1 Bambu Chapanga akamujovela Musa, 2 "Vajovela vandu va Isilaeli naha, yeniyi ndi miselebuko yangu nene Bambu Chapanga zenizihagwili ndi zemukuzikokosa kuvya magono gegiganikiwa kuvya mngonganu wangu. 3 Yati muhenga mahengu kwa Magono sita, nambu Ligono la saba ndi Ligono la Kupumulila, ligono la konganeko la msopi. Mkoto kuhenga lihengu loloha pandu popoha pemwitama, ndi Ligono la kupumila kwa Bambu Chapanga. 4 Yeniyi ndi miselebuko yingi ya mingonganu maalumu yeyivaguliwi ndava yangu nene Bambu Chapanga na zene yati ziselebukiwa mulukumbi maalumu mukila mwaka."

5 "Pasaka yangu nene Bambu Chapanga yati yitumbula kimihi ligono la kumi na ine ya mwehi wa kutumbula. 6 Palitumbula ligono la kumi na mhanu la mwehi wuwowoho, yati kuvya na mselabuko wangu nene Bambu Chapanga wa mabumunda gangali ngemeku. Mulukumbi lwa magono saba yati mwilya mabumunda gangali ngemeku. 7 Paligono la kutumbula yati mwivya na mkonganeko wa msopi. Ligono lenilo mkoto kuhenga lihengu. 8 Palukumbi lwa magono ago goha saba mniwusila luteta lwa kutinyiswa kwa motu nene Bambu Chapanga. Hinu paligono la saba yati mwikita mngonganu wa msopi. Mkoto kuhenga lihengu."

9 Kangi Bambu Chapanga akamujovela Musa, 10 "Vajovela vandu va Isilaeli naha, pemwiyingila pamulima wenikuvapela na pemubena mabenu gegavili mwenumo, mumletela mteta wa Chapanga likinja la mabenu ga kutumbula gemubenili. 11 Ligono la kupumulila pelimalika na kubwela ligono leligelekela mteta yati iyinula kunani palongolo yangu nene Bambu Chapanga muni gayidakiwa ndava yinu. 12 Hinu ligono pemuyinula kuniwusila likinja la mabenu genago ga kutumbula palongolo yangu yati mukunipela nene Bambu Chapanga luteta lwa kutinyiswa ya mwana limbelele ligosi wa mwaka umonga angali chilema. 13 Pamonga na luteta lwenulo yati mukuniwusila luteta lwa mabebu kilo yimonga ya uhembe nyililili weuhangisini na mahuta ga zeituni gemukuniwusila nene Bambu Chapanga kwa motu, lwelunaunungalilu wabwina na nene yati ukuniganisa. Mewawa yati mukuniwusila Luteta lwa mnyweso lita yimonga ya divayi. 14 Katu mkoto kulya libumunda loloha amala mabenu gegakalingwi amala mabenu gamupya mbaka ligono lemukuniwusila nene Bambu Chapanga winu luteta ulu. Lenili ndi lilagizu la kusindimala kwa viveleku vyevigelekela pandu popoha pemwitama."

15 "Yati muvalanga majuma saba kuhuma ligono lila lelagelekili Ligono la Kupumulila, pemwaletili likinja mabenu ga kuyinuliwa ndi yati mkunipela likinja ga mabenu ga luteta lwa kuniwusila kwa ulangisu kwangu nene Bambu Chapanga. 16 Pelihika ligono la hamsini, ligono la pili ya Kupumulila la saba, yati mukuniwusila nene Bambu Chapanga luteta lwa mabenu ga mupya. 17 Kila vandu va munyumba yati vileta mabumunda gavili ga luteta lwa kukita ulangisu palongolo yangu nene Bambu Chapanga. Kila libumunda liganikiwa liyochiwi kwa kilo zivili za uhembe weusopiwi ngemeku, na wenuwo yati mukunipela nene Bambu Chapanga kuvya luteta lwinu lwa kuyinuliwa lwa mabenu ginu ga tumbulanu kwa Bambu Chapanga. 18 Pamonga na mabumunda genago, yati ileta vanamambelele saba vagosi va mwaka umonga vangali dosali, mpapakasi wa ng'ombi yigosi mmonga na mambelele gagosi gavili. Hinyama yeniyo yati yivya luteta lwa kutinyiswa kwa Bambu Chapanga pamonga na luteta lwa mabenu na luteta lwa mnyweso, vyeviwusiwi kwa motu lweluvii na unungalilu weukumganisa Bambu Chapanga. 19 Kangi yati mukuniwusila lipongo limonga la luteta la kulekekesa kumbudila Chapanga na mambelele gagosi gavili ga mwaka umonga ndava ya luteta lwa uteke. 20 Mteta wa Chapanga yati akuvayinula vana limbelele vavili vala palongolo ya nene Bambu Chapanga yivya luteta lwa kuyinuliwa pamonga na libumunda la mabenu ga utumbula na vala vanalimbelele vavili, kulangisa aniwusili nene Bambu Chapanga, teta zenizo ndi zamusopi kwa Bambu na zene yati zivya za vamteta. 21 Ligono lilolo yati mwikokosa mngonganu wa msopi, na mkoto kuhenga mahengu. Lenili yati livya lilagizu la kusindimala kwa viveleku vyevigelekela pandu popoha pemwitama."

22 "Pewibena mabenu gaku kumgumda, katu ukoto kubena mbaka mumbaka wa mgunda waku mewa ukoto kuwuya mumbela kulokota mazanga. Genago yati ukuvalekela vangangu na vayehe. Nene ndi Bambu Chapanga winu."

23 Kangi Bambu Chapanga akamujovela Musa, 24 "Vajovela vandu va Isilaeli aga. Muligono la kutumbula la mwehi wa saba yati mwivya na mselebuko wa kupumulila, ligono la ukumbusho lelikokoswa kwa lupyulu lwa lipenengamna kukita mngonganu wa msopi. 25 Mkoto kuhenga lihengu ligono lenilo, ndi yikuvagana muniwusila nene Bambu Chapanga luteta lwa kutinyiswa kwa motu."

26 Kangi Bambu Chapanga akamujovela Musa, 27 "Ligono la kumi la mwehi wa saba ndi ligono la utepulanisa. Ligono lenilo ndi muvya na mgonganu wamusopi na mujihinisa kulya chakulya, na kuwusa luteta zeipewa Bambu Chapanga kwa motu. 28 Mkoto kuhenga lihengu ligono lenilo ndava ndi ligono la utepulanisa, utepulanisa uhengeka ndava yinu palongolo yangu nene Bambu Chapanga, Chapanga winu. 29 Mundu yeyoha angajihinisa chakulya ligono lenilo akotoka kuvalangiwa kuvya mmonga wa vandu va Chapanga. 30 Mundu yoyoha mweihenga lihengu ligono lenilo nene Bambu Chapanga yati nikumyongomesa njwe pagati ya vandu vaki. 31 Katu mkoto kuhenga lihengu. Lenili ndi lilagizu la magono goha gangali na mwisu na kwa viveleku vinu vyoha vyevigelekela pandu popoha pemwitama. 32 Ligono lenilo ndi Ligono la kupumulila kwinu nyenye ndi yikuvagana mjihinisa chakulya kuhuma kimihi ya ligono la tisa mbaka kimihi ya Ligono la kumi la mwehi wenuwo."

33 Bambu Chapanga akamujovela Musa, 34 "Vajovela Vaisilaeli naha, kuhuma ligono la kumi na mhanu la mwehi wenuwo wa saba yati mukunihengela nene Bambu Chapanga mselebuko wa vindanda kwa lukumbi lwa magono saba. Wenuwo ndi mselebuko wangu nene Bambu Chapanga. 35 Ligono la kutumbula la magono ago saba, yati mwivya na mngonganu wamsopi ndi mkoto kuhenga lihengu. 36 Kwa lukumbi lwa magono saba yati mwiwusa luteta zeipewa Chapanga kwa motu. Ligono la nane yati mwivya na mngonganu wamsopi na kuniwusila nene Bambu Chapanga luteta lwa kutinyiswa. Mngonganu wenuwo ndi wakumalisila, ligono lenilo mkoto kuhenga lihengu."

37 "Yeniyi ndi miselebuko yangu nene Bambu Chapanga yeyipangiwi ndi yati mukuzikokosa kuvya na mngonganu wa msopi na kuniwusila nene Bambu Chapanga luteta zeziwusiwa kwa motu, luteta za kutinyisa na luteta za mabenu na luteta za mnyweso ngati cheyiganikiwa magono goha. 38 Luteta zenizi ndi chiyonjokesu cha zila zemukuniwusila Ligono la Kupumulila la Bambu Chapanga, mewawa ndi chiyonjokesu cha luteta zinu ya chochoa chemuviki nadhili na luteta zinu zemukuniwusila nene Bambu Chapanga kwa kugana kwinu mwavene."

39 "Pemwimala kubena migunda yinu yati mwikita mselebuko kwa Bambu Chapanga kwa lukumbi lwa magono saba kuhuma ligono la kumi na mhanu la mwehi wa saba. Ligono la kutumbula yati livya Ligono la Kupumulila, mewawa na ligono la nane yati livya la kupumulila. 40 Ligono la kutumbula yati mwitola matunda ga mikongo yinu yabwina, mambanda ga mavali na mabanda gegavi na mahamba gamahele na mabanda ga mikongo yeyimela pamuhana ya mfuleni na nyenye mujenga vikonjo. Kangi mselebukayi mselebuko wenuwo kwa magono saba palongolo yangu nene Bambu Chapanga, Chapanga winu. 41 Miyaka yoha yikuvagana kukita mselebuko wenuwukwa lukumbi lwa magono saba kwa kumtopesa Chapanga. Lenili ndi lilagizu lemukamula magono goha muviveleku vinu vyoha. mkita mselebuko mumwehi wa saba. 42 Mumagono saba yati mwitama muvindanda. Vandu voha vevavelikwi ku Isilaeli yati vitama muvindanda magono genago, 43 muni viveleku vinu vabwela kumanya kuvya nene ndi mwenavawusili vagogo vinu kuhuma kumulima wa Misili navakitili vatama muvikonjo vyenivi. Nene ndi Bambu Chapanga, Chapanga winu."

44 Hinu Musa avakokosili vandu va Isilaeli miselebuko yeyilagiswi na Bambu Chapanga.