1 Mwanakandahi, Musa na Haloni vamuhambili nkosi wa ku Misili, vakamjovela, "Bambu, Chapanga wa Isilaeli ijova, ‘Valeka vandu vangu vawukayi, vakanikitila mselebuko kulugangatu.’ "

2 Nambu nkosi wa ku Misili akavakota, "Bambu yoki mwenuyo hati nimuyuwanila na kuvaleka Vaisilaeli vahamba? Nene nimmanyili lepi Bambu uyo na nikuvaleka lepi Vaisilaeli vahamba."

3 Musa na Haloni vakamjovela, "Chapanga wa Vaebulania akonganiki na tete. Chondi utileke tihambe kulugangatu lugendu lwa magono gadatu tikamuwusila teta Bambu, Chapanga witu. Changali naha yati akutikoma kwa utamu amala ngondo."

4 Nambu nkosi wa ku Misili akavayangula, "Nyenye Musa na Haloni, ndava kyani mlinga kuvawusa vandu mulihengu lavi? Muvawuyisa mumahengu gavi." 5 Kangi nkosi wa ku Misili akajova, "Vandu ava ndi vamahele kuliku Vamisili, mwigana valeka kuhenga lihengu!"

6 Ligono lilolo nkosi wa ku Misili akavalagiza vakulu va vayimalila va vavanda vachimislili pamonga na vayimalila va vavanda Isilaeli, akajova, 7 "Kuhumila lelu mkoto kuvapela vandu ava manyahi ga kutengenezela matofali ngati chevayovalili. Vakajilondela vene. 8 Nambu umahele wa matofali gavyai galagala ga magono goha, likoto kupunguka hati limonga, muni vandu ava vakata ndi mana vivembeneka ‘Tileka tihambe tikamuwusila Chapanga witu luteta.’ 9 Muvayonjokesela lihengu lelinonopa vandu ava muni vavyai mumang'aiso na kuleka kuyuwana malovi ga udesi."

10 Manyapala na vayimamila va vavanda vakahuma kuvala na kuvajovela vandu, "Nkosi wa ku Misili ijova naha, ‘Yati nikuvapela lepi manyahi. 11 Muhambayi mwavene kwokwoha kwemwihotola kugapata, na matofali ginu yati gipunguzwa lepi hati padebe.’" 12 Hinu vandu voha vakadandasika kila pahala kulonda manyahi. 13 Na manyapala vakakangamala kujova, "Mtimilisa matofali ginu ga magono goha ngati cheyavili pakutumbula pemwaletewayi manyahi" 14 Manyapala va Misili vavatovili vayimamila va vavanda va Isilaeli vevahaguliwi kuyimilila mahengu kuni vijova, "Ndava kyani mtimilisa lepi matofali gegiganikiwa ngati pakutumbula?"

15 Ndi vayimamila va vavanda vamuhambili nkosi wa ku Misili, vakavembeneka na kujova, "Ndava kyani ukutikita naha tete tavahengaji vako? 16 Tipewa lepi mayahi kangi, kuni tiganikiwa kufyatula matofali. Kangi tete tavatumisi vako titovewa, nambu mabudilu ndi ga vandu vako."

17 Nambu nkosi wa ku Misili akayangula "Mwavakata nyenye, ndi mana mmjova, ‘Tileka tihambe tikamuwusile teta Bambu.’ 18 Muhambayi mukahengayi lihengu, muni mupewa lepi manyahi gogoha na yati mfyatula matofali kwa umahele wulawula." 19 Hinu ndi vayimalila va vavanda va Isilaeli vajimanyili vavii mumang'aiso, muni vajoviwi, "Katu mwipunguziwa lepi umahele wa matofali ga magono goha."

20 Pavawukili kwa nkosi wa ku Misili vakonganiki na Musa na Haloni vevavili vakuvalindila. 21 Vakamjovela Musa na Haloni, "Bambu alilola lijambu lenili na kuvahamula nyenye muni mutihengili tete kulolekana tavahakahu neju palongolo ya nkosi wa ku Misili na vachilongosi vaki. Nyenye mukiti tete tikomewayi."

22 Ndi Musa akamung'anamukila kangi Bambu, akajova, "Ndava kyani ukuvahengela vandu ava mambu gahakau? Ndava kyani hinu wanitumili? 23 Muni kuhumila penahambili kulongela na nkosi wa ku Misili mulihina laku, mwene avahengili gahakau vandu ava. Na veve uhengili lepi loloha la kuvatangatila vandu vako kuhuma kuuvanda."