1 Bambu Chapanga amjovili Musa, 2 "Mjovela Aloni na vana vaki pamonga na vandu voha va Isilaeli aga ndi malagizu gealagizi Bambu Chapanga. 3 Ngati mundu yeyoha pagati ya Vaisilaeli akahinja ng'ombi yigosi amala mwalimbelele ligosi amala mene yigosi mugati ya Lindanda amala kuvala ya Lindanda, 4 pahala pa kuleta chinyama chenicho pamlyangu wa lindanda la kukonganekela muni kuvya luteta kwa Bambu Chapanga palongolo ya Lindanda Lamsopi, mundu mwenuyo yati ivya ahoki kwa kuyita ngasi, ayiti ngasi na yati ibaguliwa na vandu vaki. 5 Ndava ya malagizu aga ndi kuvya Vaisilaeli yikuvagana kuleta palongolo ya Bambu Chapanga hinyama ndi hinu vakuhihinja kumigunda viganikiwa kuhileta palongolo ya mteta ndi kwa Bambu Chapanga pamlyangu wa lindanda la kukonganekela, mwene yati akuvihinja na kumuwusila Bambu Chapanga luteta lwa kutama kwa uteke. 6 Penapo mteta wa Chapanga yati inyunyusila ngasi palusanj lwa Bambu Chapanga lweluvili pamlyangu wa lindanda la kukonganekela na kugayocha gala mahuta geginungalila bwina ga kumganisa Bambu Chapanga. 7 Ndava yeniyo Vaisilaeli yati vileka njwe kuwusa teta zavi kwa michapanga ya mene, lijambu lelivahengili vakoto kusadikika kwa nene. Lilagizu lenilo valikamulayi magono goha gangali na mwishu mu viveleku vyavi vyoha vyevibwela."

8 "Vajovela kuvya mundu yeyoha pagati ya Vaisilaeli amala pagati ya vayehe, mweiwusa luteta lwa kutinyiswa amala luteta lungi lwoloha, 9 nambu ayiletili lepi palongolo ya mlyangu wa lindanda la kukonganekela muni kumuwusila Bambu Chapanga, mundu mwenuyu yati ibaguliwa na vandu vaki."

10 "Ngati mundu yeyoha pagati ya Vaisilaeli amala myehe mweitama pagati yavi ngati ilya ngasi yeyoha, nene yati nikumuyomela mundu mwenuyo na kumbagula kutali na vandu vaki. 11 Ndava muni wumi wa chiumbi chochoha uvii mungasi yaki. Na nene nikuvalagisa ngasi yiletwa pandu pa kuwusila teta muni kukita utepulanisu ndava yinu na nene Bambu Chapanga ndava muni ngasi ndi yeyikita utepulanisa ndava ya wumi winu. 12 Ndava yeniyo nikuvalagizi Vaisilaeli naha kuvya mundu yoyoha pagati yinu amala myehe mweitama pagati yinu katu akotoka kulya ngasi."

13 "Mundu yeyoha pagati ya Vaisilaeli amala myehe mweitama pagati yinu akahamba kuzingila hinyama amala chidege, yikumgana ayiyita ngasi pahi na kuyigubika kwa ludaka. 14 Ndava muni wumi wa kila chiumbi uvii mungasi. Ndi muni nivalagizi Vaisilaeli, katu vakoto kulya ngasi ya chiumbi chochoa ndava wumi wa chiumbi chochoa ndi ngasi yaki. Mundu yeyoha mweilya ngasi yati ibaguliwa."

15 "Mundu yoyoha avya mkolonjinji amala myehe, mweilya chochoa chechifwili chene amala chechikomiwi na chinyama cha kudai, yikumgana achapa nyula zaki na kusamba, mwene yati ivya mhakasa mbaka kimihi. peimala genago yati ivya mbwina. 16 Nambu ngati mundu mwenuyo ichapa lepi nyula zaki na angasamba, ndi lelikumkolela laki mwene."