1 Kangi Miliamu na Aloni vatumbwili kumjova chihakau Musa ndava ya mdala wa ku Esiopia mweamgegili. 2 Vakakota, "Wu, Bambu Chapanga ajovili kupitila Musa mwene ndu? Wu, ajovili lepi na tete mewa?" Na Bambu Chapanga ayuwini gavajovili. 3 Hinu Musa avii mundu mngolongondi neju, kuliku vandu vangi voha vevavili pamulima.

4 Balapala Bambu Chapanga akavajovela Musa na Aloni na Miliamu "Mubwela pa Lindanda la kukonganekela ndava yangu, nyenye vadatu." Hinu, voha vadatu vakahamba ku Lindanda la kukonganekela ndava ya Chapanga. 5 Penapo Bambu Chapanga akahelela panguzo ya lihundi, akayima pamlyangu wa Lindanda, akavakemela Aloni na Miliamu. Voha vavili vakahegelela kulongolo. 6 Kangi Bambu Chapanga akajova, "Myuwanila malovi gangu! Mlota wa Chapanga akavya pagati yinu yati nikujimanyisa kwaki mumaono na kulongela nayu mndoto. 7 Nambu lepi kwa mhengaji wangu Musa, mwene ndi msadikika avalongosa vandu vangu va Isilaeli. 8 Nene nilongela nayu kuni tilolesana, kangi hotohoto changali miluhumu hati akuniwona chanivili, Ndava kyani, hinu mwayogwipi lepi kumjova gahakau kumvala mhengaji wangu Musa?"

9 Chapanga akavayomela vene, ndi akavaleka akawuka. 10 Lukumbi lihundi pelawukili pa Lindanda la kukonganekela, Miliamu awonikini avii na mabudi ga Msopi pee. Aloni peang'anamwiki kumlola Miliamu akamuwona ana mabudi. 11 Kangi Aloni akamjovela Musa, "Veve mkulu wangu, ukotoka kutileka ting'ahika ndava muni tikiti mambu ga chiyimu na kumdila Chapanga. 12 Nikuyupa neju kotoka kumleka avya ngati mwana mng'enya mweavelekiwi kuni afwili, mweawolili yainga ya higa yaki yiwolili."

13 Ndi Musa akamvembela Bambu Chapanga, akajova, "Nikuyapa neju, veve Chapanga, umlamisa!"

14 Nambu Bambu Chapanga akamyangula Musa, "Ngati dadi waki, ngaamuhunyili mata kumihu, wu, ngaakoli lepi soni magono saba? Hinu, mumuwusa kuvala ya kambi atama kwenuko lukumbi lwa magono saba, kangi wihotola kumyidakila awuyayi pakambi." 15 Ndava yeniyo, Miliamu akavingiwa kuvala ya kambi lukumbi lwa magono saba. Vandu vatumbili lepi lugendu mbaka Miliamu peawuyiswi kavili pakambi. 16 Pegamaliki genago, vandu vawukili ku Hazeloti, vakavika kambi palugangatu lwa Palani.