1 Yetulo, mteta wa Chapanga wa Midiani, mkohanu wa Musa, ayuwini mambu goha Chapanga geamhengili Musa na Vaisilaeli peavawusili kumulima wa Misili. 2 Ndi Yetulo mkohanu waki Musa akamtola Sipola mdala wa Musa mwene peamalili kumuwuyisa, 3 pamonga na vana vavili va Musa. Mwana wa kutumbula akemiwa Gelishomu. Musa ampelili lihina lenili muni ajovili, "Nivii pa mulima wa chiyehe." 4 Na yungi amkemili Eliezeli, muni Musa ajovili, "Chapanga wa dadi wangu ndi anitangatili nikoto kokomiwa na nkosi." 5 Yetulo, mkohanu waki Musa pamonga na vana vavili na mdala waki Musa, vambwelili Musa kulugangatu kula, pandu peatamili kuchitumbi cha Chapanga. 6 Musa peajoviwi kuvya mkohanu waki pamonga na mdala waki na vana vaki vavili vabwelili, 7 akahamba kumjambusa mkohanu waki, akamgundamila na kumkumbatila. Vakajambusana na kuyingila mu Lindanda. 8 Musa akamdandaulila mkohanu waki, goha Bambu geamhengili nkosi na Vamisili ndava ya Vaisilaeli. Amjovili mewa ndava ya ng'ani goha gevapatili mulugendu na Bambu chevasangwili. 9 Yetulo ahekiswi na goha geahengili Bambu ndava ya Vaisilaeli kwa kuvasangula mumang'aiso ga Vamisili. 10 Yetulo akajova, "Alumbiwa Bambu mweavasangwili mumang'aiso ga Vamisili na kuhuma muuvanda wa nkosi. 11 Hinu nimanyili kuvya Bambu ndi mkulu kuliku michapanga yoha, muni avagombwili vandu ava mumang'aiso ga Vamisili kwevahengiwi uhakau." 12 Penapo Yetulo, mkohanu waki Musa, akamuwusila Chapanga luteta lwa kutinyisa na kuteta. Na Haloni akabwela pamonga na vagogo va Isilaeli ndava ya kulya chakulya pamonga na Yetulo, palongolo ya Chapanga.

13 Chilau yaki Musa atamili kuhamula mihalu, vandu ni vene vakayima kumtindila kuhumila lukela mbaka kimihi. 14 Yetulo pealolili mambu goha Musa gevahengili Vaisilaeli akamkota, "Ndava kyani ukuvahengela vandu mambu aga? Ndava kyani uhenga genaga wamwene kuni vandu vangi vayimili kukutindila veve kuhumila lukela mbaka kimihi?"

15 Musa akamyangula mkohanu waki, "Muni vandu vibwela kwangu kukota kugavala maganu ga Bambu. 16 Vakavyai na luhonda loloha vibwela kwa nene ni nene namuhamula pagati ya mundu mmonga na muyaki, kuvawula malagizu ga Chapanga na uhamula waki."

17 Hinu Yetulo akamjovela Musa, "Chauhenga chabwina lepi! 18 Veve na vandu ava yati mkujitotokesa mwamwene, muni lihengu lenili ndi livaha uhotola lepi kukita wamwene. 19 Yuwanila chenikujovela na Chapanga avyai pamonga na veve. Veve yima palongolo ya Chapanga pahala pa vandu ava na umjovela Chapanga matakilu gavi. 20 Mewawa uvawula malagizu na uamula wa Chapanga na kuvalangisa cheviganikiwa kutama na kuhenga. 21 Nambu kuvala mambu gangi, hagula vandu vana uhotola pagati yavi, vandu vevakumtopesa Chapanga, vabwina palongolo ya Chapanga na vangatola hongo. Uvahagula vavyai na uhotola na kuvalongosa vandu maelufu na mamiya na hamsini na makumi. 22 Venavo ndi yati vihamula vandu. Mambu geginonopa yati vakuletela veve, nambu gadebe yati vihamula vene. Njila yeniyi yati yikita lihengu laku likoto kunonopa muni yati vikita lihengu lenili pamonga na veve. 23 Ukakita chenicho, na ngati Chapanga cheilagiza yati utotokela lepi na vandu voha yati viwuya kunyumba kwa uteke."

24 Musa ayuwanili malovi genago ga mkohanu waki na kukita ngati cheajoviwi. 25 Hinu, akahagula vandu vanauhotola pagati ya Vaisilaeli, akavakita kuvya vachilongosi va misambi ya vandu maelufu na vandu mamiya na vandu hamsini hamsini na vandu kumi. 26 Ndi vakavya vihamula vandu lukumbi lwoha, mambu geginonopa vampelekili Musa, nambu gala gadebe vagahamwili vene.

27 Kangi Musa akalagana na Yetulo mkuhanu waki, na mwene Yetulo akawuya kumulima waki.