwili muni nyenye munigundamila, bahapo namwene yati nikuvabwelela na kuvamotisa. 25 Ngati mukanijengela kwa maganga mazabahu, mkoto kutengeneza kwa maganga ga kuhongola, muni mukotoka kuhongolela mbaju, yati mukita yivya yangayidakiliwa. 26 Mewa mkotoka kuhengela ngazi kukwela mazabahu, wotelu waku ukotoka kuwonekana."