1 Genaga ndi malagizu ga luteta lwa kulekekesa mabudilu, luteta lwenulu ndi lwamsopi neju. 2 Chinyama cha luteta lwa kulekekesa kuhoka yati chihinjwa pandu pakuhinjila hinyama ya luteta lwa kutinyiswa, na ngasi yaki yati inyunyusiwa pandu pa kuwusila teta pandi zoha. 3 Mahuta gaki goha yati giwusiwa luteta, mahuta ga mkila na gala gegigubika vindu vya mugati, 4 pamonga na figu zoha zivili na mahuta gegavii panani yaki na mahuta gegigubika chibindi, vyoha vyenivyo yati viwusiwa kwa chinyama chenicho. 5 Mteta wa Chapanga yati itinyisa vyenivyo panani ya pandu pa kuwusila teta kuvya luteta lweluwusiwa Bamba Chapanga kwa motu. Lwenulo ndi luteta lwa kulekekesa mabudilu. 6 Veviyidakiliwa kulya luteta lwenulo ndi mgosi yoyoha wa lukolo lwa chimteta ndu, muni ndi luteta lwamsopi njwe. Yati yiliwa pandu pamsopi.

7 Lilagizu ndi lilalila kuvala luteta lwa kulekekesa mabudilu na luteta lwa kulekekesa kubuda, mteta wa Chapanga mweikita utepulanisi ndi mweiganikiwa kutola luteta lwenulo. 8 Mteta wa Chapanga mweiwusa luteta lwa kutinyiswa ya mundu yeyoha, yati itola chikumba cha chinyama chechiwusiwi. 9 Luteta lwolwoha lwa mabenu lweluyochiwi muchikalangu amala musufulia amala muchimbani yati yivya ya Mteta wa Chapanga mweiwusa. 10 Nambu kila luteta lwa mabenu, luhangiswanai na mahuta ga zeituni amala yiyumu, ndi ya vana voha vagosi va Aloni, na vagavaniswa kwa kuwanangana.

11 Genaga ndi malagizu ndava ya luteta lwa uteke ndi mundu mweihotola kumuwusila Bambu Chapanga. 12 Ngati mundu akamuwusila Bambu Chapanga luteta lwa kusengusa, ndi yati iwusa luteta lwenulo pamonga ba mabumunda gangali kusopewa ngemeku geganyaliwi mahuta ga zeituni, mabumunda gegakepili gangasopiwa ngemeku geganyaliwi mahuta ga zeituni na mabumunda ga uhembe nyilinyili weuhangisini bwina na mahuta ga zeituni. 13 Pamonga na lwenulo luteta lwaki lwa uteke lweawusili lwa kumsengusa Bambu Chapanga, mewawa yati ileta na mambama gegasopiwi ngemeku. 14 Kuhuma mumabumunda genago goha, yati akumuwusila Bambu Chapanga libumunda limonga, kuhuma mukila luteta, mabumunda genago yati givya gaki mteta wa Chapanga mweitola na kumija ngasi papandu pa kuwusila teta lwa uteke. 15 Nyofu yeniyo ya luteta lwa uteke yeyiwusiwi ndava ya kusengusa yiliwa ligono lilolo leyiwusiwa, yikotoka kusigalila mbaka lukela.

16 Nambu ngati luteta lwaki ndi ndava ya lilaganu leaviki na Chapanga amala kwa kugana mwene, nyofu yeniyo yiliwa ligono lilolo leliwusiwa na nyofu yingi yeyisigalili yihotola kuliwa ligono lelilanda. 17 Nambu nyofu yeyoha ya chinyama chenicho yikasigalila mbaka ligono la datu yiganikiwa yitinyiswayi. 18 Ngati nyofu yoyoha ya luteta lwa uteke yiliwili ligono la datu, yiyidakiliwa lepi na Chapanga mewa yati yivalangiwa lepi kwa mundu yula mweawusili, na mundu mweilya chechikumkolela kwali mwene. 19 Nyofu yoyoha yeyipamisa chindu chechilolekana na Chapanga kuvya chihakahu, ndi yikotoka kuliwa na yiganikiwa yitinyiswa kwa motu. Mundu yoyoha mweakujiwona kuvya ayidakiliwi na Chapanga ndi ihotola kulya nyofu yeyisigalili.

20 Nambu ngati mundu yeyoha angayidakiliwa palongolo ya Chapanga akalyayi nyofu yeyoha ya luteta lwa uteke yeyiwusiwi kwa Chapanga, mundu mwenuyo yati ibaguliwana kuvikwa kutali na vandu vaki. 21 Mundu yeyoha akapamisa chindu changayidakiliwa palongolo ya Chapanga, amala uhakahu wa mundu amala chinyama changayidakiliwa palongolo ya Chapanga, amala chechiyomesa, akalyayi nyama ya luteta lwa uteke yeyivikiwi kwa Chapanga, mundu mwenuyo yati ibaguliwa na vandu vaki.

22 Kangi Bambu Chapanga akamujovela Musa, 23 "Uvajovela vandu va Isilaeli naha, mkoto kulya mahuta ga ng'ombi amala limbelele amala mene. 24 Mahuta ga chinyama chochoha chechifwili yene amala hinyama yeyikomiwi na hinyama yiyaki ya kudahi yihotoleka kutumika kwa mambu gangi, nambu katu mkoto kulya. 25 Mundu yeyoha akalyai mahuta ga chinyama chechiwusiwi luteta lwa kutinyiswa kwa Chapanga, yati ibaguliwa na vandu vaki. 26 Kavili, katu mkoto kulya ngasi yeyoha yila, yivya ya chidege amala hinyama pandu popoha pemwitama. 27 Mundu yeyoha akalyai ngasi, mundu mwenuyo yiganikiwa abaguliwa kutali na vandu vaki."

28 Mewawa Bambu Chapanga akamujovela Musa, 29 uvajovela vandu va Isilaeli naha, mundu yeyoha akawusa luteta lwa uteke, yati ileta chinyama cha kuhinjwa kwa Bambu Chapanga pahali pa luteta lwenulo. 30 Mwene yati akumletela palongolo ya Bambu Chapanga kwa mawoko gaki kuvya luteta lwa kutinyiswa kwa motu. Yati ileta mahuta pamonga na nganga, na mwene yati iyinula nganga yeniyo palongolo ya Bambu Chapanga kuvya luteta lwa kuyinuliwa. 31 Mteta wa Chapanga yati itinyisa mahuta genago panani ya pandu pa kuwusila teta, nambu nganga yati yivya ya Aloni na vana vaki. 32 Liwondo la mumbele la upandi wa kulyelela la chinyama cha luteta zinu za uteke yati akumpela mteta wa Chapanga. 33 Liwondo lenilo yati livya la mteta wa Chapanga mwana wa Aloni mweiwusa ngasi ya luteta lwa uteke na mahuta gaki. 34 Bambu Chapanga avalagazi vandu va Isilaeli vahagula nganga yeniyo na liwondo lenilo la hinyama ya luteta lwa uteke, vavapela Aloni na vana vaki, muni nyofu zenizo zivikiwi vapewa vene magono goha gangali na mwisu. 35 Yeniyi ndi pandu pa teta zezawusiwi kwa Bambu Chapanga kwa motu zezabaguliwi ndava ya Aloni na vana vaki ligono lila pevanyaliwi mahuta kumuhengela Bambu Chapanga mu lihengu la umteta. 36 Ligono lila pevanyambiswi kwa kunyalwa mahuta ga zeituni ndava ya kumuhengela Chapanga, Bambu Chapanga alagazili kuvya vandu va Islaeli vavapela nyofu zenizi za luteta muviveleku vyavi vyoha vyevigelekela.

37 Hinu, aga ndi malagizu kuvala luteta lwa kutinyisa na luteta lwa mabenu na luteta lwa kulekekesa kubuda na luteta lwa kulekekesa kuhoka na luteta lwa kuvala kumuhagula mundu avya mteta na luteta lwa kutama kwa uteke na Bambu Chapanga. 38 Genaga ndi malagizu ga Bambu Chapanga geampeli Musa kuchitumbi Sinai, ligono lila peavalagizi vandu va Islaeli vamletela luteta zavi, kulugangatu lwa Sinai.