1 Bambu Chapanga akamjovela Musa kuchitumbi Sinai, 2 Vajovela Vaisilaeli kuvya, pemuyingila pamulima wenikuvapela nene Bambu Chapanga mumwaka woha wa saba yiganikiwa ndima yipumuliswa mkotoka kuyilima kwa utopesa wangu nene Bambu Chapanga. 3 Kwa lukumbi lwa miyaka sita yati mwilima ndima na yati mwimija, yati mudumulila mizabibu yinu na kubena mabenu ginu. 4 Nambu pa mwaka wa saba mwaka wa kupumulila ndava ya Bambu, ndima yikotoka kulimwa wenuwo ndi mwaka wemukuyiwusa ndima kwangu nene Bambu Chapanga. Mkoto kumija mbeyu mumigunda yinu, mewa mkoto kudumula mizabibu yinu mambanda. 5 Chindu chochoa chechimela chene mkoto kubena mewa mkoto kuyava zabibu kuhuma mumkongo wangadumuliwa mambanda gaki. Wenuwo ndi mwaka wa kuleka kulima ndima. 6 Hati naha mwaka wenuwo wa kupumulila ndima yati yikuvapela chakulya nyenye, vavanda vinu vagosi na vadala, vandu vemvapeli lihengu na vayehe vevitama pagati yinu. 7 Mulima yati ulisila hinyama yinu ya kudimwa na hinyama ya kudasi, na chochoha chechipambika mumulima yati chiliwa.

8 Yati mwivalanga miyaka ya kupumulila saba mala saba na jumula ya miyaka yoha ndi yati hivya alubaini na tisa. 9 Kangi ligono la kumi la mwehi wa saba ndi ligono la kukitiwa utepulanisi yati mukumtuma mundu apyula lipenenga pamulima woha. 10 Mumwaka wa hamsini yati mukuubagula ndava ya nene Bambu na vandu voha vevitama mumulima wenuwo yati vikokosewa ulekekesu. Mwaka wenuwo yati wivya mselebuko wa ukumbusho wa miyaka hamsini. Kila mundu yati iwuyila vindu vyaki mwene na kukiliwuka kwa valongo vaki. 11 Ndava mwaka wenuwo ndi wa mselebuko wa ukumbusho wa miyaka hamsini, mkoto kumija mbeyu mewa mkoto kubena chindu chochoa chechimeli chene amala kuyava zabibu kuhuma mumkongo yemwangadumulila mambanda gaki. 12 Mwaka wenuwo ndi wa mselebuko kwinu, yati wivya mwaka wa msopi. Ndi yati mwilya gala gegameli gene ku migunda.

13 Mumwaka wenuwo wa hamusini kila mumonga yati iwuya kunyumba yaki mwene. 14 Pewigula amala kugulisa ndima kwa muisilaeli muyaku mukotoka kupunjana. 15 Peugula ndima kuhuma kwa Muisilaeli muyaku bei yiganikiwa yiwanangana malagizu ga miyaka amusini. Mweigulisa agulisa kuwanangana na miyaka yeyisigalili mbaka ku miyaka hamusini yeyisigalili. 16 Miyaka cheyiyendelela kuvya yamahele mbaka kumuselebuko wungi wa miyaka hamusini ndi bei cheyiyongeseka kuvya yivaha, na miyaka cheyiyendelela kuvya hidebe na bei ndi yivya yidebe, muni bei yaki yati yipimwa kuwanangana na miyaka yeubena mabenu gaki. 17 Kotoka kumpunja Muisilaeli muyaku, nambu mumtopesa Bambu Chapanga winu, nene ndi Bambu Chapanga, Chapanga winu.

18 Mulanda mihilu yangu nene Bambu Chapanga na kuyidakila malagizu gangu, muni mupata kuyendelela kutama bwina pamulima. 19 Kangi ndima yati yipambika mabenu, na nyenye yati mwilya na kuyukuta na kutama mwenumo bwina.

20 Nambu pangi mwiholalela, "Yati tilya kyani pamwaka wa saba ngati tibesiwi kumija mewa kubena mabenu gitu?" 21 Chakaka! Nene Bambu Chapanga yati nikuumotisa mulima mu mwaka wa sita wene yati yikuvapela mabenu ga kukola kwa miyaka yidatu. 22 Pemwimija mu mwaka wa nane yati mwilya mabenu ga miyaka yamumbele mewa yati mwiyendelela kulya mabenu genago mbaka mu mwaka wa tisa pemwitumbula kavili kubena.

23 Katu ndima yikotoka kuguliswa yoha njwee, muni yeni ndi yangu na nyenye ndi vayehe na muvi mulugendu pamulima wangu.

24 Mumulima yoha yila yemwihamba kuyitola na kuyitalalila ndi ngati mundu agulisi ndima yuyo mweagulisi yati yikumugana ayigombola. 25 Ngati Muisilaeli muyaku yati ivya mngangu na agulisi ndima yaki, ndi valongo vaki va papipi ayigombola na kumuwuyasila. 26 Ngati mundu mwenuyo angali mlongo mweavi na uhotola wa kuyigombola, nambu mwanakandahi mweagulisi ndima akavya na uhotola wa kuyigula ndima yeniyo ndi yikumugana ayigombola, 27 yati ihamula kangi samani yaki kwa miyaka kuhuma peagulisi, na kuwuyisa mashonga gegasigalili kwa mundu mweamugulasili ndima yeniyo, na mwene yati ihotola kuiwuyila ndima yaki. 28 Nambu ngati avi lepi na mashonga genago ga kumuwuyisila, hinu yati yisigalila mumawoko ga yula mweaguli mbaka pa mwaka wa mselebuko wa miyaka hamsini. Ku mwaka wa amusini ndi yati yiwuyiswa kangi kwa mwene.

29 "Ngati mundu agulisi nyumba yaki yeitama yeyivi mugati ya muji weutindisiwi luwumba luvaha lwa ulonda, yati ihotola kuyigombola mu lukumbi lwa mwaka umonga kuhuma peayigulisi. Pa mwaka wenuwo woha ihotola kuyigombola. 30 Ngati nyumba yeyivi pamuji weutindisiwi luwumba yangagombolewa kwa lukumbi lwa mwaka umonga, hinu nyumba yeniyo ndi yivya ya yula mweagulili magono goha gangali mwishu kwa viveleku vyavi vyoha, mewa yati yiwuyiswa lepi kwa mwene lukumbi lwa mumselebuko wa miyaka hamsini. 31 Nambu nyumba za kuvijiji zangatindisiwa luwumba luvaha, yati zivalangiwa kwa malagizu galagala ga ndima, nyumba zenizo yati zivalangiwa ngati migunda. Vene vihotola kuzigombola, na zene zikiliwuswa mumwaka wa mselebuko wa miyaka hamusini. 32 Lukumbi lwolwoha Valawi vihotola kugombola nyumba zavi mumiji ya Valawi yevitama. 33 Ndava yeniyo vindu vya Mlawi vihotola kugombolewa, ndi nyumba yeyiguliswi pagati ya muji wowoha wevitama yati yiwuyiswa mwaka wa hamsini wa mselebuko, ndava muni nyumba zezivi mumiji ya Valawi ndi nyumba zavi magono goha pagati ya mulima woha wa Isilaeli. 34 Nambu migunda ya kulisila mifuya yeyitindila miji ya Valawi, yikoto kuguliswa muni wenuwo ndi uhali wavi magono goha."

35 Ngati Muisilaeli muyaku ivya mngangu na ihotola lepi kupata vindu vyaki, yikukugana veve umtangatila, ayendelela kutama pamonga na veve mhengela ngati ukumhengela myehe amala mweavi mulugendu mweahikili kwaku muni ahotola kutama na veve. 36 Ukoto kumgana akulipa chiyonjokesu namuna yeyoha yila. Nambu uvya mweukumuyinula Bambu Chapanga, na mlongo waku ahotola kutama pamonga na veve. 37 Ukoto kumuyaika mashonga muni awuyisa kwa chiyonjokesu amala kumgulisila chakulya muni upata chiyonjekesu. 38 Nene ndi Bambu Chapanga, Chapanga waku, mwenikuwusili pamulima wa ku Misili na kukupela mulima wa Kanaani, na kuvya Chapanga waku.

39 Ngati Muisilaeli muyaku ivya mngangu, na mwene akajigulisa kwaku ngati mvanda ukoto kumkita akuhengela ngati mvanda. 40 Yati itama pamonga na veve ngati mhenga lihengu mweaajiliwi amala ngati avi mlugendu. Yati akuhengela mahengu mbaka mwaka wa mselebuko wa miyaka hamsini. 41 Mwaka wenuwo umlekekesa mwene na vana vaki awuya na yati iwuya kwa vandu va lukolo lwaki na ku vindu vya vagogo vaki. 42 Ndava muni Vaisilaeli ndi vatumisi vangu venivawusili kuhuma mulima ku Misili, hinu katu vakoto kuguliswa ngati vavanda. 43 Ukoto kuvatalalila valongo vaku kwa ligoga, nambu umfugamila Chapanga waku. 44 Ngati ugana vavanda vagosi amala vadala, uhotola kuvagula kuhuma kwa vandu va milima yingi ya papipi. 45 Wihotola mewa kugula vavanda kuhuma kwa vayehe vevitama pamonga na veve kwa lukumbi ndu na valongo vavi vevavelekiwi pandima yinu, vene yati vivya vaku. 46 Vavanda venavo wihotola kuvagotolela vana vaku vavya uhali wavi wa magono goha. Venavo wihotola kuvakita vavanda vaku, nambu mlongo waku Muisilaeli, ukoto kumtalalila kwa ligoga.

47 Ngati myehe amala mundu mweitama pagati yinu kwa lukumbi ndu ndi apati vindu vyamahele na Muisilaeli muyaku ivya mngangu na kujigulisa kwa myehe mwenuyo amala kwa mmonga wa valongo vaki mweitama pagati yinu, 48 ihotola kugombolewa peamali kujigulisa, mmonga wa valongo vaki ihotola kumgombola, 49 dadi mvaha amala dadi waki mdebe amala mmonga wa valongo vaki va uveleku umonga ihotola kumgombola, mewawa ihotola kujigombola mwene ngati avi na vindu vyamahele. 50 Mwene pamonga na mweamgulili yati vivalanga lukumbi kuhuma mwaka weajigulisi mbaka mwaka wa hamsini. Beyi ya kumugombola yati yitegemelana na luhuna lwa mundu mweavii mulihengu na miyaka yeatumikili. 51 Ngati mvalangu wa miaka ndi yamahele mabaka mwaka wa mselebuko wa miyaka hamsini, hinu yati iwuyisa mashonga gamahele ngati mashonga gealipiwi. 52 Ngati miyaka yipungwili kwakona kuhika mselebuko wa ukumbusho wa miyaka hamsini, yati ivalanga pandu pa bei yeyisigalili kuwanangana na miyaka yeniyo na kumlipa fidiya. 53 Lukumbi lwoha peivya kwa bambu waki ndi yikumgana ahengewa ngati mundu mweavi mulihengu. Yula mweamgulili akoto kumkitala ukali. 54 Nambu ngati mundu mwenuyo agomboliwi lepi kwa njila zenizo, ndi mwene na vana vaki yati vilekekeswa lukumbi lwa mselebuko wa miyaka hamsini. 55 Vaisilaeli ndi vatumisi vangu, muni navawusili kuhuma ku mulima wa ku Misili. Nene ndi Bambu Chapanga, Chapanga winu.