1 Bambu Chapanga amjovilili Musa, 2 "Uvapela Vaisilaeli lilagizu ili. Nyenye yati mukuniletela nene kwa lukumbi lweluvikiwi chakulya ndava ya luteta lwa kutinyiswa kwa motu, zivya unungalilu wabwina wa kuniganisa.

3 Uvajovela kuvya teta zevakuniwusila kwa motu ndi izi, Vanalimbelele vavili va mwaka mmonga vangali chilema chochoha ndava ya teta ya kutinyisa ya magono goha. 4 Mwanalimbelele mmonga awusiwa lukela na yungi kimii, 5 kila mmonga yati iwusiwapamonga na kilo yimonga ya uhembe weuhangisini pamonga na lita yimonga ya mahuta gabwina ga zeituni. 6 Yeniyi ndi teta ya magono goha ya kutinyiswa yeyatumbuliwi kuchitumbi Sinai ngati luteta lwa chakulya, yivya unungalila wabwina ya kuniganisa, luteta yeyiwusiwi kwa Bambu kwa motu. 7 Kwa kila mwana limbelele yati iwusiwa pamonga na luteta lwa mnyweso lita yimonga ya divayi. Yati wisopa teta yeniyi ya mnyweso uvavanu pandu Pa Msopi, yita ukuyiyitalila luteta lwenulo lwa mnyweso uvavanu kwa Bambu pandu Pamusopi. 8 Lukumbi lwa kimii yati umuwusa mwanalimbelele la pili kuvya luteta lwa kutinyiswa pamonga na luteta lwa chakulya na mnyweso ngati chewawusili lukela, yeniyo mewa ndi luteta lwa chakulya, unungalila wabwina wa kumganisa Bambu."

9 "Ligono la Kupumulila, yati mwiwusa teta ya mwanalimbelele vavili vagosi va mwaka umonga vangali chilema, teta ya uhembe nyililili kilo zivili weuhangisini na mahuta, na teta yaki ya mnyweso. 10 Teta yeniyi ya kutinyiswa yati yiwusiwa kila ligono la Kupumulila pamonga na teta ya magono goha ya kutinyiswa na teta ya mnyweso."

11 "Kila ligono la kutumbula la kila mwehi yati mukumuwisila Bambu Chapanga, teta ya kutinyiswa, ng'ombi zigosi zivili vadebe na limbelele ligosi mmonga vanalimbelele vagosi saba va mwaka umonga, vangali chilema. 12 Yati mwiwusa teta ya uhembe nyilili kilo zidatu weuhangisini na mahuta kwa kila ng'ombi yimonga, yati mwiwusa kilo zivili za uhembe kwa kila limbelele mgosi, 13 pamonga na kilo yimonga ya uhembe kwa kila mwanalimbelele. Teta zenii za kutinyiswa ndi luteta lwelunaunungalila wabwina wa kumuganisa Bambu Chapanga. 14 Chipimu cha teta ya mnyeso chechiganikiwa ndi lita zivili za divayi kwa kila ng'ombi yigosi, lita yimonga na yapinga kwa kila mwanalimbelele ligosi na lita yimonga kwa kila mwanalimbelele wa mwaka umonga. Yeniyi ndi teta ya kutinyiswa ya kila mwehi mumyehi yoha ya mwaka. 15 Neju ya teta ya magono goha ya kutinyiswa pamonga na teta yaki ya mnyweso, lipongo limonga yati liwusiwa kwa Bambu kuvya teta ya kulekekeswa kubuda."

16 "Ligono la kumi na mcheche la mwehi wa kutumbula ndi Pasaka ya Bambu Chapanga. 17 Ligono la kumi na mahanu la mwehi wuwowo ndi mselebuko. Kwa magono saba yati mwilya mabumunda gangali ngemeku. 18 Paligono la kutumbula yati kwivya na mngonganu wa kumuyupa Chapanga. Ligono lenilo mkoto kuhenga lihengu. 19 Yati mwiwusa teta za kutinyiswa ngati luteta lwa chakulya kwa Bambu Chapanga, ng'ombi yigosi zivili na limbelele ligosi limonga na vanalimbelele saba va mwaka umonga, voha vangali chilema. 20 Teta ya uhembe yeyiwusiwa pamonga nayu ndi uhembe wabwina weuhangisini na mahuta, kilo zidatu kwa kila ng'ombi yigosi yimonga na kilo zivili kwa kila limbelele ligosi limonga, 21 pamonga na kilo ya uhembe yimonga kwa kila mmonga wa vala vanalimbelele saba. 22 Mewa yati mwiwusa lipongo limonga kuvya teta lwa kulekekesa kumbudili Chapanga ndava ya kuvakitila utepulanisi. 23 Yati mwiwusa vindu vyenivi changali kuleka kuwusa luteta lula lwa kutinyiswa lwa uyovalelu lweluwusiwa magono goha lukela. 24 Mewawa, kwa magono saba, yati mwiwusa teta ya kutinyiswa lwa magono goha ya chakulya cha kutinyisa, yila yeyinungalila bwina ya kumganisa Bambu Chapanga. Muwusa yeniyi changali kuleka kuwusa luteta lwa kutinyiswa lwa magono goha na luteta lwa yaki ya mnyeso. 25 Paligono la saba yati mwikonganeka ndava ya kumufugamila Chapanga, na mkoto kuhenga lihengu."

26 "Paligono la kutumbula la mselebuko wa mjuma lukumbi pemukumuwusiala Bambu Chapanga, teta ya mabenu ginu ga kutumbula, yati mwikonganeka ndava ya kumfugamila Chapanga, mkoto kuhengu lihengu. 27 Yati mwiwusa luteta lwa kutinyiswa, yivya unungalilu wabwina wa kumganisa Bambu lwa ng'ombi zigosi zivili, limbelele ligosi limonga na vanalimbelele saba vagosi va mwaka umonga. Voha vavya vangali chilema. 28 Teta ya uhembe yeyivya pamonga na zenizo yati yivya uhembe kilo zidatu weuhangisini na mahuta kwa kila ng'ombi yigosi, na kilo zivili kwa kila limbelele ligosi, 29 na kilo yimonga kwa kila vanalimbelele saba vala. 30 Mewa yati mwiwusa lipongo limonga kwa kuvya luteta lwa kulekekesa kumbudila Chapanga ndava ya kukitiwa utepulanisi. 31 Tendekehayi luteta pamonga na luteta zaki za minyweso, changali kuleka kuwusa luteta lula lwa magono goha lwa kutinyiswa, pamonga na teta zaki za uhembe. Vinyama vyenivyo vikotoka kuvya na chilema."