1 Hinu Balaamu akamanya kuvya Chapanga aganili kuvamotisa Vaisilaeli, ndava yeniyo ahambili lepi kavili kulondola, ndi akavya ilolokesa kulugangatu. 2 Balaamu pealolili kuvala na kuvawona Vaisilalei vapumulili, kila likabila pandu paki. Kangi Mpungu wa Chapanga ukambwelili, 3 mwene akajova malovi aga ga ulota,

Malovi gangu nene mwana wa Peoli,

malovi ga mundu mweagubukulili mihu. 4 malovi ga mundu mweayuwini malovi ga Chapanga,

mundu mwealolili maono ga Chapanga mweavi na makakala,

mundu mweafugimi na kugundama mbaka pahi na mihu gaki kulola hotohoto. 5 Mandanda gaku gamganisi namuna yoki nyenye vandu va Yakobo,

ena makao ginu nyenye vandu va Isilaeli! 6 Ndi ngati makemba gegihelelesa manji,

ngati lidimba pamuhana ya mfuleni,

ngati masongolelu geapandili Chapanga,

ngati mibani pamuhana ya manji. 7 Yati vivya na fula za gamahele,

na kumija mbeyu zavi mumigunda yeyina manji gamahele

nkosi wavi yati ivya mkulu kuliku Agagi,

unkosi waki yati utopeswa neju. 8 Chapanga avatolili kuhuma ku Misili,

mwene akuvatovanila neju ngati liyati.

Yati akugayongomesa milima yeyivi makoko ginu,

yati idenyadenya mahupa gavi,

yati akuvahoma kwa nduta zavi. 9 Yati ihumila na kugona pahi ngati lihimba,

yani mweilinga kumuyumusa?

Amotisiwa yeyoha yula mweakuvamotisa nyenye Vaisilaeli,

apewa likoto yeyoha yula mweakuvapela nyenye likoto.

10 Balaki akamema ligoga ndava ya Balaamu, akapamanda mawoko gaki kwa ligoga na kumjovela, "Nakukemili uvapela likoto makoko vangu, nambu mala zoha zidatu uvamotisi! 11 Hinu! Uwuka kanyata. Nakuhaidili kukupela njombi zamahele, nambu Bambu Chapanga akudivalili kupata njombi zenizo, akunyimili!"

12 Balaamu akamjovela Balaki, "Wu, wikumbuka lepi chila chenajovili vajumbi vewavatumili kwangu? Navajovili naha, 13 kuvya hati ngati ukunipela nyumba yaku ya unkosi kuni yimemili mashonga na dhahabu, nene nihotola lepi kuyepa lilagizu la Chapanga, kwa kukita lijambu loloha, labwina amala lihakahu kwa kugana kwangu mwene? Najovili chila cheijova Chapanga ndi chenijova."

14 "Hinu niwuya kwa vandu vangu, nambu kwakona kuwuka, leka nikujovela mambu gala vandu avo chevakuvakitila vandu vaku magono gegibwela." 15 Kangi Balaamu akajova ujumbi waki,

"Ujumbi wa Balaamu mwana wa Beoli.

ujumbi waki mwene yula lihu laki lilola bwina,

16 Chenichi ndi chaajovili mundu mweayuwini malovi ga Chapanga,

mundu mweanaumanya kuhuma Chapanga mkulu,

mundu mweifugama mbaka pahi na kuni mihu gaki gadindwiki, mweilola maono ga Chapanga mweana makakala.

17 Nikumlola, mweibwela nambu mwanakandahi,

nikumlola, nambu avili lepi papipi.

Ndondo yati yihumila kwa chivelaku cha Yakobo,

yati ihumila nkosi pagati ya Vaisilaeli.

Kwa ndonga yaki yati akuvatova vachilongosi va Vamoabu

yati akuvakomekesa vachiveleku voha va Sesi.

18 Vaisilaeli yati vakuvahotola Vaedomu,

Yati akuvabuna mewa Seili veva likoko vaki,

nambu Isilaeli yati ivya na makakala.

19 Chilongosi yati ibwela kuhuma kwa Yakobo

na kuvakomekea vevasigalili pamuji wa Ali."

20 "Kangi Balaamu avawene Vaamaleki, akavajovela ujumbi uwu.

Amaleki vandu vevana makakala neju,

nambu pamwishu wikomekeswa njwee."

21 "Ndi avawene Vakeni, avajovela ujumbi waki,

Makao ginu ndi gavi bwina ngati chisakanilu chijengiwi ku litalahu.

22 Nambu nyenye Vakemi yati mwikomekeswa.

Pemukamuliwa kungondo na Ashulu?"

23 Kangi Balaamu akajova ujumbi uwu.

"Mwe! Yani mweisigalila, Chapanga peikita genago?

24 Watu yati zibwela kuhuma Kitimu,

yati vakuyitova Ashulu na Ebeli.

Nambu vene mewa yati vikomakeswa."

25 Hinu Balaamu akawuka kuwuya kunyumba, mewa Balaki akahamba njila yaki.