1 Hinu Kola mwana wa Ishali, mwana wa Kohati kuhuma mulikabila la Lawi, pamonga na Valeubeni, yaani Dasani na Abilamu vana va Eliabu na Oni mwana wa Palesi vakavatola vandu ndalindali, 2 vakabela kumyidakila Musa. Vachilongosi vevimanyikana neju miya zivili na hamusini vevahaguliwi na vandu voha na vene vakawungana na vakina Kola. 3 Vakakonganeka palongolo ya Musa na Aloni, vakavajovela, "Nyenye mkujikwihili neju! Vandu voha ava ndi va Bambu, na Bambu Chapanga avii pamonga na tavoha. Ndava kyani nyenye muvya panani ya vandu va Bambu Chapanga?"

4 Musa peayuwini malovi ago, akafugama akayupa. 5 Kangi akamjovela Kola na valanda vaki voha, "Chilau lukela, Bambu Chapanga yati ilangisa ndi yani mweavi waki na yani mweavi wa Msopi, yula mweakumhagula yati akumkita kuhegelela papipi na nene. 6 Hinu, mkita aga, chilau lukela veve pamonga na valanda vaku voha, mtola lumbani, 7 muvika makalakala ga motu na kusopa ubani panani yaki, kangi yati mukuvipeleka palongolo ya Bambu Chapanga. Ndi yati tilola kuvya yani mweahaguliwi na Bambu Chapanga ndi yati ivya mteta, nyenye Valawi mujikwihili neju!"

8 Musa akamjovela Kola. "Myuwanila, nyenye vana va Lawi! 9 Wu! Lijambu lenili kwinu mwilola kuvya lidebe, kuvya Chapanga wa Isilaeli avabagwili nyenye na vandu voha va Isilaeli, muni apata kuvahegelesa kwaki, muni mhenga utumisi wa Lindanda la Bambu Chapanga, na kuyima palongolo ya vandu voha na kuvahengela? 10 Avapeli utopesa wa kumuhengela mu Lindanda laki, nyenye pamonga na Valawi vayinu voha. Hinu mwigana kutola na uteta wa Chapanga? 11 Ndava yeniyo veve na msambi waku mukumbela Bambu Chapanga. Nyenye mukumvembenekela Aloni, nambu chakaka ndi kuvya mukumvembenekela Chapanga."

12 Kangi Musa avakemili Dasani na Abilamu, vana va Eliabu. Nambu vene vakajova, "Tete tibwela lepi! 13 Wu, ndi lijambu lidebe, kuvya utiwusili ku Misili, mulima wabwina kwa kugana na kudimila mifuya, muni ubwela kutikoma kulugangatu? Kangi, ukujikita wamkulu witu! 14 Neju ya ago, utiletili lepi ku mulima wabwina kwa kugaba na kudimila mifuya, mewa utipeli lepi uhali wa migunda na migunda ya mizabibu. wiholalela yati ukuvakita vandu ava kuvya ngalola? Pehe, tete tibwela lepi!"

15 Ndi Musa akayoma neju na kumjovela Bambu Chapanga, "Kotoka kuyidakila teta zavi. Nene natolili lepi chindu chochoa, hati lipunda limonga kuhuma kwavi, mewa nimbudili lepi hati mmonga wavi."

16 Musa amjovili Kola, "Chilau mbwela pamonga na valanda vaku voha palongolo ya Bambu Chapanga. Mewa Aloni yati ivya. 17 Kila mundu yati igega lumbani lwaki na kusopa ubani, lumbani zoha yati zivya jumula miya zivili na hamusini na kuleta palongolo ya Bambu Chapanga. Veve na Aloni mewa yati mwileta lumbani zinu." 18 Ndava yeniyo kila mundu yati ileta lumbani lwaki, yati isopa motu na ubani mugati yaki, na kuyima pamonga na Musa na Aloni pamlyangu wa Lindanda la mngonganu. 19 Kangi Kola peavakonganisi pamonga valanda vaki voha kumbela Musa na Aloni pamlyangu wa Lindanda la mngonganu, lumuli lwa Bambu Chapanga ukahumila kwa vandu voha. 20 Penapo Bambu Chapanga akamjovela Musa na Aloni, 21 "Mjibagula na vandu venava muni nivayongomesa kanyata."

22 Nambu Musa na Aloni vakafugama na kuyinama mbaka pahi, vakajova, "Veve Chapanga, Chapanga mweukuvapela vandu wumi, yati wivya na ligoga na vandu ava voha lukumbi ndi mundu mmonga ndu mweakubudili?"

23 Bambu Chapanga akamjovela Musa, 24 "Muvajovela vandu vawuka papipi na mandanda ga Kola na Dasani na Abilamu."

25 Hinu, Musa akahamba kwa Datani na Abilamu, kuni alongosini na vachilongosi va Isilaeli. 26 Peahikili, akavajovela vandu, "Chondi muwuka pamandanda ga vandu ava vahakau na mkotoka kupamisa chindu chavi chochoa, muni mkoto kuyongomeswa pamonga navu ndava ya kubuda kwavi." 27 Vandu vawukili mumandanda ga Kola na Datani na Abilamu.

Datani na Abilamu vahumili mumandanda na kuyima pamlyangu kuni valongosini na vadala vavi na vana vavi voha hati vala vevinyong'a.

28 Ndi Musa akajova, "Chenichi ndi chemwimanya kuvya Bambu Chapanga ndi anitumili kukita mambu aga, wala gavi lepi maholo gangu. 29 Ngati vandu ava vakafwayi chifwa cha uyovelu ngati vandu vangi chevifwa amala kukolewa na gahakau gauyovelu gegakuvakolela vandu, ndi mumanya Bambu Chapanga anitumili lepi nene. 30 Nambu ngati Bambu Chapanga akakitayi lijambu lila lamupya njwee, ndima yikagubuka na kuvamila vandu ava pamonga na vindu vyavi vakahamba pandu pa vandu vevafwili kuni vakona mumi, hinu yati mwimanya kuvya vandu ava vamvevisi Bambu Chapanga."

31 Bahapo ndu peamali kujova malovi ago goha, ndima yevayimili yila yikagubuka ngati mulomo, 32 na kuvamila vandu avo, valongo vavi pamonga na valanda voha va Kola na vindu vyavi vyoha. 33 Hinu, vene pamonga na vindu vyoha vakahelela mulitinda kuni vakona mumi. Ndima yikajigubika panani yavi, voha vakayaga. 34 Vaisilaeli vangi voha vevavi mumuhana pevayuwini chivembu chavi vatilili kuni vijova, "Titilayi, ndima yikoto kutimila mewa na tete."

35 Kangi Bambu Chapanga apelikili motu wavatinyisi vala vandu miya zivili na hamusini vevahukisa ubani.

36 Pegamaliki genago, Bambu Chapanga amjovili Musa, 37 "Mjovela Eliazali mwana wa Aloni mteta awusa lumbani pamasigalilu ga motu, na kudandasa kutali motu weuvili mugati, ndava milumbani zenizo ndi vya Msopi, 38 milumbani ya vandu vevabudili na kuyokisa wumi wavi. Kita lufumbu lumbani zenizo zivya ngalingasi muni vihotola kugubika pandu pa kuwusila teta, muni viletiwi palongolo ya Bambu na vivii vyamusopi. Na vyene vivyayi ulangisu kwa Vaisilaeli." 39 Hinu Mteta Eliazali avitolili vimbani vyenivyo vya shaba vila vyevyaletiwi palongolo ya Bambu Chapanga, na vandu vala vevayongomiswi na vikitiwi lufumbu kugubika pandu pa kuwusila teta, 40 ngati chila Bambu cheamukokosili Eliazali kupitila Musa. Lenili lavii hakalilu kwa Vaisilaeli kuvya mundu yeyo mweangavya mteta, ndi angavya wa lukolo lwa Aloni akoto kuhamba kupandu pa kuwusila teta kumhukisila Bambu Chapanga ubani. Ngati lepi yati iyongomeswa ngati Kola na vamlanda vaki.

41 Lukela lwaki, Vaisilaeli voha vamuvembenikili Musa na Aloni kuni vijova, "Muvakomili vandu va Bambu Chapanga." 42 Pevakonganiki palongolo ya Musa na Aloni ndava ya kujova mvembeneku wavi vakahamba ku Lindanda la kukonganekela, ndi vawene lihundi ligubiki Lindanda na lumuli lwa Bambu Chapanga wahumalili penapo. 43 Musa na Aloni vakahamba na kuyima palongolo ya Lindanda la kukonganekela, 44 kangi Bambu Chapanga akamjovela Musa, 45 "Jivika kutali na vandu ava, nivayongomesa hinu naha!" Nambu vene vakafugama na kuyupa.

46 Musa amjovili Aloni, "Utola lumbani lwaku, sopa makalakala ga motu kuhuma pandu pa kuwusila teta, kangi usopa ubani na uhamba nachu kanyata kwa vandu na kuvakitala utepulanisi. Kita kanyata! Ligoga la Bambu Chapanga limali kuvahikila na utamu uhakahu umali kuvahikila." 47 Hinu, Aloni ahengili ngati Musa cheamjovili. Atolili lumbani lwaki na kujumba mbaka pagati ya vandu. Peawene litovelu limali kutumbula, asopili ubani mulumbani na kuvakitila vandu utepulanisa. 48 Peakitili chenicho litovelu likaguna balapala na mwene akasigalila ayimipagati ya vevavii mumi na vevafwili, na litovelu likaguna. 49 Mvalangu wa vandu vevafwili kwa litovelu lila yavi elufu kumi na mcheche na miya saba changali kuvalanga vala vevafwili ku uhakahu wa Kola. 50 Litovelu pelakotwiki, Aloni awuyili kwa Musa kumlyangu wula wa Lindanda la Mngonganu.