1 Nadabu na Abihu vana va chigosi va Aloni vatolili kila mmonga lumbani lwaki, vakavika ubani panani ya motu na kuuhukisa, vakamuwusila Bambu Chapanga motu wangayidakilana na malagizu ga Bambu Chapanga. 2 Bahapo Bambu Chapanga akahelesa motu ukavatinyisa vasongolo venavo na vene vakafwa baho palongolo ya Bambu Chapanga. 3 Kangi Musa akamjovela Aloni, "Kwa lijambu lenili Chapanga akulangisi mana ya chila cheajovili, ‘Yati nikujilangisa kuvya msopi pagati ya vamteta vevakunihengela, yati nitopeswa palongolo ya vandu voha!’" Aloni akaguna nuu.

4 Hinu, Musa akavakemela Misahaeli na Elisafani, vana va Uzieli dadi waki mdebe Aloni, akavajovela vabwela kuwusa mituhi ya valongo vavi vevafwili papipi na pandu pamusopi, vahamba vakaihila kutali ya kambi yavi. 5 Ndi vakabwela kutola mituhi ya valongo vavi na kupeleka kuvala ya kambi yavi kuni vawalili nyula zavi, ngati Musa cheavalagazili.

6 Kangi Musa akamjovela Aloni na vana vaki vagosi, Eliazali na Ithamali, "Mkotoka kuleka kukwemula mayunju ginu amala mkotoka kupapula nyula zinu za malilu, ngati mukakita chenicho yati mwifwa na Bambu Chapanga yati akuvayomela vandu voha va pa Isilaeli. Nambu valongo vinu na vandu voha va Isilaeli vihotola kuvavembenekela vandu venavo vevakomiwi kwa motu weuheliswi na Bambu Chapanga. 7 Mkotoka kuhuma kuvala ya mlyangu wa Lindanda la Kukonganekela, ngati mukakita chenicho yati mwifwa, muni mnyaliwi mahuta ga unyambisu kuvya vahengaji va Bambu Chapanga." Aloni na vana vaki vahengili ngati Musa cheavalagizi.

8 Bambu Chapanga akamujovela Aloni, 9 "Pemwiyingila mulindanda la kukonganekela veve na vana vaku mkoto kunywa divayi amala chigalisa chochoha chila, ngati mukakitayi chenicho yati mwifwa. Lenili ndi lilagizu la magono goha gangali mwisu mu viveleku vyaku vyoha. 10 Yikuvagana kulekanganisa pagati ya vindu vyevivi vya msopi na vyangavya vyamsopi, na vindu vyeviyidakiliwa kwa Bambu Chapanga na vyangayidakiliwa. 11 Na muganikiwa muvawula Vaisilaeli voha mihilu yoha yenivajovili kupitila Musa."

12 Kangi Musa akavajovela Aloni na vana vaki vevasigalili, Eliazali na Ithamali, "Mtola luteta lwa mabenu lwelusigalili kuhuma muteta zeziwusiwa kwa Bambu Chapanga kwa motu, mlyai bahapo papipi na pandu pa kuwusila teta changali kusopa ngemeku ndava ya msopi neju. 13 Yati mwilya pandu pamsopi muni ndi chakulya chaku na chakulya cha vana vinu cha teta zeziwusiwa kwa Bambu Chapanga kwa motu. Muni chenicho ndi cheanilagizi Bambu Chapanga. 14 Nambu veve na vana vaku vagosi na vasikana mwihotola kulya nganga zila zezayinuliwi na mawondo gegawusiwi gala. Yati mwilya pandu pepiyidakiliwi kwa kumfugamila Bambu Chapanga, yati ulya veve na vana vaku muni mpewili veve na vana vaku kuvya lilundu linu la luteta ya uteke ya vandu va Isilaeli. 15 Liwondo lila lelawusiwi na nganga yila yeyayinuliwi yiganikwa viletwayi pamonga na pandu pa mahuta ga luteta lwa kutinyiswa kwa motu, muni yiyinuliwa palongolo ya Chapanga kuvya luteta lwa kumuwusila Bambu Chapanga. Vyenivi vyoha yati vivya vyaku pamonga na uveleku waku ngati chealagisi Bambu Chapanga."

16 Hinu, Musa akotakisi neju kuyivala mene yimonga yeyawusiwi luteta lwa kulekekesa kubuda, ndi akahumbula kuvya amali kutinyiswa. Ndi avayomili neju vana va Aloni vevasigalili, Eliazali na Ithamali akavakota, 17 "Ndava kyani mwalili lepi nyofu ya luteta lwa kulekekesa kubuda pa Lindanda la Kukonganekela? Ndava luteta lwenulo lwavii lwamsopi na Bambu Chapanga avapelili nyenye lihengu la kuwusa kuhoka kwa mngonganu woha na kuvakitila utepulanisa palongolo ya Bambu Chapanga. 18 Ndava muni ngasi yaki yaletiwi lepi pandu pamsopi, na nyenye mwaganikiwi mulya nyofu ya mene yeniyo mu Lindanda la Kukonganekela ngati chenavalagisi."

19 Aloni akamyangula Musa, "Yuwanila lelu vana vangu vawusili teta zavi za kulekekesa kubuda na teta zavi za kutinyiswa palongolo ya Bambu Chapanga, nambu mambu ngati aga ganihumalili nene. Wu, Bambu Chapanga ngaaganiswi ngati nganilili luteta lwa kulekekesa kuhoka lweluwusiwi lelu?" 20 Musa peayuwini genago, akayidakila.