1 Bambu Chapanga akamjovela Musa, "Uvajovela vamteta vana va Alon, pakotoka kuvya na mteta yoyoha pagati yavi mweakujikita kuvya angayidakiliwa mukufugama kwa kupamisa mtuhi wa mundu yoyoha pagati ya valongo vavi, 2 ngati yikavya mtuhi wa mlongo waki wa papipi, ngati nyina waki amala dadi waki amala msongolo waki amala msikana waki amala muhaja waki, 3 amala mlumbu waki mweitama pamonga navu, ndava muni angagegewa, ndava ya venavo ihotola kupamisa mituhi na akavya angayidakiliwa 4 Nambu iganikiwa lepi kujikita angayidakiliwa mukufugama kwa kupamisa mituhi ndava ya valongo va kugegelana, na kuvya angayidakiliwa mukufugama."

5 Katu vamteta va Chapanga vakotoka kuketa mayunju ga mumihana ya mitu yavi mewa vakotoka kuketa manjwemba gavi amala kujichanja chali higa zavi ndava ya kulangisa kuvya vakumvembenekela mundu mweafwili. 6 Vamteta yikuvagana vavyai vamsopi kwa Bambu Chapanga wavi, katu vakoto kulivevesa liina la Chapanga wavi. Ndava ndi veviwusa luteta lwa kutinyiswa kwa motu kwa nene Bambu Chapanga ngati chakulya changu nene Bambu Chapanga ndi yikuvagana vavya vamsopi. 7 Vamteta va Chapanga, katu vakotoka kugega vadala vevajihakisi kwa ukemi amala vamdala vangavya kamwali amala vevalekiwi na vagosi vavi, ndava muni vamteta ndi vamsopi kwa Bambu Chapanga wavi. 8 Vandu vavawona vamteta va Chapanga kuvya vamsopi, muni vene vakuniwusila nene Bambu Chapanga luteta za chakulya, muni nene ndi namsopi na nikuvabagula vandu vavya kuupandi wangu ndu. 9 Ngati msikana wa mteta wa Chapanga ndi ajivevisi kwa kukita ukemi na kumpela soni dadi waki, yati ikomiwa kwa kuyochwa motu.

10 "Mteta mkulu yoyoha mweavii mkulu pagati ya valongo vaki, mwene ayitiliwa mahuta kumutu waki na mwene ahaguliwi kuwala nyula za chimteta akotoka kutama changali kukwemula mayunju gaki na akotoka kupapula nyula zaki za kunyumba. 11 Katu akotoka kuhamba pandu pepavii na mituhi na akotoka kujikita angayidakiliwa ndava ya mtuhi wa dadi waki amala wa nyina waki. 12 Wala akotoka kuwuka pandu pamsopi kwa kunyalwa mahuta ga Chapanga waki pamutu, hinu ndi akotoka kuwuka pandu pamsopi mewa akoto kupavevesa. Nene ndi Bambu Chapanga. 13 Mteta Mkulu yikumgana ndu kugega msikana mweavii kamwali. 14 Akoto kugega lipwela amala mdala mwealekiwi na mngana waki amala mkemi. Ndi yikumgana kumgega kamwali kuhuma kwa vandu vaki mwene, 15 muni akoto kuvakita vana vaki mwene vangayidakiliwa pagati ya vandu vaki. Nene ndi Bambu Chapanga mwenimukiti avya wamsopi."

16 Kangi Bambu Chapanga akamjovela Musa, 17 "Mjovela Aloni aga, chiveleku chaku chochoa pagati ya viveleku vyoha vevigelekela mweavi libala muhiga, iyidakiliwa lepi kuhegelela na kunivikila nene Bambu Chapanga waki luteta lwa chakulya. 18 Mundu yeyoha mweavi ngalola amala chitamile amala mweabondwiki pamihu amala anachiungu chitali neju ya cheyiganikiwa, 19 amala mweagogodili chigendelu amala chiwoko, 20 mweavi na chipindi amala mhupi kuliku uyovela, mihu kumlyenge amala utamu wa ngozi mweavi na maputi amala kahumbi kapecha. 21 Mvelekwa yoyoha cha mteta Aloni mweavi na chilema akotoka kuhegelela kuniwusila teta zeziwusiwa kwa Bambu Chapanga kwa motu muni avi na chilema katu akoto kuhegelela kuwusa Chakulya kwa Bambu Chapanga. 22 Mundu mwenuyo ihotola kulya chakulya cha msopi neju chechiwusiwi ndava yangu nene Bambu Chapanga waki mewa na vyakulya vingi vyamusopi. 23 Nambu ndava muni ana chilema, akoto kuhegelela papipi na lipanzia amala pandu pa kuwusila teta muni akoto kupahakasa pandu pangu pamsopi. Nene ndi Bambu Chapanga, mwanikuvakita vavya vamsopi."

24 Hinu Musa akamjovela mambu ago goha Aloni na vana vaki pamonga na vandu voha va Isilaeli.