1 Ligono la kutumbula la mwehi wa saba, yati mwivya mngonganu ndava ya kumfugamila Bambu mkoto kuhenga lihengu. Ligono lenilo ndi ligono la kupyula mapenenga. 2 Ndi yati mwiwusa teta ya kutinyiswa, yivya na unungalila bwina wa kumganisa Bambu Chapanga, ng'ombi yigosi, limbelele ligosi limonga pamonga na vamambelele vagosi saba va mwaka umonga voha vakoto kuvya na chilema. 3 Mewa yati mwiwusa teta yaki ya uhembe wabwina weuhangisini na mahuta, Kilo zidatu kwa kila ng'ombi yigo na kilo zivili kwa kila limbelele ligosi, 4 pamonga na kilo yimonga kwa kila mwanalimbelele. 5 Kangi yati mwiwusa lipongo limonga kwa kila teta ya kulekekesa kumbudila Chapanga ndava ya kukitiwa utepulanisi. 6 Chenichi ndi chiyonjokesu cha teta za kutinyiswa za kila mwehi na kila ligono pamonga na teta zaki za uhembe na teta za minyweso ngati chayiganikiwa. Changali kuleka teta zeziwusiwa kwa Bambu kwa motu, zivya unungalilu wabwina.

7 "Ligono la kumi la mwehi wa saba yati mwikita mngonganu ndava ya kumfugamila Bambu. Ligolo lenilo yikuvagana kujihinisa chakulya na mkoto kuhenga lihengu. 8 Mewa yati mukumuwusila Bambu Chapanga teta ya kutinyiswa kwa motu, yivya unungalila wa kumganisa Bambu Chapanga, Mpapakasi mmonga, limbelele ligosi limonga vanalimbelele saba va mwaka umonga. Voha vakoto kuvya na chilema. 9 Pamonga na ng'ombi zigosi mtendekeha teta ya mabenu pandu pa lilundu la datu la kumi za uhembe nyilili weuhangasini na mahuta, Pamonga na limbelele ligosi, na pandu pa zivili za kumi za uhembe nyilili, 10 na kilo yimonga kwa kila mwanalimbele pagati ya vala saba. 11 Mewa yati mwiwusa lipongo limonga kuvya luteta lwa kulekekesa kumbudila Chapanga ya kukitiwa utepulanisa, pamonga na teta ya uyovelu wa kutinyiswa na teta yaki ya uhembe na teta zaki za mnyweso."

12 Ligono la kumi na mhanu ya mwehi wa saba, yati mwikita mngonganu ndava ya kumfugamila Bambu Chapanga. Mkoto kuhenga lihengu ligono lenilo. Ndi ya mselebuko ndava ya Bambu Chapanga kwa magono saba. 13 Yati mwiwusa teta ya kutinyiswa kwa motu, unungalila bwina yeyikumganisa Bambu Chapanga, ng'ombi zigosi kumi na vadatu, mambelele gagosi gavili vanalimbelele kumi na mcheche va mwaka umonga. Voha vakoto kuvya na chilema. 14 Pamonga na ng'ombi zigosi kumi na zidatu, kila yimonga yitendekewa na teta ya pandu pa datu pa kumi za uhembe nyilili weuhangasini na mahuta, kwa mambelele gavili gagosi, kila limonga litendekewa pandu zivili ya kumi za uhembe nyilili, 15 na kilo yimonga kwa kila limbelele ligosi. 16 Mewa yati mwiwusa lipongo limonga kuvya teta ya kulekekesa kumbudila Chapanga yivya teta ya magono goha ya kutinyiswa, changali kuleka kuwusa teta yaki ya uhembe na teta yaki ya mnyweso.

17 "Paligono la pili yati muwusa, ng'ombi zigosi kumi na vavili na mambelele magosi gavili na vanalimbelele kumi na mchehe, va mwaka umonga vangali chilema. 18 Mewa yati mwiwusa teta ya uhembe na teta za mnyweso pamonga na vala ng'ombi zigosi na mambelele na vanalimbelele va mwaka umonga, kuwanangana na umahele wavi. 19 Mewawa yati mwiwusa lipongo limonga kuvya teta ya kulekekesa kumbudila Chapanga, changali kuleka teta ya kutinyiswa ya magono goha pamonga na teta yaki ya uhembe na teta yaki ya mnyweso."

20 "Ligono la datu yati mwiwusa, Ngombi zigosi kumi na yimonga mambelele gagosi gavili, vanalimbelele kumi na mcheche va mwaka umonga, vangali chilema. 21 Yati mukuvawusila pamonga na teta ya uhembe na teta ya mnyweso ngati cheyilagiswi kuwanangana na umahele wavi. 22 Mewawa yati mwiwusa lipongo limonga kwa teta ya kulekekesa kubuda, changali kuleka teta ya magono goha za kutinyiswa, na teta yaki ya uhembe na teta yaki ya mnyweso."

23 "Ndi ligono la mcheche yati mwiwusa, Ng'ombi zigosi kumi na mambelele magosi gavili na vanalimbelele kumi na mcheche va mwaka umonga, voha vangali chilema. 24 Mewa yati mwiwusa teta ya uhembe na teta za minyweso pamonga na ng'ombi zigosi zila na mambelele na vanalimbelele, kuwanangana na umahele wavi, ngati cheiganikiwa. 25 Kangi yati mwiwusa mewa lipongo limonga kwa teta ya kulekekesa kubuda changali kuleka teta ya magono goha ya kutinyiswa, pamonga na teta ya uhembe na teta yaki ya mnyweso."

26 "Paligono la mhanu, yati mwiwusa ngombi zigosi tisa na mambelele gavili na vanalimbelele magosi kumi na mcheche va mwaka mumonga voha vavya vangali chilema. 27 Mewawa yati mwiwusa teta ya uhembe na teta za mnyweso pamonga na ngombi zigosi zila na mambelele na vanalimbelele, kuwanangana na umahele wavi ngati cheyilagiswi. 28 Kangi yati mwiwusa mewa lipongo limonga kwa teta ya kulekekesa kubuda, changali kuleka teta ya magono goha kutinyiswa, pamongana na teta yaki ya uhembe na teta yaki ya mnyweso."

29 "Paligono la sita yati mwiwusa ng'ombi zigosi nane na mambelele gagosi gavili pamonga na vanalimbelele gagosi kumi na mcheche va mwaka umonga voha vavya vyangali chilema. 30 Mewa yati mwiwusa teta ya uhembe na teta za mnyweso pamonga na ng'ombi zigosi zila na mambelele gagosi na vanalimbelele kumi na mcheche va mwaka umonga kuwanangana na umahele wavi, ngati cheyilagiswi. 31 Yati mwiwusa lipongo limonga kuvya teta ya kulekekesa kubuda, changali kuleka teta yaki ya uhembe na teta zaki za mnyweso."

32 Paligono la saba yati mwiwusa ng'ombi zigosi saba na mambelele gagosi gavili vanalimbelele gagosi kumi na mcheche va mwaka umonga, goha vangali chilema. 33 Mewawa yati mwiwusa teta ya uhembe na teta za mnyweso pamonga na ng'ombi zigosi zila, na mambelele gagosi na vanalimbelele na kuwanangana na umahele wavi, ngati cheyilagiswi. 34 Mewa yati mwiwusa lipongo limona kuvya teta ya kulekekesa kubuda, changali kuleka teta ya magono goha ya kutinyiswa, pamonga na teta yaki ya uhembe na teta yaki ya mnyweso.

35 "Paligono la nane yati mwivya na mngonganu uvaha wa kumfugamila Chapanga. Mkoto kuhenga ligono lenilo. 36 Mewa yati mwiwusa teta ya kutinyiswa yeyinungalila bwina ya kumganisa Bambu Chapanga, Ng'ombi yigosi yimonga na limbelele ligosi limonga na vanalimbelele saba va mwaka umonga voha vangali chilema. 37 Mewawa yati mwiwusa teta ya uhembe na teta za mnyweso pamonga na ng'ombi yigosi yeniyo na limbelele ligosi na vanalimbelele vagosi saba va mwaka umonga vala kuwanangana na umahele wavi, ngati cheyilagiswi. 38 Mewa yati mwiwusa lipongo limonga kuvya teta ya kulekekesa kubuda, changali kuleka teta ya magono goha ya kutinyiswa pamonga na teta yaki ya uhembe na teta ya mnyweso."

39 "Genaga ndi malagizu kuvala luteta lwa kutinyiswa luteta lwa uhembe na luteta lwa uteke zemukumuwusila Bambu Chapanga lukumbi lwa miselebuko zinu zezihamuliwi. Pamonga na zenizo zoha, mewa zivili teta za kutinyiswa na teta ya uhembe na teta ya mnyweso zemukumuwusila Bambu Chachapa muni kutimisa nazili zinu na teta zinu za magono goha."

40 Hinu Musa avajovili Vaisilaeli kila chindu ngati Bambu Chapanga cheavalagizi.