1 Vyenivi ndi pandu pavavikili kambi pavahumili ku Misili kuni vavi mumisambi ya makabila gavi pahi ya uyimalila wa Musa na Aloni. 2 Kwa malagizu ga Bambu Chapanga, Musa ayandiki lihina kila pandu pavavikili kambi mulugendu lwavi. Zenivi ndi zavili kambi mulugendu lwavi.

3 Vaisilaeli vakawuka muji wa Lamesisi muligono la kumi na mhanu ya mwehi wa kutumbula ligono limonga peyamaliki Pasaka. Vakawuka kwa ukekesi uvaha palongolo ya Vamisili voha, 4 lukumbi ulo Vamisili vazikayi vavelekwa vavi va kutumbula vagosi vevakomiwi na Bambu Chapanga, muni Bambu Chapanga amukubuna hati michapanga yavi.

5 Hinu, Vaisilaeli vawukili Lamesisi na kuvika kambi kwenuko Sukoti. 6 Kuhuma Sukoti, vakavika kambi kwenuko Etamu pamuhana ya lugangatu. 7 Vakawuka Etamu, vakang'anamuka vakauwuya Pi Hahiloti mbaka kwelihumila lilanga la Baali Sefoni, vakavika kambi papipi na Migidoli. 8 Vawukili Pi Hahiloti, vapitili nyanja ya Shamu mabaka lugangatu lwa Etamu, vagendili kulugangatu lugendu lwa magono gadatu, vakavika kambi ku Mala. 9 Vakawuka Mala vakagenda mbaka ku Elimu, pandu pepavi na vinyepa kumi na vivili vya manji na mavali sabini, kwenuko ndi vakavika kambi penapo.

10 Vakawuka ku Elimu na kuvika kambi pamuhana ya Nyanja ya Shamu. 11 Vawukili pamuhana ya Nyanja ya Shanu na kupumulila kulugagantu lwa Sini. 12 Vakawuka lugangatu lwa Sini, vakavika kambi ku Dofika. 13 Kuhuma Dofika vakavika kambi kula ku Alushi. 14 Kuhuma Alushi, vakavika kambi yavi kula Lefidimu, pandu pepavi lepi na manji ga kunywa.

15 Vawukili Lefidimu, vakavika kambi kulugangatu lwa Sinai. 16 Vakawuka kulugantu lwa Sinai na kuvika kambi kula Kibiloti Hataava. 17 Vakawuka Kibiloti Hataava, vakavika kambi kula Haseloti. 18 Vakawuka kula Haseloti na kuvika kambi Litima. 19 Vakawuka kula Litima na kuvika kambi Limoni Pelesi. 20 Vakawuka Limoni Pelesi na kuvika kambi yavi ku Libina. 21 Kuhuma Libina vakavika kambi ku Lisa. 22 Kuhuma ku Lisa vakavika kambi ku Kehelata. 23 Kuhuma ku Kehelata, vakavika kambi Kuchitumbi cha Shefeli. 24 Vawukili Kuchitumbi cha Shefeli na vakavika kambi ku Halada. 25 Kuhuma Halada, vakavika kambi ku Makeloti. 26 Kuhuma Makeloti, vakavika kambi ku Tahati. 27 Vawukili kula Tahati na vakavika kambi yavi ku Tela. 28 Vawukili ku Tela na kuvika kambi ku Mitika. 29 Vawukili ku Mitika, vakavika kambi ku Hashimona. 30 Kuhuma Hashimona, vakavika kambi ku Moseloti. 31 Vawukili ku Moseloti na kuvika kambi ku Bene Yakani. 32 Kuhuma Bene Yakani, vakavika kambi ku Holi Hagidigadi. 33 Vawukili Holi Hagidigadi na kuvika kambi ku Yotibata. 34 Vakawuka Yotibata na kuvika kambi Abilona. 35 Kuhuma Abilona, vakavika kambi ku Esioni Gebeli. 36 Vawukili ku Esioni Gebeli, vagendili na kuvika kambi kulugangatu lwa Sini, mewa yimanyikana Kadeshi. 37 Kuhuma Kadeshi, vakavika kambi Kuchitumbi cha Holi, mumbaka wa mulima wa Edomu.

38 Kwa malagizu ga Bambu Chapanga, mteta Aloni akweli kunani ya Chitumbi cha Holi, na kwenuko ndi afwili, muligono la kutumbula mwehi wa mhanu mwaka wa alobaini tangiya Vaisilaeli pevahumili ku Misili. 39 Aloni afwili kunani ya Chitumbi cha Holi kuni avi na miyaka miya yimonga na ishili na yidatu.

40 Nkosi wa Aladi, Mkanaani mweatamayi upandi wa kusini ya mulima wa Kanaani, ayuwini kuvya Vaisilaeli vibwela.

41 Vawukili kula Kuchitumbi cha Holi na vakavika kambi yavi ku Salimona. 42 Kuhuma Salimona, vakavika kambi ku Punoni. 43 Vakawuka ku Punoni na kuvika kambi ku Oboti. 44 Kuhuma kula Oboti, vakavika kambi ku Iye Abalimu, mumbaka wa mulima wa Moabu. 45 Vawukili Iye Abalimu na kuvika kambi ku Diboni Gadi. 46 Kuhuma Diboni Gadi vagendili na kuvika kambi ku Alimoni Dibilataimu. 47 Kuhuma Alimon Dibilataimu, vagendili na kuvika kambi ku Vitumbi vya Abalimu, papipi na Chitumbi Nebo. 48 Kuhuma Vitumbi vya Abalimu, vagendili na kuvika kambi kuselede za Moabu kumwambu ya mfuleni Yoludani papipi na Yeliko. 49 Kwenuko kuselede za Moabu vakavika kambi pamuhana ya Mfuleni Yoludani, kutumbula Beti Yeshimoti mbaka Abeli Shitimu.

50 Kuselede za ku Moabu, mwambu ya mfuleni Yoludani papipi na ku Yeliko, Bambu Chapanga amjovili Musa, 51 "Vajovela Vaisilaeli kuvya pemwikupuka mfuleni Yoludani na kuyingila ku mulima wa Kanaani, 52 muvavinga vakolinjinji voha va mulima weuvi palongolo yinu. Mgwisa vimong'ong'o vyavi vyoha vya kuhongola na zezikitiwi lufumbu na kupagwisa kila pandu pavi pa pakugundamila. 53 Yati mukuutola mulima wenuwo kuvya wavi na kutama mwenumo ndava muni nivapelili nyenye yivya yinu. 54 Yati mukuugava mulima wenuwo kwa njila ya gudugudu, kulandana na lukolo lwinu, likabila livaha muligavila pandu pavaha na pandu padebe kwa likabila lidebe. 55 Nambu ngati muvavingi lepi vakolonjinji va mulima wenuwo, hinu vala vemukuleka yati vivya ngati lungoda pamihu ginu amala minga pandi zoha, yati vakuvang'aha. 56 Ngati mukuvavinga lepi nene yati nikuvakita nikuvayongomesa ngati chanagana kuvayongomesa vene."