1 Kangi Musa akamyangula Chapanga, "Ngati Vaisilaeli yati vakunisadika lepi na kubela kuniyuwanila, na kujova veve wanihumalili lepi yati nikita wuli."

2 Penapo Bambu, Chapanga akamjovela Musa, "Ukamwili kyani muchiwoko chuku?" Musa akamyangula, "Ndonga."

3 Bambu, akamjovela, "Taga pahi." Musa akataga ndonga yila pahi, yang'anamwiki kuvya liyoka! Musa akalitila. 4 Nambu Bambu akamjovela Musa, "Golosa chiwoko chaku, likamumula mkila!" Musa akayinula chiwoko chaki, akalikamula, liyoka lang'anamwiki kuvya kangi ndonga muchiwoko chaki. 5 Chapanga akamjovela, "Chenicho ndi Vaisilaeli ndi chevibwela kusadika kuvya nene ndi Bambu, Chapanga, Chapanga wa vagogo vavi, Chapanga wa Abulahamu na Isaka na Yakobo, nikuhumalili."

6 Bambu, akamjovela kangi Musa, "Yingisa chowoko chaku munyula za panganga yaku." Musa akakita ngati cheajoviwi, nambu peahumisi, ukavya na mabudi, chiwoko chamsopi pehe. 7 Bambu akamjovela, "Yingisa kangi chiwoko chaku munyula za panganga yaku." Akakita chenicho. Ndi pahumisi kuvala, chiwoko chaki chikalama chikavya ngati chechavili higa yaki pakutumbula. 8 Bambu, akamjovela Musa, "Ngati vakusadiki lepi kwa gachinamtiti ga kutumbula, yihotoleka yati vakukusadika gachinamtiti gegigelekela. 9 Nambu ngati visadika lepi gachinamtiti gavili genago, amala kusadika malovi gaku, yati unega manji ga mfuleni Naili na kugayita pandumba. Manji ago yati givya ngasi."

10 Nambu Musa akamjoela, "Veve Bambu wangu, nene nilongela lepi bwina kuhumila kadeni, hati hinu penilongela na veve namuhengaji waku hinu, nene nina chimama."

11 Penapo Bambu, akamkota yani mwawumbili mlomo wa mundu? Yani mwakumkita mundu kuvya ngajova amala ngayuwa? Alola amala ngalola? Wu, lepi nene Bambu? 12 Hinu, hamba! Nene yati nikutangatila kulongela na kukuwula chakujova.

13 Nambu Musa akajova, "Lepi Bambu, chondi nikuyupa umtuma mundu yungi."

14 Ndi ligoga la Bambu pelahumili ndava ya Musa, ndi akamjovela, "Wu avi lepi mlongo waku Haloni ndi Mlawi? Mwene amanyili kulongela bwina. Kangi ibwela kukonganeka na veve, peakuwona ndu yati isangaluka neju. 15 Veve yati ukumjovela goha genikujovela. Nene yati nikuvatangatila cha kujova na kuvajovela chindu cha kukita. 16 Haloni yati ilongela na Vaisilaeli pahala pa veve. Mwene yati ivya mjovaji waku, na veve yati wivya ngati Chapanga kwaki. 17 Yati ugega ndonga iyi mumawoko gaku na kwa kuhengela yeniyo yati ukita ulangisu."

18 Kangi Musa akawuya kwa Yetulo mkuhanu waki, akamjovela, "Chondi niyupa niwuye ku Misili kwa valongo vangu, nikalola ngati vakona mumi." Yetulo akamjovela, "Uhamba cha uteke."

19 Musa peavili akona ku mulima wa Midiani, Bambu kamjovela, "Wuya ku Misili muni voha vala vevagana kukukoma vamali kufwa." 20 Hinu, Musa akamtola mdala waki na vana vaki, akavakwesa panani ya punda na kutumbula lugendu lwa kuwuya ku Misili. Mchiwoko chaki agegili ndonga yealagaziwi na Bambu kuyigega.

21 Bambu akamjovela Musa, "Pewihika ku Misili uganikiwa kukita chinamtiti yoha yenikupelili uhotola wa kukita palongolo ya nkosi wa ku Misili. Nambu yati nikumkita nkosi wa ku Misili avya na mtima weunonopa, namwene yati akuvaleka lepi vandu va Isilaeli vahamba. 22 Ni veve yati ukumjovela nkosi wa ku Misili kuvya Bambu ijova naha, ‘Isilaeli ndi mveleku wangu wa kutumbula wa chigosi! 23 Na nene nakujovili, mleka mwana wangu ahamba, muni akanigundamila! Nambu wabeli kumleka, hinu yati nikumkoma mwana waku mgosi wa kutumbula.’ "

24 Peavii akona munjila kuhamba ku Misili, Musa avii pandu pa kugona vayehi, ndi Bambu akonganiki nayu na kugana kumkoma. 25 Penapo Zipola akajumba kanyata kutola liganga lelitema akamdumula jandu mwana waki na kumpamisa nalo Musa mumagendelu akajova, "Veve ndi bambu wa ndowa ya ngasi." 26 Penapo Bambu akamleka Musa. Zipola ajovili, "Bambu wa ndowa ya ngasi." Ndava ya kumdumula jandu mwana.

27 Bambu akamjovela Haloni, "Hamba kulugangatu ukakonganeka na Musa." Hinu, Haloni akahamba, akakonganeka na Musa kuchitumbi cha Chapanga akamkumbatila. 28 Musa akamjovela Haloni malovi goha geajoviwi na Bambu na chinamtiti yoha yealagaziwi akita. 29 Ndi Musa na Haloni vakahamba ku mulima wa Misili na akavakusanya vachilongosi voha va Isilaeli. 30 Haloni akavajovela malovi goha Bambu geamlagizi Musa, na Musa akakita chinamtiti yoha palongolo ya vandu, 31 vandu vasadiki. Vandu pevayuwini kuvya Bambu avabwelili na kuvatangatila Vaisilaeli, na kuvya agawene mang'aiso gavi, voha vakagundamisa mitu yavi na kumgundamila.