1 Bambu Chapanga akamujovela Musa, 2 "Valagiza vandu va Isilaeli vakuletela mahuta gabwina ga zeituni ndava ya kupambika hahi muni hahi ziyendelela kuyaka lukumbi lwoha. 3 Aloni yati ipambika hahi mugati ya lindanda la kukonganekela, kuvala ya lipazia palongolo ya Bambu Chapanga kuhuma kimihi mbaka lukela. Lenili ndi lilagizu la kusindimala muviveleku vyavi vyoha magono goha. 4 Yati akuzivika hahi zenizo panani ya chibokoselu cha zahabu yabwina ziyaka lukumbi lwoha palongolo ya Bambu Chapanga."

5 "Tola uhembe nyililili kilo kumi na zivili na uyocha mabumunda kumi na gavili. 6 Mabumunda genago yati gipangwa misitali hivili panani ya meza ya zahabu yabwina palongolo ya Bambu, kila musitali mabumunda sita. 7 Mu kila fwasi yati usopa ubani wabwina muni ukamulana na mabumunda genago na kuvya luteta lwa kutinyisa lwa ukumbuso kwangu nene Bambu Chapanga. 8 Kila Ligono la Kupumulila Aloni yati ipanga kuwanangana na musitali palongolo ya Bambu Chapanga pahali pa vandu va Isilaeli ngati lilaganu la magono goha. 9 Aloni pamonga na vana vaki ndu ndi veviyidakiliwa kulya mabumunda genago pandu pamusopi muni mabumunda genago gamsopi neju gegawusiwi kwa Bambu Chapanga kwa motu. Ndava muni gabaguliwi ndava ya Bambu kuvya pandu pa uyovalelu wa kuwusa kwa uyovalelu."

10 Ligono limonga kwavili msongolo mmonga dadi waki avii Mmisili na nyinawaki avii Muisilaeli. Akomini na Muisilaeli mumonga kulindanda. 11 Msongolo mwenuyo aligili na kulipela likoto liina la Bambu Chapanga. Ndi vandu vamupeliki msongolo mwenuyo kwa Musa. Mau wa msongolo mwenuyo akemiwi Shelomithi msikana wa Dibli wa likabila la Dani. 12 Vene vakamdindalila muchumba, kuni vilindila maganu ga Bambu Chapanga pegigubukuliwa kwavi.

13 Hinu Bambu Chapanga akamujovela Musa, 14 "Mumtola msongolo mwenuyo mweamligi Chapanga kuvala ya bwalo, na voha vala vevamuyuwini peiliga vavika mawoko gavi panani ya mutu waki, kangi mngonganu woha yati umkoma kwa kumtova na maganga. 15 Kangi uvajovela vandu va ku Isilaeli kuvya, mundu yeyoha mweakumpela likoto Chapanga ndi chechikumkolelayi kwali mwene. 16 Mundu yeyoha mkolonjinji amala myehe mweakuliliga liina la Chapanga, ndi mngonganu woha yati vakumkoma kwa kumtova na maganga.

17 Mundu yeyoha mweakumkoma muyaki yiganikiwa na mwene akomiwa. 18 Mundu yeyoha mweikoma chinyama ndi yikumgana alipiswa chinyama chechivii mumi pahala pa chinyama cheakomili, wumi kwa wumi.

19 Ngati mundu yeyoha akamlemesa muyaki, ndi yikumgana na mwene alemeswa kuwanangana na cheamlemisi muyaki, 20 akamdenya muyaki lijege na mwene yati idenywa lijege, akamlesayi muyaki lihu na mwene yati ilemeswa lihu na akamtupulayi muyaki linu na mwene yati itupuliwa linu. Kila mundu mwakumlemasa myaki na mwene alemaswayi kuwanangana na cheakitili. 21 Mundu yeyoha mweikoma chinyama cha muyaki yikumgana alipa chechivii mumi, nambu mundu yeyoyoha mweakumkoma muyaki ndi yikumgana na mwene akomiwa. 22 Malagizu genaga gahengeka kwa nyenye mwavoha kwa myehe na mkolonjinji. Nene ndi Bambu Chapanga, Chapanga winu."

23 Hinu Musa akavajovela Vaisilaeli genago goha. Vampeliki mundu yula mweamligili Bambu Chapanga kuvala ya bwalo, vakamkoma kwa kumtova na maganga. ndi chevakitili vandu va Isilaeli ngati Bambu Chapanga cheamlagazili Musa ndi.