1 Bambu Chapanga alongili na Musa kumitambu ya Moabu, kumwambu ya mfuleni Yoludani papipi na Yeliko, akamjovela, 2 "Valagiza Vaisilaeli kuvya kulandana na uhali wevitalalilayi, vavapela Valawi miji ya kutama na pandu pa kudimila mifuya mumihana ya miji yeniyo. 3 miji yeniyo yati yivya yavi na vene yati vitama mwenumo na malishu yati givya ndava ya ng'ombi zavi pamonga na mene na mambelele pamonga na mifuya yavi yingi yoha. 4 Pandu pakulisila mifuya yemukuvapela Valawi kutindila miji yeniyo yati gidandasika mita miya mcheche na hamusini kuhuma ku luwumba lwa miji yeniyo. 5 Kuvala ya muji, pimayi mita miya tisa upandi kwelihumila lilanga na upandi wa kusini piamayi mita miya tisa na upandi kwalitipama lilanga pimayi mita miya tisa na upandi wa kasikazini pimayi mita miya tisa, na muji yati wivya pagati. Pandu apo yati pivya ndava ya kulisila mifuya. 6 Yati mukuvapela Valawi miji sita ya kutilalila pala mundu akamukoma muyaki changagana yati ihotola kutilila. Pamonga na yeniyo, yati mukuvapela miji yingi alobaini na yivili. 7 Jumula yikuvagana kuvapela Valawi miji alobaini na miya nane, pamonga na pandu pakudimila mifuya yavi. 8 Mvalangu wa miji yemukuvapela Valawi kuuhali wa Vaisilaeli yati yitegemela uvaha wa kabila, likabila livaha yati liwusa miji yamahele na likabila lidebe yati liwusa padebe. Kila likabila yati liwusa miji yaki ndava ya Valawi kuwanangana na pandu pevapewili."

9 Bambu Chapanga akalongela na Musa, akamjovela, 10 Uvajovela Vaisilaeli kuvya lukumbi pevikupuka mfuleni Yoludani na kuyingila mulima wa Kanaani, 11 yati mwihagula miji yeyivya ya kutilila kula mundu akamkoma muyaki changagana yati ikutilila. 12 Miji yeniyo yati yivya pandu pa kutilila bwina muni mkomaji akotoka kukomiwa na yula mweilipisa, muni akoto kufwa kwakona angahamuliwa palibanji la mihalu. 13 Mjivikila miji sita ndava ya kutilila. 14 Ku mulima wa Kanaani yemuyitenga, yidatu yivya upandi kwelihumila lilanga wa Yoludani na yidatu yingi yivya pagati ya mulima wa Kanaani. 15 Miji yeniyi sita yati yivya pandu pa kutilila ndava ya Vaisilaeli na vayehe na vangi voha vevitama pagati yinu, muni kuvya mundu yeyoha yula mweamkomili mundu yungi changagana ihotola kutilila mwenumo.

16 "Nambu mundu akamtova muyaki kwa chindu cha lyuma, mundu mwenuyo akafwa, ndi mkomaji mwenuyo iganikiwa akomiwa. 17 Mundu yoyoha akamtova myaki kwa liganga na kumkita afwayi, mundu mweuyo iganikiwa akomiwa. 18 Ngati akamtova muyaki kwa limbikiti na kumkita myaki afwayi, mundu mwenuyo mewa akomewa. 19 Mulongo wa mundu mweakomiwi yati ilipisa chila cheahengiwi mlongo waki. Mwenuyo peikonganeka na mkomaji yula yati akumkoma."

20 "Kagati mundu akumhakalila muyaki kangi akamkang'a amala kumjugumila chindu kwa kugana na kufwa, 21 amala kwa kumtova ngumi na kufwa, hinu mundu mwenuyo mwamtovili myaki ndi mkomaji ndi iganikiwa akomiwa. Mlongo wa mundu mwenuyo yati akumlipisa kwa kumkoma peikonganeka nayu."

22 "Nambu ngati mundu akamkang'a muyaki chigafula changamhakalila amala kumjugila chindu changambajamila, 23 amala ngati mundu akajugumila liganga lelihotola kumkita afwayi, akamkoma mundu changamanya, pamonga avi lepi likoko waki mewa nakugana kumlemasa, 24 hinu vandu yati vihamula pagati yula mkomaji na mlongo wa mundu mweakomiwi mweaganili kulipisa geakitili, kuwanangana na malagizu aga. 25 Libanji la muhalu yati vakumsangula mwakomi mwenuyo mumawoko ga vandu va mlongo wa mweakomiwi, ma kumuwuyisa kumuji wa matililo kweatilalili. Yati itama kwenuko mbaka lifwa la mteta mkulu wa lukumbi lwenulo mweahaguliwi lukumbi lwenulo kwa kunyalwa mahuta ga kumkita avya mteta wa Chapanga. 26 Nambu ngati yula mweakomili akahuma kuvala ya muji weatilili lukumbi lwolwoha lula, 27 kangi mlongo wa mundu mweakomiwi akamkolela kuvala ya mibaka ya muji wa matililo na akamkoma, mwenuyo ndi ivya lepi na mhalu wa kukoma. 28 Mweatakiwi yikumgana atama pamuji wa matililo mbaka peifwa Mteta Mkulu, na peifwa Mteta Mkulu yati iwuya kunyumba. 29 Malagizu aga yati gihengeka muviveleku vinu vyoha, pandu popoha pemwitama."

30 "Mundu yeyoha mweikoma mundu, yati ihamuliwa lifwa ndava usahidi wa vandu vavili amala neju vevauwene ukomaji, nambu mundu yeyoha ihotola lepi kuhamuliwa lifwa ndava mundu mmonga kumuwona ukomaji. 31 Mkoto kupokela fidiya yoyoha kusangula wumi wa mkomaji mweiganikiwa lifwa, mundu mwenuyo yikumgana akomiwa. 32 mkoto kupokela amala kuyidakila fidiya yeyoha kuhuma kwa mundu mweatilili muji wa matililo muni kumyidakila awuya kutama kunyumba yaki kwakona Mteta Mkulu angafwa. 33 Mkotoka kukita mulima wemutama niubela. Kukoma vandu kukita Chapanga aubela mulima, na kawaka luteta lweluhotola kuunyambisa mulima, nambu kwa kumkoma mkomaji yula ndu. 34 Mkoto kuukita mulima wemutama niubela muni nene nitama mumomo, nene Bambu Chapanga nitama pagati ya Vaisilaeli."