1 Bambu Chapanga akamjovela Musa, 2 "Mjovela Aloni na vana vaki vayangalila neju teta zeziwusiwa na Vaisilaeli kwa nene, muni vakotoka kuliliga liina langu lamsopi. Nene ndi Bambu Chapanga. 3 Vajovela naha, kutumbula hina na muviveleku vyaku vyoha vyevibwela yikavya yoyoha wa viveleku vyaku iyidakiliwa lepi mukufugamila na mwene yati ihegelela teta zamsopi zeviwusa Vaisilaeli zivya za Bambu Chapanga, mundu mwenuyo yiganikiwa abelelewa kutali na vandu vaki. Nene ndi Bambu Chapanga."

4 "Mundu yoyoha wa chiveleku cha Aloni ngati avi na utamu wa chikumba weuyambukisa amala mgosi mwei hulula uhakasa kuwotelu akoto kulya vindu vya msopi mbaka peinyambasika. Mewa mundu mwenuyo yati iyidakiliwa lepi kwa kufugama ngati ampamisa mweahakiswi kwa kupamisa mtuhi amala kumukamula mundu mweahulwi mbeyu za chigosi, 5 amala akapamisa chiumbi chochoha chechikwava chenicho chikumkita mundu kuvya angayidakiliwa amala akapamisa mundu yoyoha mweihotola kumkita avya angayidakiliwa. 6 Mteta yoyoha mweapamisi chindu chochoha yati ivya angayidakiliwa mukufugama mbaka kimihi na iganikiwa lepi kulya vyakulya vyamsopi mbaka pala peisamba. 7 Lilanga pelitipama ndi yati inyambasika. Penapo ndi peihotola kulya vyakulya vyamsopi muni chenicho ndi chakulya chaki. 8 Katu mteta wa Chapanga akoto kulya chinyama chochoha chechifwili chene amala chechikomiwi na hinyama hingi ya mdahi, muni akalyayi ndi akujikita avya angayidakiliwa. Nene ndi Bambu Chapanga."

9 Ndava yeniyo, vamteta va Chapanga yikuvagana kulanda malagizu gangu, muni vakotoka kukita uhakahu na kufwa ndava ya kuvevesa malagizu gangu. Nene ndi Bambu Chapanga mwenikuvakita vavya Vamsopi.

10 "Mundu mweangavya wa lukolo lumonga na mteta wa Chapanga iyidakiliwa lepi kulya luteta lwamsopi. Hati ngati myehe waki amala mvanda waki viganikiwa lepi kulya chakulya chenicho. 11 Nambu ngati mteta wa Chapanga amgulili mvanda muni avya waki, ama yikavya mvanda mwenuyo avelekiwi munyumba yaki ndi mvanda mwenuyo ihotola kulya chakulya cha chimteta. 12 Ngati msikana wa mteta wa Chapanga agegiwi na mundu angali kuvya mteta, mwenuyo iyidakiliwa lepi kulya luteta lwamsopi. 13 Nambu ngati msikana wa mteta wa Chapanga ndi lipwela amala alekiwi kwa mgosi waki na angali mwana, namwene awuyili panyumba ya dadi waki na kutama nayu ngati peavi msikana, ndi ihotola kulya chakulya cha dadi waki. Pamonga na ago, myehe iyidakiliwa lepi kulya vyakulya vyenivyo.

14 Ngati mudu yungi akalya vyakulya vya msopi changamanya, ndi yati iwuyisa chakulya chealili na ayongesa lilundu limonga pagati ya muhanu kuwanangana na chakulya chealili na kumuwuyisila mteta. 15 Vamteta va Chapanga vakoto kuvihakasa vindu vila Vaisilaeli vyevakumuwusila Bambu Chapanga, 16 ndava ya kuvayidakila vandu vangi valya vyakulya vyenivyo na vakakitayi chenicho ndi yati vivya vakiti uhakahu na yati viganikiwa vawuyisayi vyakulya vyenivyo. Nene ndi Bambu Chapanga mwenikita vyakulya vyenivyo vivya vyamsopi."

17 Bambu Chapanga akamjovela Musa, 18 "Vajovela Aloni na vana vaki vamteta va Chapanga na Vaisilaeli voha naha, ngati avi mundu yeyoha pagati yinu amala myehe yeyoha mweitama pa Isilaeli, akawusa luteta lwaki ndava ya luteta lwa kutinyiswa kwa motu kwa Bambu Chapanga, lukavya lwa chilapu amala luteta lwa kugana kwaki mwene, 19 muni luteta lwenulo luyidakiwa, yati iwusa ng'ombi yigosi amala limbelele ligosi langali chilema. 20 Katu ukoto kuwusa chinyama chochoha chechivi na chilema muni yati chipokelewa lepi ndava yinu. 21 Mundu yeyoha peakuniwusila nene Bambu Chapanga luteta lwa uteke muni kutimilisa chilapu amala luteta lwa kugana mwene kuhuma msambi wa mifuya yaki, muni ayidakiliwa ndi yikumgana chinyama chila chivya changali dosali mewa chikotoka kuvya na chilema chochoha. 22 Katu ukoto kuwusa kwa Bambu Chapanga chinyama chochoha changalola amala chindamile amala chechidenyiki pandu amala chechihumisa mahila amala mweavi na vilonda amala ukulutu, ukotoka kuviwusa vinyama vyenivyo panani ya pandu pa kuwusila teta pangu nene Bambu Chapanga. 23 Ng'ombi yigosi amala limbelele lelivi na chiungu chimonga chitali amala chihupi kuliku cheyiganikiwa amala chechivii na chigendelu chihupi na chingi chitali, wihotola kuvika luteta lwa kugana wamwene, nambu ukotoka kuchiwusa kuvya luteta lwa kugana kwaku wamwene nambu yati yiyidakiliwa lepi kuvya luteta lwa kutimilisa chilapu. 24 Mkotoka kumuwusila Bambu Chapanga chinyama chechi teniwi amala mazende gaki galemili amala zidumuliwi amala zibondwiki, katu ukotoka kumuwusila Bambu Chapanga, ukotoka kuhenga chindu ngati chenicho pamulima waku.

25 Mewawa ukoto kupokela kuhuma kwa vayehe hinyama ngati yeniyo na kuviwusa Bambu Chapanga waku ngati chakulya. Pemukuviwusa vinyama ngati vyenivyo yati nikuviyidakila lepi muni vivi na chilema."

26 Bambu Chapanga akamujovela Musa, 27 "Mpapakasi amala mpapakasi wa limbelele ligosi amala mpapakasi ugosi wa mene akavelekewa yati visigalila kwa nyina wavi kwa magono saba. Vikahikisa magono nane yati ukuniwusila nene Bambu Chapanga ngati luteta lwa kutinyiswa kwa motu. 28 Nambu ukoto kuhinja ng'ombi amala limbelele muligono limonga pamonga na mwana waki. 29 Pemukumuwusila Bambu Chapanga luteta lwa kusengusa muwusila chila cheyiganikiwa muni uyidakiliwa. 30 Ndi yikuvagana kulya nyofu ligono lilolo peyiwusiwa, changali kusigalisa nyofu yoyoha mbaka chilau lukela. Nene ndi Bambu Chapanga."

31 "Ndava yeniyo mugakamula na kugalanda malagizu gangu. Nene ndi Bambu Chapanga. 32 Mkoto kulivevesa liina langu la msopi, vandu voha va Isilaeli ndi viganikiwa vamanya kuvya nene ndi Bambu Chapanga mwenikuvakita muvyai Vamsopi. 33 Nene ndi mwenavawusili kuhuma ku mulima wa Misili muni nivya Chapanga winu. Nene ndi Bambu Chapanga."