1 Bambu Chapanga akamjovela Musa, 2 "Uvajovela msambi woha wa va Isilaeli naha, ndi yiganikiwa muvya vamsopi ndava Nene Bambu Chapanga, Chapanga winu ndi namsopi. 3 Kila mmonga winu yikumgana kumtopesa nyina na dadi waki, mewawa yikumgana kutopesa ligono la kupumulila. Nene ndi Bambu Chapanga, Chapanga winu."

4 Mkoto kunileka na mukagundamila vimong'omong'o amala mkoto kujitengenezela michapanga ya shaba. Nene ndi Bambu Chapanga, Chapanga wenu.

5 "Pemuwusa luteta lwa uteke nene Bambu Chapanga, muniwusila ngati cheyiganikiwa muni mupata kuyidakiliwa. 6 Luteta lwenulo luganikiwa luliwa ligono lilolo peluwusiwa amala chilau yaki. Nyofu yeniyo yeyisigalila mbaka ligono la datu ndi yiganikiwa kutinyiswa kwa motu. 7 Ngati pandu pa nyofu yaki yati yiliwa paligono la datu, nyofu yeniyo yiyidakiliwa lepi, na chinyama chenicho chechiwusiwi luteta yati nikuchiyidakila lepi mukufugamila Chapanga. 8 Mundu yeyoha mweilya nyofu yeniyo ndi ivya ahokili ndava kuchitumila chindu chechiwusiwi kwa Bambu Chapanga ndu. Mundu mwenuyo yati ibaguliwa kutali na vandu vaki."

9 "Pewibena mabenu ga ndima, kotoka kubena mbaka mumbaka wa mgunda waku na kotoka kuwuya kulokota mazanga. 10 Mkoto kuwuyila kubena mumngunda wa mizabibu, wala kotoka kunonga zabibu zezigwili pahi, zenizo yati ukuvalekela vangangu na vayehe. Nene ndi Bambu Chapanga, Chapanga winu."

11 "Mkotoka kuyiva amala mkotoka kukongana amala mkutoka kujovelana udesi. 12 Mkotoka kulapa kwa liina langu cha udesi na kulikita liina langu likotoka kutopeswa nene ndi Bambu Chapanga winu. Nene ndi Chapanga waku."

13 "Kotoka kumpunja amala kumuyivila muyaku. Luhuna lwa mundu mweakuhengili lihengu lukoto kutama kwaku kilu yoha mbaka lukela. 14 Kotoka kumpela likoto ngayuwa na kotoka kuvika chindu chochoha chakumukita ngalola akuvanduka nambu umufugamila Chapanga waku. Nene ndi Bambu Chapanga."

15 "Pewihamula muhamula kwa kuwanangana, kotoka kumganisila mngangu na kumyogopa mweavi vindu vyamahele. Nambu yikuvagana kumuhamula muyaku kwa uwanangana. 16 Katu kotoka kuhamba kuni na kula kudandasa luhonda pagati ya vandu vaku. Kotoka kukita lijambu loloha lelihotola kuyokisa wumi wa muyaku. Nene ndi Bambu Chapanga waku."

17 "Kotoka kumuvenga mlongo waku mumtima waku, na umuhakalila mlongo waku hotohoto muni ukoto kumbudila Bambu Chapanga. 18 Ukotoka kumuwuyisila uhakahu weakuhengili muyaku amala kuvya na ligoga panani ya mmonga wa vandu vaku nambu mgana mundu wa papipi yaku ngati chaukujigana wamwene. Nene ndi Bambu Chapanga."

19 Mugakamula malagizi gangu. Kotoka kuleka mifuya yaku yiwowotelana na hinyama ya aina yingi. Kumgunda waku kotoka kumija mbeyu za aina zivili. Ukotoka kuwala nyula zezitotiwi aina zivili za wuzi.

20 "Ngati mgosi akagonekana na mdala mvanda, mweagegiwi na mgosi yungi nambu akona kugombolewa na mgosi mweamuwusili mkungi, mgosi mweagonikini nayu na mdala mwenuyo ndi voha vikungiwa. Nambu vakotoka kukomiwa ndava mdala mwenuyo avii akona mvanda. 21 pamonga na naha mgosi mwenuyo iganikiwa aleta limbelele ligosi pa mulyangu wa lindanda la kukonganekela ndava ya luteta lwa kulekekesa kuhoka kwa Bambu Chapanga. 22 Mteta wa Chapanga yati akulihinja limbelele ligosi lenilo la kulekekesa kuhoka na mwene yati ikita utepulanisa ndava ya mundu mwenuyo palongolo ya Bambu Chapanga ndava ya kubuda kweahengili."

23 "Hinu pemwihika pamulima wa Kanaani na kumija mikongo ya matunda ndalindali, kwa miyaka hidatu matunda genago yati givya gangayidakiliwa mukumfugamila Chapanga, ndi mganikiwa lepi kugalya. 24 Mulukumbi lwa mwaka wa mcheche matunda goha yati givya Gamsopi, yati mukugaleta kwa nene Bambu Chapanga kuvya luteta lwa ulumba. 25 Nambu mumwaka wa muhanu mwihotola kulya matunda genago goha na kwa kukita chenicho mikongo yinu yati yipambika matunda gamahele. Nene ndi Bambu Chapanga, Chapanga winu."

26 "Mkoto kulya nyofu yoyoha yeyivi na ngasi. Mkoto kulondola amala kukita uhavi. 27 Mkoto kuketa mayunju ginu gegavii mumihana ya mutu amala kuketa manjwemba ginu. 28 Mkoto kuchanja chali higa zinu ndava ya mundu mweafwili amala kujichola ulangisu wa chindu muhiga zinu. Nene ndi Bambu Chapanga."

29 "Kotoka kumudenyela utopesa msikana waku kwa kumkita avya mkemi, mulima woha walavya na vakemi vamahele na kumema gahakahu. 30 Mkamula ligono langu la kupumulila na mupatopesa pandu penigugamiliwa. Nene ndi Bambu Chapanga."

31 "Mkoto kuhamba kwa valondola, wala kwa vevikwesa mizuka muni vavalondolela, mukakita chenicho ndi yati muvya mwangayidakiliwa mukufugama. Nene ndi Bambu Chapanga, Chapanga winu."

32 "Pewivya palongolo ya gogo ndi uyima kulangisa utopesa kwa vagogo, na veve umgundamila Bambu Chapanga waku. Nene ndi Bambu Chapanga."

33 "Ngati pamulima waku avi myehe kotoka kumkitila gahakau. 34 Myehe mwenuyo mweitama na veve ahengewa ngati cheihengewa mkolonjinji ndi veve yati ukumgana ngati cheukujigana wamwene, ndava hati veve wavi wamyehe pamulima wa ku Misili. Nene ndi Bambu Chapanga, Chapanga winu."

35 "Katu kotoka kuhengela vipimu vya udesi pewipima utali na utopa na umemesa. 36 Ndi yikuvagana kutumila mizani ya chakaka, na vipimu vyeviganikiwa. Ndi nene Bambua Chapanga, Chapanga winu, mwenavawusili kuhuma mulima wa ku Misili. 37 Ndi yikuvagana kukamula na kulanda mihilu na malagizu gangu. Nene ndi Bambu Chapanga."